Daniel 3:1-30
-
Eev mbu zanaria mbu Tor Nebukadinesar (1-7)
-
A kaa ér i civir eev mbura (4-6)
-
-
I sende Mbaheberu mba utar mbara ityough ér ve hemba ato (8-18)
-
“Se mba civir mbaaôndo ou ga” (18)
-
-
I kende ve ken usu u yeghen ibyugh ibyugh la (19-23)
-
I yima ve ken usu sha ivande (24-27)
-
Tor wuese Aôndo u Mbaheberu (28-30)
3 Tor Nebukadinesar er eev mbu zanaria, ityaven i mbu lu aseva 60,* igbanger i mbu gema lu aseva 6.* A tim mbu hen gburumaa u Dura, hen kpentar* u Babilon.
2 Tor Nebukadinesar maa tindi ér i za kaa ior mban ve kohol imôngo, lu utyombaiorov man mbahemenior man ugomna man mbawan ior kwagh man mbanengen sha inyar man mbaajiriv man mbaatindiv kua mbavesen mba nengen sha ikpentar* la cii ér, ve va tsegha eev mbu Tor Nebukadinesar tim la.
3 Tsô utyombaiorov man mbahemenior man ugomna man mbawan ior kwagh man mbanengen sha inyar man mbaajiriv man mbaatindiv kua mbavesen mba nengen sha ikpentar* la cii, ve va kohol imôngo u tseghan eev mbu Tor Nebukadinesar tim la. Ve tile sha ishigh ki eev mbu Nebukadinesar tim la.
4 Mbazanaloho yôô genger genger ér: “Ne ior man akuraior kua ior mba lamen ijô kposo kposo, mba kaan a ven nahan
5 ér, shighe u ne ungwa imo i korough man imar i kiriki man molo man adiguve u lun azongo atar man kwaghkuhwan u lun a ikyar man imar i vesen kua akaa a kuhwan kwagh agen cii yô, gure nen inya kpee, civir nen eev mbu zanaria mbu Tor Nebukadinesar a tim la.
6 Hanma or u nana gure inya nana civir eev mbura ga cii yô, fese je a kende nan ken atse a usu u yeghen ibyugh ibyugh la.”+
7 Tsô ior cii mba ongo imo i korough man imar i kiriki man molo man adiguve u lun azongo atar, man kwaghkuhwan u lun a ikyar, kua akaa a kuhwan kwagh agen cii yô, ior man akuraior kua mbalamen ijô kposo kposo cii, gure inya civir eev mbu zanaria mbu Tor Nebukadinesar tim la.
8 Hen shighe la, Mbakaldi mbagen va va yila Mbayuda mbara ijir.*
9 Ve kaa a Tor Nebukadinesar ér: “Tor a lu uma gbem.
10 Ka we tor je yange u kaa wer hanma or u nana ungwa imo i korough man imar i kiriki man molo man adiguve u lun azongo atar, man kwaghkuhwan u lun a ikyar, man imar i vesen kua akaa a kuhwan kwagh agen cii yô, nana gure inya nana civir eev mbu zanaria mbura ye;
11 shi wer, hanma or u nana gure inya nana civir mbu ga yô, i kende nan ken atse a usu u yeghen ibyugh ibyugh la ye.+
12 Kpa Mbayuda mbagen mba, mba u tsough ve wer ve nengen sha kpentar* u Babilon yô, ka: Shaderaki man Meshaki kua Abedinego+ je la. Nomsombaiorov mban mba a icivir sha a we ga, tor. Mba civir mbaaôndo ou ga, shi ve venda u civir eev mbu zanaria mbu u tim la.”
13 Nahan ishima vihi Nebukadinesar pev, maa a na zwa ér i za va a Shaderaki man Meshaki kua Abedinego. Tsô i va a nomsombaiorov mban sha ishigh ki tor.
14 Nebukadinesar gema kaa a ve ér: “Mimi mimi je, we Shaderaki man Meshaki kua Abedinego, ne mba civir mbaaôndo av ga,+ shi ne venda u civir eev mbu zanaria mbu m tim laa?
15 Hegen yô, aluer ne ungwa imo i korough man imar i kiriki man molo man adiguve u lun azongo atar, man kwaghkuhwan u lun a ikyar, man imar i vesen kua akaa a kuhwan kwagh agen cii, nahan ne kegh iyol u guren inya civir eev mbu m er la yô, doo. Kpa aluer ne venda u civir eev mbura yô, fese je a kende ne ken atse a usu u yeghen ibyugh ibyugh la. Nahan ka aôndo u han una fatyô u yiman ne sha ikyev yama?”+
16 Shaderaki man Meshaki kua Abedinego gema kaa a tor ér: “We Nebukadinesar, se mba a ityôkyaa i lamen a we sha ikyaa ne ga.
17 Aluer gba u a kende se ken atse la yô, Aôndo wase u se civir la una fatyô u yiman se ken atse a usu u yeghen ibyugh ibyugh la, shi una yima se sha ikyev you,+ tor.
18 Kpa aluer a yima se ga je kpa, we tor, fa wer, se mba civir mbaaôndo ou ga, shi eev mbu zanaria mbu u tim la kpa, se mba civir mbu ga.”+
19 Nahan ishima vihi Nebukadinesar a Shaderaki man Meshaki kua Abedinego pev, je yô, a vihi ishigh sha a ve,* maa a na wada ér, i kende usu u ken atse la i tsee i hemba er i vanden lun la kwa taankaruhar.
20 Tsô a na nomsombaiorov mba ageev mba ken ikyumutya na mbagen wada ér ve kange Shaderaki man Meshaki kua Abedinego, ve kende ken atse a usu u yeghen ibyugh ibyugh la.
21 Tsô i kange nomsombaiorov mban a akondo a ve haa iyol la, man akondo a ve hua man ader a ve cir kua akondo a ve agen cii, maa ve kende ve ken atse a usu u yeghen ibyugh ibyugh la.
22 Kpa er tor na wada taver taver, shi atse la tsee hemba er a vanden tseen la yô, iniombor i usu la wua ior mba ve kôr Shaderaki man Meshaki kua Abedinego ve kende ken atse a usu u yeghen ibyugh ibyugh la.
23 Kpa nomsombaiorov mba utar mban, Shaderaki man Meshaki kua Abedinego, gba ken atse a usu u yeghen ibyugh ibyugh la a ikyangenev iyol.
24 Maa cier Tor Nebukadinesar iyol tsung, a kighir a mough fese, a pine mbatomov nav mba tagher tagher ér: “Ka iorov utar se kange se kende ken usu gaa?” Ve gema ve kaa a tor ér: “Een, ka nahan tor.”
25 Kpa a kaa a ve ér: “Nenge nen yôô! M nenge a iorov unyiin mba zenden garemaa ken atô u usu la, man kwagh môm er ve ga; or u sha unyiin la ngu er wan u mbaaôndo nahan.”
26 Tsô Nebukadinesar kporom za hen hunda u atse a usu u u lu yeghen ibyugh ibyugh la za kaa ér: “Shaderaki, Meshaki man Abedinego, ne mbatomov mba Aôndo u Hemban Cii,+ due va nen heen!” Maa Shaderaki man Meshaki kua Abedinego due ken usu shon kera.
27 Nahan utyombaiorov man mbahemenior man ugomna kua mbatomov mba tagher tagher mba tor mba ve kohol imôngo her la,+ nenge er usu la bende a* ayol a nomsombaiorov mban ga yô;+ ice i sha ityouv vev anger ga, akondo a ve haa iyol la gema ga, shi mnyim ma usugh tsô kpa huma ve iyol ga.
28 Tsô Nebukadinesar kaa ér: “I wuese Aôndo u Shaderaki man Meshaki kua Abedinego,+ un u a tindi ortyom na a va yem mbatomov nav la. Ve suur sha a na, ve ungwa wada u tor ga, shi ve kegh iyol u kpen,* ve venda u eren aôndo ugen tom shin civir un, saa Aôndo ve tseegh.+
29 Nahan yô, m ngu wan tindi mer, aluer ma ior shin ikyurior gayô mbalamen ma zwa ôr kwagh u dang sha Aôndo u Shaderaki man Meshaki kua Abedinego yô, i bur ve aci aci, shi i gema uya vev i hingir ajiir a ior zan akôngo her;* sha ci u Aôndo ugen ngu u una fatyô u yiman er ngun nahan ga.”+
30 Tor maa ver Shaderaki man Meshaki kua Abedinego sha iantom i vesen hen kpentar* u Babilon.+
Ngeren mba shin kpe
^ Nôngo u kuman umita 27 (angahar 88). Nenge Ngeren u Seer u B14 la.
^ Nôngo u kuman umita 2.7 (angahar 8.8). Nenge Ngeren u Seer u B14 la.
^ Shin “ipyaventar.”
^ Shin “uipyaventar.”
^ Shin “uipyaventar.”
^ Shin “sende Mbayuda mbara ityough.”
^ Shin “ipyaventar.”
^ Shin “ieren na a ve gema vindi vindi.”
^ Shin “lu a tahav sha.”
^ Shin “shi ve wa ayol a ve ikyo ga.”
^ Shin a fatyô u kaan ér, “ajiir a haan ihyôghonov; agungu a ambi a uile.”
^ Shin “ipyaventar.”
