Daniel 8:1-27
8 Ken inyom i sha utar i hemen u Tor Beleshasar+ la, mo Daniel, m nenge mpase u sha mnenge ugen, zum u m nenge u hiihii la m bee kera yô.+
2 M nenge mpase u sha mnenge la, m nengen yô, m lu ken Shushan,*+ zegeiyou* u a lu hen kpentar* u Elam+ la; ken mpase u sha mnenge u m nenge la, m lu ikyua a kungwamnger u Ulai.
3 M kenden ashe sha yô, nenge! nomiyôngo+ tile hen kungwamnger la, lu a akor ahar.+ Akor a ahar la tav, kpa korough môm hemba taven a kugen; korough ku ku hemba taven la mase duen.+
4 M nenge nomiyôngo la, sa kwan lu yemen sha kume shin ityôtar man ken imbusutarimese kua ken imbusutariyan; inyamkyume i môm fatyô u tilen sha shigh nagh ga, shi or môm lu u nana fatyô u yiman ve sha uwegh nagh ga.+ I̱ lu eren er i soo la cii shi i kende a iyol i i̱ sha.
5 Er m lu kenger her la, nenge! kpev+ mough shin ityôtar* kar sha tar cii a u benden a inya shio. Kpev ne lu a korough tseer tseer hen atô u ashe a na.+
6 A lu van sha nomiyôngo u lun a akor ahar, u m nenge tile hen kungwamnger la; kpev ne lu yevese van sha a na sha ishimavihin tsung.
7 M nenge a lu van ikyua ikyua a nomiyôngo la, ishima vihi un a na tsung. A ta num sha nomiyôngo la a kever akor a na a ahar la, nahan nomiyôngo la kera lu a tahav mbu tilen nôngon kwagh a na ga. A ta nomiyôngo la inya, a ndyar un angahar, shi or môm lu u yiman un sha ikyev na ga.
8 Kpev la kende a iyol na sha je gande, kpa va lun a tahav je maa, i kever korough ku vesen kura; maa akor anyiin due tseer tseer sha ityough ki ku môm kura; a hôn sha ahumbe a anyiin a sha la.+
9 Korough kugen ku kiriki due ken môm ken akor la, ku vese ku taver iyol kpishi, ku hôn vegher u ken imbusutariyan man vegher u sha ityoughkitaregh kua vegher u Hwe* la.+
10 Ku vese ku taver zan zan je yô, ku za nyôr sha ikyum i usha, nahan ku na akaa agen ken ikyum la man asan agen gba shin tar, maa ku ndyar ve angahar.
11 Ku kende a iyol i ku sha, sha Orhemen u ikyum la je kpaa, shi i kar a kwagh u i eren ayange ayange la* hen a na kera, shi i yôhôr icighanjiir na u i we imaagh nagh gbang la i haa inya.+
12 Shi í na ikyum igen kera vea kwagh u i eren ayange ayange* la sha ci u tindi u peren; ku za hemen u ndyaren mimi inya, ku er kwagh er ku soo la cii, ku za ikyura.
13 M ungwa icighanor lu lamen, nahan icighanor ugen gema pine u lu lamen la ér: “Mpase u sha mnenge u kwagh u i eren ayange ayange* man u tindi u peren u ka a va a mtim la, una za hemen+ u nan ér i ndyar icighanjiir man akaa a ikyum la angahar a kuma shighe nan je?”
14 Tsô a kaa a mo ér: “Zan zan mbaaikighe man upepe 2,300 vea kar; nahan a hide a icighanjiir una lu er yange vande lun nahan kpee je.”
15 Er mo Daniel m lu nengen mpase u sha mnenge shi keren mer me kav un la, fese nahan m nenge kwagh u lun er or nahan tilem sha ishi.
16 Maa m ungwa imo i or hen atô u Ulai,+ nan yila genger genger, nan kaa ér: “Gaberiel,+ er or la a kav kwagh u a nenge la.”+
17 Tsô a va ikyua ape m tile la, kpa ve yô, cier mo iyol je m gba m cir ishigh inya. A kaa a mo er: “Wan u or, fa nahan wer mpase u sha mnenge la una kure sha shighe u mkur.”+
18 Kpa er lu lamen a mo la, m cir ishigh inya m gba mnyam mem mem. Tsô a kpoghor mo, a erem m mough m tile sha ape m vande tilen la.+
19 Maa a kaa ér: “Nenge m ngu nan mer fa kwagh u una er sha mkur u ishimavihin i Aôndo la, gadia ngi sha ci u shighe u mkur u i ver la.+
20 “Nomiyôngo u lun a akor ahar u u nenge a mi la, tile sha ityough ki tor u Media man tor u Pershia.+
21 Kpev u lun a ice iyol kpishi la, tile sha ityough ki tor u Grika;+ shi korough ku vesen ku ku lu hen atô u ashe a na la, tile sha ityough ki tor u hiihii la.+
22 Hide korough ku i kever ku, nahan akor anyiin due sha ityough ki ku la yô,+ ityartor inyiin ia mough hen ikyurior na ia tile sha, kpa ia lu a tahav er un nahan ga.
23 “Ken mkur u tartor ve la, er mbaperentindi vea per tindi zan zan a kuma ve la, tor ugen u cieryol u a kaven akaaôron a tsumen yô, una mough a tile sha.
24 Una lu a tahav mbu vesen, kpa a lu sha tahav nav ga. Una va a mtim sha gbenda u kpilighyol,* kwagh a za a na a doo shi una er kwagh a kure a zayol shio. Una va a ior mba ageev ken mtim, kua uicighanmbaiorov kpaa.+
25 Ka sha atseregh a na una er aie sha u una za ikyura ye; shi ka ken ishima na una kende a iyol na sha ye; shi una va a ior kpishi ken mtim hen shighe u bem.* Una mough a nôngo ityav a Orhemen u mbahemenev je kpaa; a kever un kera, kpa a lu sha uwegh ku orumace ga.
26 “Kwagh u i ôr ken mpase u sha mnenge, sha kwagh u mbaaikighe man upepe la ka mimi, kpa gba u u koso mpase u sha mnenge la una lu kwaghmyer, sha ci u ngu ôron kwagh u shighe u ayange a ken hemen ica.”+
27 Kpa mo Daniel yô, m vôr shi m gba angev ayange kpuaa.+ Maa m va mough sha m er tor tom;+ kpa kwagh u m nenge la na hingir mo hunduluu, shi or môm fatyô u kaven un ga.+
Ngeren mba shin kpe
^ Shin “Susa.”
^ Shin “iyou i tor; iyou i taver.”
^ Shin “ipyaventar.”
^ Shin “ape iyange i miren la.”
^ Shin “Mdoom.”
^ Shin “nagh ku i naan hanma shighe la.”
^ Shin “nagh ku i naan hanma shighe la.”
^ Shin “nagh ku i naan hanma shighe.”
^ Shin “una va a mtim u kpilighyol.”
^ Shin a fatyô u kaan ér, “a u tan icin shio.”
