Daniel 11:1-45
11 “Mo yô, ken inyom i hiihii i hemen u Dariu+ Ormede la, m mough m tile sha, sha u me na un agee shi me taver un yô.
2 Kwagh u me ôr u hegen ne ka kwagh u mimi:
“Nenge! Utor mbagenev utar vea mough a tile sha, sha ci u Pershia, tor u sha unyiin la una kohol inyaregh kpishi a hemba mbagenev mbara cii. Una va luun a tahav sha ci u inyaregh ki a lu a mi la yô, una tôô hanma kwagh cii una nôngo ityav a tartor u Grika.+
3 “Shi tor u ageegh ugen una mough a hemen sha utaha kpishi+ shi una er kwagh er a soo yô.
4 Kpa una moughon a tilen sha yô, a hembe tartor na shi a pav u ker a na sha avegher a ahumbe a anyiin a sha la,+ kpa a na ônov nav ga, shi ua kera lu a tahav er mbu hemen a mi la nahan ga; sha ci u a wuhe tartor na kera a gema a na ior mbagenev, a kera lu mban ga.
5 “Shi tor u ken imbusutariyan una lu a tahav, ka or môm ken mbahemenev nav je la; kpa orgen nana hemba un nana hemen sha utaha kpishi, a hemba tahav mbu ngula hemen a mi la.
6 “Anyom aa karen yô, vea ya ikyur, nahan wan u tor u ken imbusutariyan u kwase una va hen tor u ken imbusutarimese sha er vea ya ikyur shon yô.* Kpa uwegh ku wankwase la kua kera lu a tahav ga; shi un kpa una kera tile sha ga, uwegh nagh kpaa ga; shi a na wankwase la kera, un man ior mba ve ve a na la cii, kua or u yange nan mar un la, man or u yange nan na lu a tahav sha ayange shon la.
7 Shi orgen ken mende u amise a wankwase la nana mough a tile sha hen ian na, nahan nana va a ikyumutya nana va ta ityav sha iyou i taver i tor u ken imbusutarimese la, nana mough a nôngo ityav a ve nana hemba.
8 Shi una va ken Igipiti a mbaaôndo vev man a ieev vev mbi iyôôgh* man a akaainjaa a ve a sha azurufa man zanaria, man vea ior mba ve lu uikyangen la. Una tile paleghaa a tor u ken imbusutarimese anyom a wa karen,
9 un u una va ta ityav sha tartor u tor u ken imbusutariyan la, kpa una hide a yem ken tar na.
10 “Ônov nav yô, vea wa iyol i utya vea kohol zegeikyumutya ia ngee je a gande. Una yem hemen hemen kpee je, una ese hanma kwagh kera er mngerem ma ma sar avenge nahan. Kpa una hide a yem a za nôngo ityav zan zan a nyôr hen iyou na i taver.
11 “Ishima ia vihi tor u ken imbusutariyan tsung, nahan una due a za nôngo ityav a na, ka tor u ken imbusutarimese je la; shi una kohol zegeikpelaior, kpa a na ikpelaior la sha ikyev i or la.
12 A kura ikpelaior la a yem a mi kera. Ishima ia hagher un ker, nahan una na ior udubu pue pue vea gba; kpa una er tom a ian na i utaha la ga.
13 “Tsô tor u ken imbusutarimese una hide a yem a za kohol zegeikpelaior imôngo i ia hemba i hiihii la yô; man sha mkur u ashighe, shighe u anyom a wa karen la, una va a zegeikyumutya man akaa kpishi kpee je.
14 Sha ashighe la, ior kpishi vea mough a nôngo ityav a tor u ken imbusutariyan.
“Shi a kura ior mba vihin tu* ken ior ou mba ve lu nôngon ér mpase u sha mnenge a kure sha mi la a yem a mi kera; kpa vea nôngo gbeev.
15 “Tor u ken imbusutarimese una va una va ta tihi u inyaagh gumeen ken won u kpekpe u gar u lun a gir u taver la a ningir a tser, maa una ngohol un. Shi ave* a ken imbusutariyan aa tile sha ga, shin ior nav mba a tsough la kpaa ga; vea lu a tahav mbu tilen sha ga.
16 Or u nana va u nôngon ityav a na la nana er kwagh er nan soo la, shi or môm nana fatyô u tilen sha ishigh nagh ga. Una tile ken tar u Hwe,*+ shi tahav mbu timin kwagh mbua lu ken uwegh nagh.
17 Una ver ishigh nagh* u van a tahav mbu tartor na cii, shi a gba zwa môm a na; nahan una er kwagh a kure a zayol shio. Hide wankwase u kasev la yô, a na un ian ér a̱ tim un kera. Una tile sha ga, shi una za hemen u lun kwagh na kpaa ga.
18 Una gema ishigh nagh a na hen ityar i hen kpemnger, una ngohol i kpishi. Kurutya ugen una er ilyahan i i ve a mi sha a na la ia bee kera, sha er ilyahan na la ia kera lu ga yô. Una er ilyahan na la ia hide sha a na.
19 Maa una gema ishigh a hide a na sha ayou a taver a ken tar na, nahan una nôngo gbeev a gba, maa una kera lu ga.
20 “Or u kighir ior* nana mough a tile hen ian na la sha er nana kar ken tartor u doon ashe yô, kpa a hembe nan kera ken atô u ayange kpuaa; a lu sha ishimavihin shin ken utya ga.
21 “Shi orgen u i nyaghen nan yô,* nana mough a tile sha hen ian na, nahan kpa a na nan icivir i tartor la ga; nana va shighe u bem a lu yô,* nana ngohol tartor la sha ayom.
22 Shi a ese ave* a mngerem ma saren avenge la, nahan a hembe ve kera sha ci u kwagh na; er Orhemen+ u ikyuryan+ la kpa a lu nahan.
23 Man sha ci u ikyur i vea ya a na la yô, una er kwagh sha aie shi una mough a tile sha, una lu a agee sha iwasen i ikyurior igen i kiriki.
24 Hen shighe u bem una lu la,* una va sha ajiir a hemban lun yôughyôugh cii* a hen kpentar* la, nahan una er kwagh u uter nav man uter vev ve er ga yô. Una kar ve akaa a a ngohol man ishar i a ye kua akaa a a zough a mi la; shi una er mbamhen mba bov sha ajiir a lun a ugir mba taver la, kpa a lu sha anshighe kpuaa tseegh.
25 “Una va a agee a na cii man a ishima na cii sha tor u ken imbusutariyan a zegeikyumutya, nahan tor u ken imbusutariyan una wa iyol u nôngon ityav a zegeikyumutya i vesen man i ageegh. Una tile sha ga, sha ci u a er mbamhen mba bov sha a na.
26 Shi ior mba ve yan akaayan a na a dedoo la vea na una gba.
“Hide ikyumutya na yô, a ese i kera* shi a wua ior kpishi a haa inya.
27 “Hide utor mba uhar mban yô, vea ver ishima ve sha u eren kwaghbo, shi vea tema hen tebul môm vea lu ôron ayol a ve akaa a aiegh. Kpa kwagh môm una za a doo ga, sha ci u mkur u shighe u i ver la ngu a kuma ga.+
28 “Shi una hide a yem ken tar na a akaa kpishi, shi ishima na ia lu num a icighan-ikyuryan. Una er kwagh a kure a zayol shio, maa una hide a yem ken tar na.
29 “Una hide a va hen shighe u i ver la una va nôngo ityav a imbusutariyan. Kpa shighe ne una lu er ngise lu nahan ga,
30 sha ci u utso mba Kitim+ vea va ta ityav sha a na, nahan a hee un.
“Una hide a yem una za haa ishimavihin na sha icighan-ikyuryan+ la shi una er kwagh a kure a zayol shio; shi una hide a yem a za na ishima sha mba ve lu undun icighan-ikyuryan la.
31 Shi ave* aa mough hen a na a tile sha; shi aa hôngor a icighanjiir,+ ka iyou i taver je la, shi aa kar a kwagh u i eren ayange ayange la* kera.+
“Shi aa ver kwagh u ndôhôrshima u van a mtim la.+
32 “Shi mba vea er kwagh a ikyuryan la sha ifer yô, una hemen ve vea venda mimi sha u ôron ve akaa a doon u ungwan;* una ôr ve akaa a mimi ga. Kpa ior mba ve fe Aôndo ve yô, vea hemba shi vea er kwagh a kure a zayol shio.
33 Shi ve mba ve lu a kwaghfan+ ken ior yô, vea na ior kpishi vea zua a mkav. A er ve vea nôngo gbeev sha sanker man sha nomborusu, man sha u yemen a ve uikyangen kua sha u ngohol ve akaa; a er kwagh ne a ve ayange a wa karen.
34 Kpa a eren ve vea nôngon gbeev yô, a na ve iwasen kpuaa; shi ior kpishi vea kohol ve sha u ôron kwagh u doon ungwan.*
35 Shi a er ve mbagen mba ve lu a kwaghfan la vea nôngo gbeev, sha er a er tom u sôron kwagh sha ci ve shi a er tom u wanger kwagh shi kiren kwagh ér a lu wang+ zan zan mkur yô; sha ci u shighe u i ver la ngu a kuma ga.
36 “Tor la una er kwagh er a soo la, shi una mor iyol, una kende a iyol na sha, a hemba hanma aôndo cii; una ôr akaa a kpilighyol sha Aôndo u mbaaôndo.+ Kwagh a za a na a doo zan zan ishimavihin la ia kar been; sha ci u kwagh u i kange ishima u eren la una er kpee je.
37 Una tese icivir sha Aôndo u uter nav ga; shin una tese icivir sha isharen i ukase, shin sha ma aôndo kpaa ga, kpa una kende a iyol na sha a hemba hanma or cii.
38 Kpa una gema a na aôndo u ayou a taver icivir; una na aôndo u uter nav fa ga la icivir sha zanaria man azurufa man awen a injaa kua akaainjaa.
39 Una er kwagh a ajiir a hemban lun ican u nyôron her cii la a kure a zayol shio vea* aôndo ugen. Una na mba ve fe un la* icivir i vesen, nahan una er ve vea hemen ior kpishi; shi una pav inya a na kera* sha inyar.
40 “Hen shighe u mkur la, tor u ken imbusutariyan una zua vanger a na, vea tuur ayol a ve;* tor u ken imbusutarimese di una va sha a na er ka hiar nahan, a akekeautya man mbahendananyinya kua utso kpishi; una nyôr ken ityar la una ese hanma kwagh kera, er ka mngerem ma saren avenge nahan.
41 Shi una nyôr ken tar u Hwe,*+ nahan a er ityar kpishi ia nôngo gbeev. Kpa ka mba vea war sha ikyev na je ne: Edom man Moabi kua vegher u Mbaamon u vesen la.
42 Shi una dugh uwegh nagh ku ageegh sha ityar la; hide tar u Igipiti yô, ua war ga.
43 Shi una tema tor sha akaainjaa a i yer la, zanaria man azurufa, kua sha akaainjaa a Igipiti cii. Shi Mbalibia man Mbaetiopia vea lu tôvon akishiangahar a na.*
44 “Kpa ibaver i sha ityoughkitaregh* man i ken imbusutarimese ia za un iyol, nahan una due a yem a ishimavihin tsung sha u za vihin kwagh shi timin ior kpishi.
45 Tsô una tim utenti mba tor hen atô u zegemnger u hemban man icighanwo u Hwe*+ la; nahan una va zan zan una va nyôr ken mkur na; orwasen un nana lu ga.
Ngeren mba shin kpe
^ Shin “sha er vea gba zwa môm yô.”
^ Shin “ieev vev mbi keren a ker.”
^ Shin “ônov mba mbanumungbenda.”
^ Shin “akumautya.”
^ Shin “Mdoom.”
^ Shin “una kange ishima.”
^ “Or u kighir ior” ne, alaghga a lu or u kighir ior ér ve ta kpandegh. Shin “ka or u nan ior ican.”
^ Shin “orgen u nan ndôhôr ishima yô.”
^ Shin a fatyô u kaan ér, “nana va a u tan icin shio.”
^ Shin “akumautya.”
^ Shin a fatyô u kaan ér, “hen shighe u icintan a lu ga la.”
^ Zwa Heberu, “a wan ahôm.”
^ Shin “ipyaventar.”
^ Shin “ia kua.”
^ Shin “akumautya.”
^ Shin “nagh ku i naan hanma shighe la.”
^ Shin “una nyoho ve zwa.”
^ Shin “u nyohon zwa; ôron kwagh u mimi ga.”
^ Shin “sha iwasen i.”
^ Shin a fatyô u kaan ér, “una na hanma or u a fe nan cii.”
^ Shin “una kar inya.”
^ Shin “vea zua akor.”
^ Shin “Mdoom.”
^ Shin “vea dondo un ijime.”
^ Shin “ape iyange i dugh la.”
^ Shin “Mdoom.”
