Daniel 2:1-49
-
Mnyam cier Nebukadinesar, ishima za un iyol (1-4)
-
Orfankwagh môm fatyô u ôron mnyam mara ga (5-13)
-
Daniel ker iwasen hen Aôndo (14-18)
-
I wuese Aôndo er a pase kwaghmyer la yô (19-23)
-
Daniel ôr tor mnyam mara (24-35)
-
I pase inja i mnyam mara (36-45)
-
Iwen i tartor la hembe eev mbura avur avur (44, 45)
-
-
Tor na Daniel icivir (46-49)
2 Ken inyom i sha uhar i hemen u Nebukadinesar la, mnyam cier un atô kposo kposo, nahan ishima za un iyol je+ fatyô u yaven ga.
2 Tsô tor na zwa i yila upristi mba eren ahir man mbaakombov man mbasôronakombo kua Mbakaldi* ér ve va pase tor mnyam nam. Nahan ve nyôr ve za tile sha ishigh ki tor.+
3 Maa tor kaa a ve ér: “Mnyam cier mo, nahan ishima zam iyol sha ci u m soo u fan mnyam ma ma cier mo la.”
4 Mbakaldi kaa a tor ken zwa Aram*+ ér: “Tor a lu uma gbem. Ôr mbatomov ou mnyam ma shon, nahan se pase u inja i ma.”
5 Tso tor kaa a Mbakaldi ér: “Ka kwaghôron wam u masetyô je ne: Aluer ne ôrom mnyam mara kua inja i ma ga yô, a bur ne aci aci shi a gema uya enev vea hingir ajiir a ior zan akôngo her.*
6 Kpa aluer ne ôrom mnyam mara kua inja i ma yô, me na ne uiyua man injar man icivir kpishi.+ Nahan ôrom nen mnyam mara kua inja i ma.”
7 Tsô ve ôr sha kwa har er: “Tor a̱ ôr mbatomov nav mnyam mara, nahan se pase inja i ma.”
8 Tor gema kaa ér: “M fa dedoo je mer ne mba nôngon ner ne yam shighe, sha ci u ne fa kwaghôron wam u masetyô.
9 Aluer ne ôrom mnyam mara ga yô, ka mtsaha môm me na ne cii ye. Kpa ne zua zwa ner ne ôrom kwagh u aiegh man u icughugh zan zan kwagh a kar geman. Yô, ôrom nen mnyam mara, nahan me fa je mer ne fatyô u pasen inja i ma.”
10 Mbakaldi maa kaa a tor ér: “Or môm ngu shin tar u nana fatyô u eren kwagh u tor a kaa la ga, sha ci u ma zegetor shin gomna môm nan ngu a kaa a ma pristi u eren ahir shin orakombo shin Orkaldi ér nana̱ er imbakwagh la ga.
11 Kwagh u tor a kaa ér i er la taver, shi or môm ngu u nana fatyô u ôron tor kwagh ne ga, saa mbaaôndo mba ve tem imôngo vea uumace ga la tseegh.”
12 Tsô ishima vihi tor pev, nahan a na wada ér i tim mbafankwagh mba ken Babilon cii.+
13 Mba ne wada la, shi mba ngur nôngon u wuan mbafankwagh mbara yô, Daniel man azende a na kpa i ker ve sha u a wua ve yô.
14 Hen shighe la, Daniel lam a Arioki, orvesen u mbakuran tor, u due u za wuan mbafankwagh mba ken Babilon la sha kwaghfan man sha mkav.
15 A pine Arioki, ortom u tor u tagher tagher la ér: “Er nan tor a ne wada i taver yum nahana?” Arioki maa ôr Daniel kwagh sha ikyaa ne.+
16 Tsô Daniel nyôr za kaa a tor ér a̱ na un ian una pase tor inja i mnyam mara.
17 Daniel maa yem hen ya na za ôr azende a na, Hanania man Mishael kua Asaria kwagh la.
18 A kaa a ve ér ve̱ er msen hen Aôndo u sha, a̱ zungwe ve mhôônom sha kwaghmyer ne, sha er a tim Daniel man azende a na, vea mbafankwagh mba ken Babilon cii ga yô.
19 Tsô i pase Daniel kwaghmyer la ken mpase u sha mnenge tugh.+ Nahan Daniel wuese Aôndo u sha.
20 Daniel kaa ér:
“I̱ wuese iti i Aôndo gbem sha won,*Sha ci u ka un tswen a lu a kwaghfan man agee ye.+
21 Ka a gema ashighe man aaven,+Ka a dugh utor kera shi a ver utor,+Ka a na mbafankwagh kwaghfan shi a na mbalun a mkav mfe.+
22 Ka a pase akaa a zan shimi man akaa a ken myer,+Ka a fa kwagh u ken ime+Shi iwanger ngi a na.+
23 M na u ishughun man iwuese, we Aôndo u uter av,Sha ci u u nam kwaghfan man tahav,Shi hegen u pasem kwagh u se sen u la;U pase se zayol u tor.”+
24 Daniel maa nyôr za hen Arioki, un u tor tsua un ér a tim mbafankwagh mba ken Babilon la,+ a za kaa a na ér: “De timin mbafankwagh mba ken Babilon ga; tôôm za a mo sha ishigh ki tor, nahan me za pase tor inja i mnyam mara.”
25 Fese je Arioki tôô Daniel za a mi sha ishigh ki tor za kaa a na ér: “M zua a or ken Mbayuda mba i ve a ve uikyangen ne,+ u nana fatyô u pasen tor inja i mnyam nam yô.”
26 Tor maa pine Daniel, un u i yilan un ér Beleteshasar+ la ér: “Mimi je u fatyô u ôron mo mnyam ma ma cier mo la shi pasen inja i maa?”+
27 Daniel gema kaa a tor ér: “Or môm ken mbafankwagh shin mbaakombov shin upristi mba eren ahir, gayô mbanengenasan, nana fatyô u ôron tor kwaghmyer u a lu pinen la ga.+
28 Kpa Aôndo ngu sha, u a lu Orpasenakaamyer yô;+ nahan a pase tor Nebukadinesar kwagh u una er ken ayange a masejime yô. Ka mnyam ou, man mbampase mba sha mnenge mba ken ityough you shighe u u yav sha gambe wou la je ne:
29 “We yô, tor, shighe u u yav sha gambe wou la, mbamhen ou gema yem sha kwagh u una er ken hemen la, nahan Orpasenakaamyer la pase u kwagh u una er yô.
30 Mo yô, i pasem kwaghmyer ne sha ci u m hemba ngun a kwaghfan a orumace ugen yum ga; kpa lu sha u a pase tor inja i mnyam mara, sha er u fa mbamhen mba ken ishima you yô.+
31 “We tor, u lu kenger, maa u nenge a zege eev mbugen. Eev mbu mbu lu zegenan shi mbu engem tsung la tile sha ishigh you, mluashe u mbu cieryol.
32 Ityough ki eev mbura lu zanaria u dedoo,+ vanger man ave a mbu lu azurufa,+ iyav man anam a mbu lu togula,+
33 angahar a mbu lu iyôgh,+ ikpandeangahar a mbu di lu iyôgh nungwa inyatyuu.*+
34 U kenger her zan zan iwen bugh, lu ave a or bugh i ga, i va ta sha ikpandeangahar i eev mbura, i i lu iyôgh man inyatyuu la hembe ve avur avur.+
35 Hen shighe la, iyôgh man inyatyuu man togula man azurufa kua zanaria la cii hembe avur avur, hingir er imough i sha vande u gbidyen iyiav inyom nahan. Maa ahumbe kura ve yem a mi kera, je yô, ivurugh kpa i kera nenge a mi ga. Kpa iwen i i ta sha eev mbura la yô, hingir zegewo iv tar cii.
36 “Ka mnyam mara je ne, nahan hegen se pase tor inja i ma.
37 We tor, we u u lu tor u utor, u Aôndo u sha a ne u tartor+ man agee man tahav kua icivir,
38 shi a we u ior sha ikyev ape ve lu la cii, kua annyamev mba ken toho man annyonov mba sha kwavaôndo, shi a ver u tor sha a ve cii la+—ka we u lu ityough ki zanaria la ye.+
39 “Kpa u karen kera yô, tartor ugen ua va,+ u ua yina sha a we yô; maa tartor ugen, u sha utar, u togula, ua hemen tar cii.+
40 “Hide tartor u sha unyiin la yô, ua taver er iyôgh nahan.+ Gadia er iyôgh ka ki njighe kwagh shi ki wua hanma kwagh a hingir vue, een, er iyôgh ka ki hembe kwagh avur avur nahan, ua njighe shi ua hembe akaa ne cii avur avur.+
41 “Shi er u nenge ikpandeangahar man ahôangahar a i nongo inyatyuu i ormaantyegh man iyôgh la nahan, tartor la ua pav ker, kpa an-mtaver u iyôgh una lu ker, vough er u nenge iyôgh ki nongo sha inyatyuu i taver ga nahan.
42 Shi er u nenge ahôangahar la a lu iyôgh man inyatyuu nahan, kape vegher u tartor la u môm una taver, ugen la una taver ga je la.
43 Vough er u nenge iyôgh ki nongo sha inyatyuu i taver ga nahan, vea nungwa a ior;* kpa vea var ayol a ve ga, er iyôgh ki varen sha inyatyuu ga nahan.
44 “Sha ayange a utor mbara, Aôndo u sha una ver tartor ugen+ u mayange a tim u kera ga yô,+ shi a gema tartor la a na sha ikyev i ior mbagen ga.+ Ua hembe ityartor igen ne cii, ua bee a i kera,+ nahan a lu u tseegh ua lu* gbem sha won ye,+
45 vough er u nenge iwen bugh sha uwo, lu ave a or bugh i ga, i va hembe iyôgh man togula man inyatyuu man azurufa kua zanaria+ la nahan. Aôndo u Hemban Cii pase tor kwagh u una er ken hemen yô.+ Mnyam mara ka ma mimi shi mpase u ma kpa kuma u nan un jighjigh.”
46 Tor Nebukadinesar maa sen yav cir ishigh inya sha ishigh ki Daniel, na un icivir. Shi a na wada ér i na un iyua shi i nande un insensi.
47 Tor kaa a Daniel ér “Mimi je, Aôndo wou ka Aôndo u mbaaôndo man Ter u utor kua Orpasenakaamyer, sha ci u u fatyô u pasen kwaghmyer ne.”+
48 Nahan tor kende a Daniel sha, shi na un uiyua mba dedoo kpishi. A er un a hingir tor u hemen kpentar* u Babilon cii,+ man orhemen u vesen u ior mbafan kwagh mba ken Babilon cii.
49 Tor tsua Shaderaki man Meshaki kua Abedinego+ ver ve ér ve nengen sha kpentar* u Babilon er Daniel sôn nahan; kpa Daniel yô, lu eren tom hen ya u tor.
Ngeren mba shin kpe
^ Ka nongo u mba ve fe u kpehen ishor tsema tsema shi nengen asan je la.
^ Yange i hii ngeren Da 2:4b zan zan 7:28 ken zwa Aram.
^ Shin a fatyô u kaan ér, “ajiir a haan ihyôghonov; agungu a ambi a uile.”
^ Shin “Gbem sha won zan zan gbem sha won.”
^ Shin “inyatyuu i nanden.”
^ Shin “ônov mba uumace,” ka ior cii je la.
^ Shin “tile.”
^ Shin “ipyaventar.”
^ Shin “ipyaventar.”
