Sha Uwegh ku Mateu 18:1-35

KUHWA

Or u hemban ken Tartor (1-6)
Akaa a nan gbeev mbu nôngon (7-11)
Injakwagh i iyôngo i̱ i̱ saa yô (12-14)
Er a wase anmgbian nana hide sha gbenda u vough yô (15-20)
Injakwagh i kpan u de or a injô ga yô (21-35)

18 Tsô hen shighe la mbahenen va, va pine Yesu ér: “Ka an jim nan hembe ken Tartor u sha?”+ ² Maa a yila wanye u cuku va tile hen atô ve. ³ A kaa ér: “Mimi je me kaa ne, saa ne gema mhen wen ne hingir er mbayev mba kiriki nahan,+ gayô mayange je ne nyôr ken Tartor u sha ga.+ ⁴ Sha nahan yô, hanma or u nana hide a iyol i nan ijime nana lu er wan u cuku ne nahan yô, ka nan je nan hembe ken Tartor u sha ye.+ ⁵ Man hanma or u nana ngohol wanye u cuku er ngun nahan ken iti yam yô, ka mo je nan ngohol ye. ⁶ Kpa hanma or u nana na môm ken mbakiriki mba ve nem jighjigh la gbeev mbu nôngon yô, guda u ma i zer imbaor la zegenase sha mon, ma i gbihi nan shin zegemnger u a ze kpishi yô.+ ⁷ “Kwagh a tser ior i tar ne sha ci u akaa a nan gbeev mbu nôngon! Ka keng, akaa a nan gbeev mbu nôngon aa va, kpa kwagh a tser or u nana va a kwagh u nan gbeev mbu nôngon la! ⁸ Nahan aluer uwegh ough shin nguhar wou ku nan we gbeev mbu nôngon yô, tôndo ku ta kera.+ Guda war a uwegh môm shin nguhar môm, a u i gbihi u a ave ou ahar shin angahar a ou ahar cii ken usu u pirin mayange ga* la.+ ⁹ Shi aluer ishe you ngi nan we gbeev mbu nôngon yô, dugh i ta kera. Guda war a ishe i môm, a u i gbihi u a ashe ou ahar cii ken usu u Gehena* la.+ ¹⁰ Ver nen ishima sha er ne laha môm ken mbakiriki mban ga yô. Gadia m ngu kaan ne, mbatyomov mba shaav mba ve nengen sha a ve la mba nengen a ishigh ki Terem u a lu sha la hanma shighe cii.+ ¹¹ * —— ¹² “Ne nenge nena? Aluer or ngu a iyôngo 100 man iyôngo i môm ker tsume yô,+ nana kera undu i 99 la sha iwo, nana yem a za ker i môm i̱ i̱ tsum la gaa?+ ¹³ Man aluer nan za zua a i̱ yô, mimi je me kaa ne, nana hemba ember sha kwagh u i̱, a i 99 i i tsum ga la. ¹⁴ Kape Terem* u a lu sha la kpa i sar un u môm ken mbakiriki mban tsô kpa nana tim ga je la.+ ¹⁵ “Man shi aluer anmgbian wou nan er u kwaghbo yô, za pase nan ibo i nan,* we vea nan tseegh.+ Aluer nan kegh ato a we yô, u wase anmgbian wou la hide sha gbenda u vough je ve.+ ¹⁶ Kpa aluer nan venda u keghen ato a we yô, hide za vea or môm shin iorov uhar, sha er shiada u iorov uhar shin utar una wanger hanma kwagh yô.+ ¹⁷ Aluer nan venda u keghen ato a ve yô, lam a nongo* u Aôndo. Man aluer nongo u Aôndo je kpa nan venda u keghen ato a u yô, nana̱ hingir we vough er ka or u ken tar+ shin orngoholkpandegh nahan.+ ¹⁸ “Mimi je me kaa ne, nyityôkwagh i ne kange shin tar cii, a lu kwagh u i vande kangen sha yô, shi nyityôkwagh i ne sagh shin tar cii, a lu kwagh u i vande saghen sha yô. ¹⁹ Shi me kaa ne, mimi je, aluer iorov uhar ken a ven shin tar ne zua zwa sha u sônon ma kwagh u a lu hange hange yô, Terem u sha la una er ve kwagh shon.+ ²⁰ Gadia hen ape iorov uhar shin utar ve kohol imôngo ken iti yam yô,+ me lu hen atô ve.” ²¹ Tsô Peteru va pine un ér: “Tere, ka kwa me i gbe u anmgbian wam nana erem kwaghbo ve me de nana? Ka kwa taankaruhara?” ²² Yesu gema kaa a na ér: “Me kaa u, ka kwa taankaruhar tseegh ga, kpa ka kwa 77.+ ²³ “Sha nahan yô, a fatyô u tôôn Tartor u sha karen sha kwagh u tor ugen u soo ér ikpan na i kimbi un anzô a yange na ve yô. ²⁴ Mba ngur kimbin un yô, i va un a kpan na ugen u lu un a injô i kuman utalenti 10,000* yô. ²⁵ Kpa er lu a gbenda u kimbin injô la ga yô, orvesen na la na zwa ér i tôô un man kwase na man ônov nav kua akaa a na cii i za tee, i va kimbi un injô na.+ ²⁶ Tsô kpan la gba inya gba zamber a na kaan ér, ‘Wa ishima a mo; me kimbi u hanma kwagh cii.’ ²⁷ Maa kunya kôr orvesen na la a na, nahan a kaa ér a yem, shi a de un a injô la.+ ²⁸ Kpan ne yemen yô, a za zua a kpan ugen u lu un a injô i kuman udenariu* 100 yô. Tsô a kôr un, a sende un ave hen ikyer, a kaa ér, ‘Kimbim hanma kwagh u u lum a mi cii.’ ²⁹ Tsô kpan shon gba inya gba zamber a na kaan ér: ‘Wa ishima a mo; me kimbi u hanma kwagh cii.’ ³⁰ Kpa a lumun ga, a gema a yem a na, a za na ér i wuhe un ken purusu, a̱ lu ker zan zan una kimbi un kwagh u a lu un a mi la. ³¹ Ikpan igen la ngi nengen kwagh u za hemen la yô, ishima vihi ve tsung. Nahan ve yem ve za ôr orvesen ve la hanma kwagh u er la cii. ³² Tsô orvesen na yila un kaa a na ér: ‘We kpan u wan ifer ne, yange m de u a injô you la cii, zum u u zamber mo yô. ³³ Nahan we kpa doo u ma u zungu kpan ugen la mhôônom er yange m zungwe u nahan gaa?’+ ³⁴ Tsô ishima vihi orvesen na la pev, maa a na un sha ikyev i mba wuhen ior, ér ve za wuhe un ken purusu, a lu ker zan zan saa una kimbi hanma kwagh u a lu un a mi la cii. ³⁵ Kape Terem u sha kpaa una er a hanmô wen+ u nan den anmgbian u nan kwaghbo sha mimi ga je la.”+