Daniel 9:1-27
9 Ken inyom i hiihii i Dariu+ wan u Ahasueru—un u due ken tsombor u Mbamede, u i ver un tor sha tartor u Mbakaldi+—
2 een, ken inyom i hiihii i hemen na la, mo Daniel m ôr ityakeda,* m fa anyom a Yerusalem una lu ice la, er Yehova ôr sha ikyev i profeti Yeremia nahan ér, Yerusalem+ una lu ice anyom 70.+
3 Tsô m gema ishigh m na hen Yehova Aôndo u mimi la, m zamber un ken msen a kwaghyan u hôron+ man ikyondo i zungwen* kua mtuhwem.
4 M er msen hen Yehova Aôndo wam, m pase isholibo yase, m kaa mer:
“Yehova Aôndo u mimi, we u u hembe shi u te ihindi iyol, shi u kuren ikyuryan you, shi u tesen mba u doo ve ishima+ shi ve kuran atindi a ou dooshima gbem la,+
5 se er isholibo, se er kwagh u shami ga, se er iferkwagh shi se hemba ato;+ se undu atindi a ou man ajiraôron a ou.
6 Ve kegh ato a mbatomov ou uprofeti ga,+ ve mba ve lam a utor asev man mbahemenev asev man uter asev, kua ior mba ken tar la cii ken iti you la.
7 We Yehova, u ngu u perapera, kpa se yô, se ya kunya er i lu nyian nahan, een, se man ior i Yuda man ior mba ve lu ken Yerusalem la, man Iserael cii, ve mba ve lu ikyua ikyua man mba ve lu ica ken ityar i u sambe ve ve yem ker, sha ci u ve er kwagh a we sha mimi ga la cii.+
8 “Yehova, se ya kunya, een, se man utor asev man mbahemenev asev kua uter asev, sha ci u se er u isholibo.
9 Yehova Aôndo wase zungwen mhôônom shi den asorabo,+ gadia se hemba un ato.+
10 Se ungwa imo i Yehova Aôndo wase ga, se venda u dondon atindi a na, a a ver sha ishigh yasegh, sha ikyev i mbatomov nav uprofeti la.+
11 Iserael cii per tindi wou shi gema ijime a we, ve ungwa imo you ga, nahan u va a ifyan man ibumun i i nger ken Tindi u Mose wanakiriki u Aôndo u mimi la+ sha a vese, sha ci u se er u isholibo.
12 A er kwagh u a ôr sha a vese la, man kwagh u a ôr sha mbahemenev asev mba ve hemen se la,*+ a va a zegekwaghtseren sha a vese; i gbe je kpa kwagh ngu a er shin tar, imba er kwagh u yange er ken Yerusalem la nahan ga.+
13 Kwaghtseren ne cii va sha a vese,+ vough er i nger ken Tindi u Mose la nahan. Nahan cii kpa, se zamber a Yehova Aôndo wase ser a zungwe se mhôônom ga, se gema ijime a kwaghbo wase ga,+ shi se tese ser se kav mimi wou kpaa ga.
14 “Yehova lu nengen, nahan a va a kwaghtseren sha a vese, sha ci u Yehova Aôndo wase tese ér un ngu u perapera sha ityom i a er la cii; nahan cii kpa se ungwa imo na ga.+
15 “Hegen yô, Yehova Aôndo wase, we u yange u due a ior ou ken tar u Igipiti sha uwegh ku ageegh,+ shi u er i fa iti you zan zan nyian ne,+ se er u isholibo, shi se er iferkwagh.
16 Sha ci u akaa a perapera a u eren cii la yô,+ Yehova, tôô ishimavihin man iyugh sha gar wou Yerusalem kera, un u a lu icighanwo wou la, wea lumun yô; Yerusalem man ior ou hingir kwagh u ior mba ve kase se la cii vea lahan yô, sha ci u asorabo a ase man akaabo a uter asev.+
17 Nahan hegen yô, Aôndo wase, ungwa msen u ortom wou man uzamber nav, shi na ishigh you ki mondo sha icighanjiir wou+ u a hingir ice la,+ sha ci u icivir you Yehova.
18 Ver ato ungwa, Aôndo wam, bugh ashe a ou nenge er se man gar u i yer un sha iti you ne se hingir ice yô; gadia se mba zamber we sha ci u se mba eren akaa a perapera yum ga, kpa ka sha ci u mhôônom ou ma ma ngee kpishi la.+
19 Yehova, kegh ato a vese. Yehova, de se kwaghbo.+ Ver ishima sha a vese Yehova, shi er kwagh! De timbir ga, sha ci u icivir you, Aôndo wam, gadia mba yer gar wou sha iti you, shi mba yer ior ou kpa sha iti you.”+
20 Er m lu lamen shi eren msen shi pasen isholibo yam man isholibo i ior av Iserael, shi zamber mer i zungwem mhôônom sha ishigh ki Yehova Aôndo wam, sha kwagh u icighanwo u Aôndo wam la,+
21 een, er m lu eren msen zan a mi ave la je, or u i yer un ér Gaberiel,+ un u yange m vande nengen a na ken mpase u sha mnenge+ la va hen a mo, shighe u m vôr kpishi la; kwagh ne za hemen er sha shighe u nan nagh ku aikighe la nahan.
22 Nahan a nam mkav, a kaa ér:
“We Daniel, hegen yô, m va sha u me na u kwaghfan man mkav.
23 U ngur zamber yô, kwaghôron due, nahan m va mer me va pase u kwagh shon, sha ci u u gba Aôndo kwagh kpishi.+ Nahan hen sha ikyaa la, shi kav mpase u sha mnenge la.
24 “Ukasua mba 70* mba i ver sha ci u ior ou man icighangar wou yô,+ sha er a bee a tindi u peren, shi a kar a isholibo kera,+ shi a na iwom sha ci u kwaghbo,+ shi a va a perapera u tsôron,+ shi a cir mpase u sha mnenge man kwaghôron u profeti la a ver,+ maa a shighe Icighanjiir u Hemban Cii la mkurem yô.*
25 Fa, shi kav nahan wer, hii shighe u i na zwa ér i sôr Yerusalem+ shi i hide i maa un la zan zan shighe u Mesiya*+ Orhemen+ una va la, a lu ukasua 7 man ukasua 62.+ A sôr un shi a hide a maa un; una lu a tembe shi akpa una kase un a ningir a tser, kpa a lu sha ashighe a ican.
26 “Ukasua 62 vea karen yô, a tôndo Mesiya kera,*+ una kera shi a kwagh ga.+
“Shi ior mba orhemen u a lu van la vea tim gar man icighanjiir la.+ Mkur na una va er ka sha mngerem ma saren avenge nahan. Shi ityav mbia lu zan zan mkur; ka mtim Aôndo a tsough u van a mi ye.+
27 “Shi una na ikyuryan la ia za hemen her sha ci u ior kpishi, ken kasua môm; a nyôron hen atô u kasua yô, una na kwagh u nagh man iyua vea bee.+
“Shin un u ka a va a mtim+ la una lu sha kperegh ku akaa a ndôhôrshima; shi a haa kwagh u i tsough la sha un u a lu ice la, zan zan mtim una kar van.”
