Daniel 1:1-21
1 Ken inyom i sha utar i hemen u Yehoyakim+ tor u Yuda la, Nebukadinesar tor u Babilon va hen Yerusalem, va kase un wa atô.+
2 Shighe kar yô, Yehova na Yehoyakim tor u Yuda sha ikyev na,+ kua ikyav mbigen mbi ken iyou i* Aôndo u mimi la. Nahan a va a mbi ken tar u Shinar*+ ken iyou i* aôndo na. A ver ikyav mbira ken iyou i koson akaainjaa i aôndo na.+
3 Tsô tor kaa a Ashipenashi, orvesen u nengen sha mbaerentom hen ya u tor ér a va a Mbaiserael* mbagen kua ior mba ken tsombor u tor man ashagbaior.+
4 Yange lu u vea lu agumaior a* lun a ihyogholough iyol shio, mba mluashe ve a doo shi ve lu a kwaghfan man mfe man mkav+ shi ve kom u eren tom hen ya u tor yô. Lu u una tese ve kwaghngeren man zwa u Mbakaldi.
5 Heela tseegh ga, tor kaa ér i naan ve kwaghyan u dedoo u tor a ye man wain u tor a me la ayange ayange. Lu u a tsaase ve anyom atar, nahan shighe la una been yô, vea gema eren tor tom.
6 Ior mbagen ken a ve lu ior mba ken ipyaven u* Yuda, ve yô, lu: Daniel*+ man Hanania* man Mishael* kua Asaria.*+
7 Tsô orvesen u mbaerentom hen ya u tor la na ve ati;* a na Daniel iti ér Beleteshasar,+ a na Hanania iti ér Shaderaki, a na Mishael iti ér Meshaki, Asaria di a na un iti ér Abedinego.+
8 Kpa Daniel kange ishima ér una hôngor iyol na sha akaayan a dedoo a tor la ga, shin una ma wain na kpaa ga. Nahan a ôr a orvesen u nengen sha mbaerentom hen ya u tor la ér a na un ian sha er una hôngor iyol na sha imba gbenda ne ga yô.
9 Tsô Aôndo u mimi na orvesen u nengen sha mbaerentom hen ya u tor la tese Daniel erdoo shi zungwe un mhôônom.+
10 Kpa orvesen u nengen sha mbaerentom hen ya u tor la kaa a Daniel ér: “M ngu cian terem tor, un u a kaa ér i naan ne kwaghyan man kwaghman wen la. Aluer a nenge a ven man mluashe wen hemba vihin a u agumaior agen,* mba ne lu kov môm la nahan, a lu nena? Ne erem me ya ibo* sha ishigh ki tor.”
11 Kpa Daniel kaa a wanye u orvesen u nengen sha mbaerentom hen ya u tor ver un ér a nengen sha Daniel man Hanania man Mishael kua Asaria la ér:
12 “Wea lumun yô, kar mbayev ou ayange pue. De i naan se ikyaiue se yaan man mngerem se maan;
13 nahan kar mluashe wase a mluashe u agumaior a a* lu yan akaayan a dedoo a tor la, maa tsua kwagh u u er a mbayev ou yô, sha kwagh u u nenge la.”
14 Tsô a lumun a mhen u ve due a mi la, nahan a kar ve ayange pue.
15 Ayange pue nga been yô, mluashe ve hemba doon shi ve hemba lun iyol gbur gbur a agumaior a a* lu yan akaayan a dedoo a tor la cii.
16 Tsô wanye la a tôô akaayan a ve a dedoo man wain ve la kera, a gema a na ve ikyaiue.
17 Nahan Aôndo u mimi la na agumaior a anyiin ne* mfe man mkav sha hanma kwaghngeren man kwaghfan cii; shi i na Daniel mkav sha hanma inja i mpase u sha mnenge man mnyamciem cii.+
18 Shighe u tor ver ér i va a ve hen a na+ la kom yô, orvesen u nengen sha mbaerentom hen ya u tor la va a ve sha ishigh ki Nebukadinesar.
19 Tor lamen a ve yô, a kav ér ken nongo la cii i zua a or môm u lun er Daniel man Hanania man Mishael man Asaria+ nahan ga; nahan ve za hemen u eren tom sha ishigh ki tor.
20 Hanma kwagh u tor una pine ve u i gbe u vea er tom a kwaghfan man mkav yô, a nenge ér ve hemba upristi mba eren ahir man mbaakombov+ mba ken tartor na cii kuma kwa pue.
21 Nahan Daniel lu her zan zan inyom i hiihii i Shirushi+ tema tor la.
Ngeren mba shin kpe
^ Shin “tempel u.”
^ Ka Babilonia je la.
^ Shin “tempel u.”
^ Zwa Heberu, “ônov mba Iserael.”
^ Zwa Heberu, “mbayev mba.”
^ Inja na yô ér, “Yehova Zungwem Mhôônom.”
^ Inja na yô ér, “Yehova Na Iwasen.”
^ Inja na a fatyô u lun, “Ka An Nan Lu Er Aôndo Nahana?”
^ Zwa Heberu, “ônov mba.”
^ Inja na yô ér, “Orjir Wam Ka Aôndo.”
^ Ka ati a ken Babilon je la.
^ Zwa Heberu, “Ne er ityough yagh kia ya ibo.”
^ Zwa Heberu, “mbayev mbagen.”
^ Zwa Heberu, “mbayev mba ve.”
^ Zwa Heberu, “mbayev mba ve.”
^ Zwa Heberu, “mbayev mba unyiin mban.”
