Sha Uwegh ku Mateu 9:1-38
9 Tsô a nyôr tso, a per a yem ken gar na.+
2 Maa ior mbagenev tôô orkpenalegh sha gambe va a mi hen a na. Yesu nengen er ve na jighjigh yô, a kaa a orkpenalegh la ér: “Taver ishima, wan wam! I de u asorabo a ou.”+
3 Nahan mbangeren mbagenev gba kaan ken asema a ve ér: “Or ne ngu lahan Aôndo.”
4 Er Yesu fa mbamhen vev mbara yô, a kaa ér: “Ka nyi man ne henen aferakaa ken asema a en nahana?+
5 Ka nyi i hembe lun zange u ôrono? Ka u kaan ér, ‘I de u asorabo a ou,’ shin ka u kaan ér, ‘Mough sha zende’?+
6 Kpa ka sha u fa nen ner Wan u or ngu a tahav shin tar mbu den ior asorabo . . .” maa a kaa a orkpenalegh la ér: “Mough sha, tôô gambe wou, yem ken ya wou.”+
7 Tsô a kighir a mough, a yem ken ya na.
8 Ikpelaior la nengen nahan yô, mciem gba ve iyol, ve gba wuese Aôndo, u a ne uumace imba utaha ngila nahan la.
9 Yesu moughon heela ngur yemen yô, a nenge a orgen tema hen iyou i ngohol kpandegh, i yilan iti na ér Mateu. Maa a kaa a na ér: “Dondom.” Tsô a mough a dondo un.+
10 Yesu va ngur yan kwaghyan ken iyou vea mbahenen nav yô, mbangoholkpandegh man mbaasorabo kpishi gba va yan kwagh vea ve.+
11 Kpa Mbafarishi mba nengen nahan yô, ve pine mbahenen nav ér: “Er nan ortesen wen a ye kwagh vea mbangoholkpandegh man mbaasorabo?”+
12 Ungwan nahan yô, a kaa ér: “Ka mba ve lu gbong gbong la kwagh a gbe ve a ortwer ga, kpa ka mba ve lu uange la kwagh a gbe ve a ortwer ye.+
13 Yô, yem za hen nen sha inja i mkaanem man: ‘M soo mhôônom ma zungwen, ka iniav mbi nanden ga.’+ Gadia m va ka u yilan mbaperapera ga, kpa ka mbaasorabo.”
14 Tsô mbahenen mba Yohane va hen a na, va pine un ér: “Er nan man se kua Mbafarishi se hôron kwaghyan, kpa mbahenen ou yô ve hôron kwaghyan ga?”+
15 Yesu kaa a ve ér: “Azende a orkwasehe nga a ityôkyaa i zungwen shighe u orkwasehe+ a lu vea ve imôngo la ga, shin ka nahan ga? Kpa shighe ngu van u a va tôô orkwasehe hen a ve kera yô.+ Ka hen shighe la vea hôr kwaghyan ye.
16 Mba tee bamberkyondo u he mba we paci a mi sha ikyondo i tse ga, gayô ikyondo i he la ia urugh ikyondo i tse la, nahan ia ande a hemba ave a tse.+
17 Shi mba hee wain u he ken akpaakôvough a tse kpaa ga. Aluer i er nahan yô, akpaakôvough la aa pav, nahan wain una haa, shi akpaakôvough la kpa aa saa ishe. Kpa ka i haa wain u he ken akpaakôvough a he, nahan ve cii ve lu her dedoo.”
18 Er lu ôron ve akaa ne zan a mi ave la, orhemen ugen va gure un inya kaa a na ér: “Hegen nahan wan wam u kwase una kpe. Kpa va penda uwegh ough sha a na, tsô una nder.”+
19 Tsô Yesu mough vea mbahenen nav dondo un ijime.
20 Nahan kwase ugen u lu a angev mbu haan awambe shi ya ican a mbu anyom 12 yô,+ za va un ken ijime, va bende a tsumbur u ikyondo na.+
21 Lu kaan ken ishima na ér: “Aluer m bende a ikyondo i a hee iyol la tseegh kpa, angev av mbua bee.”
22 Yesu gem nengen a na yô, a kaa ér: “Taver ishima, wan wam! Ka sha jighjigh u nan wou angev ou mbu bee ye.”+ Nahan her ave ave* je, angev mbu kwase la bee.+
23 Yesu va nyer hen ya u orhemen la yô, a nenge a mbatôngonimar, shi a nenge ikpelaior lu vaan genger genger.+
24 Maa a kaa ér: “Due nen ken won; wankwase ne kpe ga, ka mnyam a lu yaven ye.”+ Tsô ve gba sen un ibumegh.
25 Kaan ikpelaior la i duen ken won je maa, a nyôr a za kôr wankwase la sha uwe,+ maa wankwase la mough tema sha.+
26 Nahan ior ungwa kwagh ne hen ningir la cii.
27 Yesu karen heela ngur yemen yô, mbaapirashe uhar+ dondo un ijime gba ôron genger genger ér: “Zungwe se mhôônom, Wan u Davidi.”
28 Nyer ken iyou yô, mbaapirashe mbara va hen a na. Tsô Yesu pine ve ér: “Ne na jighjigh ner me fatyô u eren kwagh nee?”+ Ve kaa a na ér: “Een, Tere, se na jighjigh.”
29 Maa a za ave a bende ve sha ashe,+ a kaa ér: “I er ne vough er ne ne jighjigh nahan.”
30 Maa ve hii u nengen kera. Kpa Yesu ta ve icin gbang gbang kaa ér: “Nenge, de ôron nen or môm kwagh ne ga.”+
31 Kpa mba duen ken won yô, ve za ôr ior kpishi mba hen haregh la kwagh na.
32 Mba ngur yemen yô, i va un a orkondonikyer u azôv nzughul a na yô.+
33 Zendan azôv la kera yô, orkondonikyer la maa lam.+ Nahan kpiligh ikpelaior la iyol, ve kaa ér: “I gbe je kpa imbakwagh ne ngi a er ken Iserael ga.”+
34 Kpa Mbafarishi lu kaan ér: “Ka sha tahav mbu tor u azôv a dughun ujijingi mba bov ye.”+
35 Tsô Yesu due gba zenden zan sha agar a vesen man a kiriki cii. Lu tesen ken ushinagoge shi pasen loho u dedoo u Tartor u Aôndo, shi been ior hanma inja i uange kua hanma inja i mkpeyolga* cii.+
36 Nengen a ikpelaior yô, kunya kôr un a ve,+ sha ci u i nzughul a ve i kende, er iyôngo i i lu a or u kuran i ga nahan.+
37 Maa a kaa a mbahenen nav ér: “Sha kpôô yô, sunda ngee, kpa mbasundan mba di kpuaa tsô.+
38 Nahan yô, zamber nen Ter u sunda, a tindi mbatomov ken sunda na.”+
