Daniel 4:1-37
4 “Ka loho u Tor Nebukadinesar a lu tindin hen ior man akuraior kua mbalamen ijô kposo kposo cii mba ve lu sha tar cii la je ne, ér: Bem wen a seer ngeen!
2 Doom u pasen akav man akaa a kpilighyol a Aôndo u Hemban Cii a er a mo yô.
3 Nenge imba er akav a na a lu a vesen, shi akaa a kpilighyol a na a lu a ageegh sha wono! Tartor na ka tartor u lun gbem sha won, shi hemen na ka u lun sha ikyov ikyov.+
4 “Mo Nebukadinesar m tema hen ya wam hoghom hoghom, shi akaa lu zan a mo doo doo hen ya wam u tor.
5 Mnyam cier mo, nahan cier mo iyol. Er m yav sha gambe wam la, akaa a m nenge a mi man mbampase mba sha mnenge mba ken ityough yagh la na cier mo iyol.+
6 Tsô m kaa mer i va a ior mba ken Babilon mbafan kwagh cii sha ishigh yagh, sha er vea pasem mnyam mara yô.+
7 “Hen shighe la, upristi mba eren ahir man mbaakombov man Mbakaldi* kua mbanengenasan+ va nyôr. M ôron ve mnyam mara yô, ve fatyô u pasen mo inja i ma ga.+
8 Ken masejime yô, Daniel, un u i yer iti na ér Beleteshasar,+ sha iti i aôndo wam,+ un u jijingi u uicighanmbaaôndo+ a lu ken a na la va nyôr sha ishigh yagh, nahan m ôr un mnyam mara, m kaa mer:
9 “‘We Beleteshasar, orvesen u upristi mba eren ahir,+ m fa dedoo je mer jijingi u uicighanmbaaôndo ngu ken a we+ shi kwaghmyer môm una fatyô u taver hemban we ga.+ Nahan ôrom mbampase mba sha mnenge mba m nenge a mi ken mnyam am la, shi pasem inja i ma.
10 “‘Ken mbampase mba sha mnenge mba ken ityough yagh, shighe u m yav sha gambe wam la, m nenge a kon+ ugen hen atô u tar, u tav je kpilighyol.+
11 Kon la vese, taver, ityough ki u nyôr sha usha, nahan i nenge a u sha akighir a tar cii.
12 Ikya i u doo ashe, shi u ume atam kpishi, nahan u lu a kwaghyan sha ci u annyamev man uumace cii. Lu shin itine i u annyamev mba ken toho zuan a mure ye, shi lu sha agbaa a u annyonov mba sha kwavaôndo teman ye, shi lu sha u akaa a i gbe a la cii zuan a kwaghyan ye.
13 “‘Er m nenge mbampase mba sha mnenge mba ken ityough yagh, shighe u m yav sha gambe wam la, m nenge a orkuran, icighanor, mough sha lu senen.+
14 A yila genger genger a kaa ér: “Gber kon la kende inya,+ gber agbaa a u kera, ndoor ikya i u, shi sar atam a u! Annyamev ve kar hen itine i u kera, shi annyonov ve mough sha agbaa a u sha.
15 Kpa de ikpughur la a amise a na a lu shin inya her, gema kange iyôgh man togula sha mi, a lu ken toho. De avure a sha a gba sha mi a heen iyol, shi de kwar na u lu vea annyamev man a imendenev mbi shin tar+ imôngo.
16 Í gema ishima na, i de kera lu ishima i or ga, i gema i na un ishima i annyamev, nahan ashighe ataankarahar+ a kar sha a na.+
17 Ka tindi u mbakuran ve we je la,+ shi ka kwagh u uicighanmbaiorov kpa ve ôr je la, sha er ior mba ve lu uma la vea fa ér Uhemban Cii ngu Orhemen ken tartor u uumace,+ shi ér ka a na hanma or u a soo cii u, shi or u hemban gban ijime ken ior cii je kpa, ka a ver nan sha u yô.”
18 “‘Ka mnyam ma ma cier mo tor Nebukadinesar je la; hegen yô, we Beleteshasar, pasem inja i ma, sha ci u mbafankwagh mba ken tartor wam mbagen mbara cii fatyô u pasen mo inja i ma ga.+ Kpa we yô, ú fatyô u eren nahan, sha ci u jijingi u uicighanmbaaôndo ngu ken a we.’
19 “Hen shighe la, kunda Daniel iyol sha anshighe kpuaa, un u i yer un ér Beleteshasar+ la, shi akaa a a hen sha mi la kpa cier un iyol.
“Tor kaa ér, ‘we Beleteshasar, de deen wer mnyam mara man inja i ma ve cier we iyol ga.’
“Beleteshasar gema kaa ér, ‘Terem, mnyam mara ma ma kur sha mba ve ker u ihyom la, shi inja i ma sha mbahyomov ou.
20 “‘Kon u u nenge u vese u hingir zegenan shi u taver, ityough ki u ki nyer sha usha shi i nenge a u sha tar cii,+
21 u ikya i u i doo ashe, u ume atam kpishi shi u ne uumace man annyamev cii kwaghyan, annyamev mba ken toho ve lun shin itine i u, shi annyonov mba sha kwavaôndo ve teman sha agbaa a u la,+
22 ka we tor, sha ci u u vese u hingir ityagheror shi u taver, icivir you vese nyôr sha,+ hemen wou kpa nyôr sha akighir a tar je.+
23 “‘Tsô tor nenge orkuran, icighanor,+ mough sha lu senen, lu kaan ér: “Gber kon la kende inya shi vihi u kera, kpa de ikpughur na a amise a na a lu shin inya her, gema kange iyôgh man togula sha mi, a lu ken toho. De avure a sha a gba sha mi a heen iyol, shi de kwar na u lu vea annyamev mba ken toho zan zan ashighe ataankarahar a kar sha a na.”+
24 Ka inja i mnyam mara je ne, tor; ka kwagh u Uhemban Cii a kaa ér una er terem tor kpee je ne.
25 A zenda u hen atô u ior kera, u za lu vea annyamev mba ken toho, nahan a na u imendenev u ya vough er ibua nahan; shi avure a sha aa gba sha a we u heen iyol,+ nahan ashighe ataankarahar+ aa kar sha a we,+ zan zan u fa er Uhemban Cii a lu Orhemen ken tartor u uumace shi ka a na hanma or u a soo cii+ u yô.
26 “‘Kpa er i kaa ér i undu ikpughur u kon la a amise a na+ her yô, tartor wou ua hide a lu u wou her shighe u u fa wer usha mba hemen la.
27 Sha nahan yô, tor, ma u lumun kwaghwan wam. De asorabo a ou, gema eren kwagh u dedoo, shi de iferkwagh you, gema zungwen mbaatsanev mhôônom. Nahan alaghga ayange a mkpeyol wou aa seer.’”+
28 Akaa ne cii er Tor Nebukadinesar.
29 Iwer puekarihiar ngi kar yô, Nebukadinesar gba zenden sha tembeyoughough u sha, u ya u tor u Babilon.
30 Tor lu kaan ér: “Ngun ka Zegebabilon u mo iyol yam m maa mer a lu ya u tor, sha tahav av man agee a am man sha ci u icivir i mhembe wam ne gaa?”
31 Er kwaghôron la lu ken zwa u tor la je, imo sen sha kaa ér: “Ka we je i ôr kwagh ne a we ye, Tor Nebukadinesar, ‘I kar a tartor la hen a we kera,+
32 shi i zenda u hen uumace kera. U lu vea annyamev mba ken toho, shi a na u imendenev u ya er ibua nahan, ashighe ataankarahar aa kar sha a we, zan zan u fa er Uhemban Cii a lu Orhemen ken tartor u uumace shi ka a na hanma or u a soo cii+ u yô.’”
33 Kwaghôron la kure sha Nebukadinesar hen shighe la. I zenda un hen uumace kera, a gba za yan imendenev vough er ibua nahan, shi avure a sha gba sha a na, a heen iyol, zan zan ice na vese lihe vough er ingyur i igyuve nahan, shi akughur a na lihe er akughur a inyon+ nahan.
34 “Shighe la been kera yô,+ mo Nebukadinesar m kenger sha, nahan mkav wam hide ken a mo; m wuese Uhemban Cii la, shi m na Un u a lu uma gbem sha won la iwuese man icivir, sha ci u hemen na ka hemen u lun gbem sha won, shi tartor na ka u lun sha ikyov ikyov.+
35 Ior mba ve lu sha tar cii mba ma kwagh ga, ka a er kwagh sha ishima na a ikyum i usha man ior mba ve lu shin tar la. Shi or môm nana fatyô u yangen un+ kwagh shin pinen un ér, ‘Ka nyi kwagh u er nahana?’+ ga.
36 “Hen shighe la, mkav wam hide hen a mo, shi icivir i tartor wam man shagba wam kua iengem yam hide hen a mo.+ Mbatomov av mba tagher tagher man ashagbaior a am hide lu zan idyu a mo, shi i hide a tartor wam i nam, shi i seer nan mo mhembe.
37 “Hegen, mo Nebukadinesar, m ngu wuese shi nan Tor u sha icivir+ shi kenden a na sha, sha ci u ityom na cii ka i mimi shi igbenda na ka i vough,+ man sha ci u ka a hee mba ve zenden sha igbongor la.”+
Ngeren mba shin kpe
^ Ka nongo u mba ve fe u kpehen ishor tsema tsema shi nengen asan je la.
