Daniel 6:1-28
6 Dariu nenge yô, doo un u tsuan utyombaiorov 120 veren sha tartor la cii.+
2 Mbatomov mba tagher tagher utar lu hemen ve. Daniel+ lu môm ken a ve. Utyombaiorov+ mbara ve va na ve ibaver sha er kwagh a saa tor ga yô.
3 Daniel due kposo a mbatomov mba tagher tagher man utyombaiorov mbagen mbara, sha ci u jijingi u kpilighyol lu ken a na,+ nahan tor wa ishima u veren un sha iantom i vesen ken tartor la cii.
4 Hen shighe la, mbatomov mba tagher tagher man utyombaiorov mbara lu keren atôakyaa a vea sende Daniel ityough sha akaa a ken tartor la yô. Kpa ve fatyô u zuan a atôakyaa a vea sende un ityough shin vea tese ér a ban a mimi iyol ga, sha ci u i na un jighjigh shi nengen tom na beelee ga, shi ieren i icughugh kpa i zua a mi ken a na ga.
5 Maa nomsombaiorov mbara kaa ér: “Se fatyô u zuan a atôakyaa a se sende Daniel ne ityough cuku tsô kpaa ga, saa sha kwagh u tindi u Aôndo na di je.”+
6 Tsô mbatomov mba tagher tagher man utyombaiorov mban kohol imôngo za hen tor za kaa a na ér: “Tor Dariu a lu uma gbem sha won.
7 Mbavesen mbaeren tom hen ya u tor cii man mbahemenior man utyombaiorov man mbatomov mba tagher tagher mbaeren tom hen ya u tor kua ugomna, ve za idyu imôngo ér tor a wa tindi shi a wa atabam ér, aluer ken atô u ayange 30, or zamber ma aôndo shin ma or kwagh, kera ka we tor ga yô, i kende nan shin ihyungwa i ubegha.+
8 Hegen yô, tor, ma u we tindi, ma u we uwegh+ sha er a fatyô u geman un ga yô, u zuan sha tindi u Mbamede man Mbapershia, u a fatyô u geman un ga la yô.”+
9 Tsô Tor Dariu wa uwegh shin tindi man atabam la.
10 Kpa Daniel fe ér i wa tindi, i wa uwegh yô, fese je a yem hen ya na, u i bugh uwindou mba kpoyou u i u sha i ver ivegher, vegher u Yerusalem la.+ Shi a gure anu inya kwa tar ken iyange, a er msen, a na iwuese sha ishigh ki Aôndo na, er vanden eren cii man shighe ne nahan.
11 Hen shighe la, nomsombaiorov mbara va nyôr gagher, nenge Daniel lu zamber shi sônon sha ishigh ki Aôndo ér a zungwe un mhôônom.
12 Tsô ve za hen tor ve za umbur un kwagh u atabam u wa la, ve kaa ér: “Ka we yange u wa atabam, u wa uwegh shimi u kaa wer ken atô u ayange 30, aluer ma or nan zamber ma aôndo shin orgen kwagh kera ka we ga yô, tor, i kende nan shin ihyungwa i ubegha gaa?” Tor gema kaa ér: “Een kape i lu je la, vough er tindi u Mbamede man Mbapershia u a gem ga la a tese nahan.”+
13 Fese je ve kaa a tor ér; “Daniel, un u a lu môm ken Mbayuda mba i ve a ve uikyangen la+ ngu a icivir sha a we shin sha atabam u u we shi u we uwegh shimi la ga tor, kpa ka a er msen kwa tar ken iyange.”+
14 Tor ongo kwagh ne yô, fese je ishima za un iyol tsung. Nahan a nôngo, a hen sha gbenda u una yima Daniel yô. A nôngo sha hanma gbenda ér una war un zan zan iyange kar miren.
15 Ken masejime yô, ior mbara kohol imôngo nyôr za hen tor, za kaa a tor ér: “Tor a umbur nahan ér, tindi u Mbamede man Mbapershia yô ér, hanma atabam shin tindi u tor a we yô, a fatyô u geman un ga.”+
16 Tsô tor na wada, i za va a Daniel, i va kende un shin ihyungwa i ubegha.+ Tor kaa a Daniel ér, “Aôndo wou u u civir un hanma shighe la una yima u.”
17 Maa i va a iwen, i va cir sha zwa u ihyungwa la. Shi tor ver ikyav sha mi a kunya na u ken uwe, man a kunya u ken uwe u ashagbaaior a na, sha er kwagh môm una fatyô u geman sha kwagh u Daniel ga yô.
18 Tor maa yem hen ya na u tor. A hôr kwaghyan tugh mbura. A venda hanma msaanyol cii,* shi a fatyô u yaven ga.*
19 Ka va kom sha use dindee yô, tor mough gba zan ayem hen ihyungwa i ubegha la.
20 Za zurum ikyua a ihyungwa la yô, a yila Daniel sha ikyenge i zunguluu. Tor pine Daniel ér: “Daniel, ortom u Aôndo u uma, Aôndo wou u u civir un hanma shighe la fatyô u yiman we sha ikyev i ubegha je kpa?”
21 Fese je Daniel kaa a tor ér: “Tor a lu uma gbem.
22 Aôndo wam tindi ortyom na va cir ubegha ijô,+ nahan ve erem kwagh ga,+ sha ci u i zuam a ibo sha ishigh nagh ga, shi m er u kwaghbo môm ga, tor.”
23 Saan tor iyol tsung, nahan a na zwa ér i dugh Daniel shin ihyungwa la kera. Kwagh môm er Daniel shighe u i dugh un shin ihyungwa la ga, sha ci u suur sha Aôndo na.+
24 Tor maa na wada, i va a nomsombaiorov mba ve sende Daniel ityough la,* nahan i kende ve shin ihyungwa i ubegha vea ônov vev man kasev vev. Ve lu a nyôr shin mkur u ihyungwa la ga je tsô, ubegha hemba ve agee, hembe akuhe a ve cii.+
25 Tsô Tor Dariu nger hen ior man akuraior kua mbalamen ijô kposo kposo cii mba ve lu sha tar cii+ la ér: “Bem wen a ngee kpishi!
26 M ngu nan wada nahan mer, hen hanma vegher u tartor wam cii, ior ve gbidye akarkase iyol sha mcie sha ishigh ki Aôndo u Daniel.+ Gadia un ngu Aôndo u uma, shi una lu uma gbem sha won. Mayange a tim tartor na kera ga, shi hemen na kpa ka u tsôron.+
27 Ka a yima+ shi a war, shi a er akav man akaa a kpilighyol, sha man shin tar,+ sha ci u a yima Daniel sha akughur a ubegha.”
28 Daniel ne za ikyura ken tartor u Dariu+ man ken tartor u Shirushi Orpershia la.+
