Daniel 10:1-21
10 Ken inyom i sha utar i hemen u Shirushi+ tor u Pershia la, i tese Daniel, un u i yilan un ér Beleteshasar+ la mpase; lu loho u mimi, u sha kwagh u ayôôso a vesen. A kav loho la, shi i na kav kwagh u nenge la.
2 Sha ayange la, mo Daniel m zungwe+ ukasua utar jimin.
3 M ya kwaghyan u dedoo ga, m ya inyam ga, m bende wain ken zwa ga, shi mkurem kpa m shighe iyol ga ukasua utar jimin.
4 Sha uwer u hiihii, ayange 24, er m tile hen kpe u zegeifi u Tigeri* la,+
5 m kenger sha yô, m nenge a or hua ikyondo i injaa iyol,+ gema lu a kwange u zanaria u ken Ufashi hen iwenge.
6 Iyol na engem er iwen i krisolati+ nahan, ishigh nagh lu er inyiar nahan, ashe a na lu er akagh a usu nahan, ave man angahar a na lu er togula u lun enge-enge-enge nahan,+ imo i akaaôron a na lu er imo i ikpelaior nahan.
7 Lu mo Daniel tseegh m nenge a mpase u sha mnenge la ye;+ ior mba ve lu vea mo la nenge a mpase u sha mnenge la ga. Nahan kpa, gema cier ve iyol je ve gbidye akarkase iyol, maa ve yevese ve za yer.
8 Tsô i undum, shi zum u m nenge mpase u sha mnenge ne la, tahav kera lu ken a mo ga shi mluashe wam u icivirigh la undum shi agee a am cii bee.+
9 Maa m ungwa imo i or nan lu lamen; kpa m ongo nan ngur lamen yô, m cir ishigh inya m gba mnyam mem mem.+
10 Kpa uwegh bende a mo,+ ku kpoghol mo, maa m naregh m gure m tuur ave man anu inya.
11 Tsô a kaa a mo ér:
“Daniel, we or u u gbe kwagh tsung ne,+ ver ishima sha mkaanem ma m soo u ôron we ne. Hegen yô, mough tile sha hen ijiir you, sha ci u i tindim hen a we.”
Ôron mo kwagh ne yô, m mough m tile sha, m lu gbidyen ikyarkyase iyol.
12 A gema a kaa a mo ér: “De cie ga,+ Daniel. Sha iyange i u hii nan ishima you wer u zua a mkav shi u hide a iyol you ijime sha ishigh ki Aôndo wou la je, i ungwa mkaanem ou, man ka sha ci u mkaanem ou mara m ve ye.+
13 Kpa orhemen+ u ken tartor u Pershia tile hendan kwagh a mo ayange 21. Kpa Mikael,*+ un u a lu môm ken mbahemenev mba hemban lun tagher tagher* la va u wasen mo; nahan m lu her vea utor mba Pershia.
14 M va mer me pase u kwagh u una er ior ou ken ayange a masejime la,+ sha ci u ka mpase u sha mnenge u una va kure sha ayange a a lu van ken hemen yô.”+
15 Ôron mo mkaanem man yô, m gema m cir ishigh inya, m lu ving.
16 Tsô kwagh u lun er or nahan bende a ityumbujôôgh yam,+ maa m bugh zwa m ôr a un u tile sha ishigh yagh la mer: “Terem, m ngu gbidyen ikyarkyase sha ci u mpase u sha mnenge la, shi m kera ngu a agee ga.+
17 Nahan wanye u terem una er nan ve una lam a tereme?+ Gadia hegen m ngu a agee ga, shi iôôn kera shi ken a mo ga.”+
18 Kwagh u lun er or nahan la shi bende a mo, maa a nam agee.+
19 Tsô a kaa ér: “De cie ga,+ we or u u gbe kwagh tsung ne.+ Bem a lu a we.+ Lu taveraa, een, lu taveraa.” Er lu lamen a mo la, m zua a agee, maa m kaa mer: “Terem a lam, sha ci u u nam agee.”
20 Maa a pinem ér: “U fa er i hii ve m ve hen a we kpa? M ngu hiden yemen hegen u za nôngon num a orhemen u Pershia.+ Me yemen yô, orhemen u Grika una va.
21 Nahan kpa, me ôr u akaa a i nger ken ungeren mba mimi yô. Or môm nan ngu suen mo taveraa ken akaa ne ga, saa Mikael,+ un u a lu orhemen wen la tseegh.+
