Sha Uwegh ku Mateu 8:1-34
8 Hungwan sha uwo yô, zegeikpelaior dondo sha a na.
2 Tsô orimande ugen va gure un inya kaa ér: “Tere, wea lumun yô, u fatyô u wanger mo.”+
3 Tsô a za uwegh a bende un iyol, a kaa ér: “M lumun! I wanger we.”+ Maa her je imande na la bee.+
4 Tsô Yesu kaa a na ér: “Nenge, de ôron or môm kwagh ne ga,+ kpa za tese pristi iyol you,+ shi na nagh ku Mose yange kaa la,+ nahan i lu ve shiada.”
5 Za nyer ken Kapenaum yô, orshoja u vesen ugen va her a na, gba va zamber a na+
6 kaan ér: “Orvesen, wanye wam u shiren mo gba angev mbu kpen alegh, ngu sha gambe ken iyou, man ngu yan ican je gande.”
7 A gema a kaa a na ér: “Me va tsô me bee un angev.”
8 Orshoja shon gema kaa ér: “Orvesen, m kuma u ú va hen ya wam ga. Ôr a ôr kwagh tseegh kpa angev mbua bee wanye wam la.
9 Sha ci u mo kpa m ngu sha ikyev i mbavesen av, shi m ngu a ushoja sha ikyev. Ka mea kaa a orshoja ngun mer, ‘Za heela!’ maa nan za je. Shi mea kaa a ugen mer ‘Va!’ maa nan va je; shi mea kaa a kpan wam mer, ‘Er ingin!’ maa nan er je.”
10 Yesu ongo kwagh ne yô, kpiligh un iyol, nahan a kaa a mba ve dondo un ijime la ér: “Mimi je me kaa ne, m ngu a zua a or môm ken Iserael u lun a jighjigh u nan kpishi nahan ga.+
11 Kpa me kaa ne, ior kpishi vea due vegher u sha ityoughkitaregh man vegher u shin ityôtar vea va ya kwagh sha tebul vea Aberaham man Isaka man Yakob ken Tartor u sha.+
12 Kpa ônov mba Tartor yô, a kende ve ken ime i ken won, ape vea vaa je vea wua anyi yô.”*+
13 Maa Yesu kaa a orshoja u vesen la ér: “Yem. Er u tese wer u na jighjigh yô, i lu er u kaa nahan.”+ Tsô hen ihwa la je angev bee wanye na la.+
14 Yesu za nyer hen ya u Peteru yô, a nenge ngôkem u Peteru+ gba fiva* lu hen inya.+
15 Tsô a bende un uwegh iyol,+ maa fiva la bee. Nahan a mough sha a gba eren un kwaghyan.
16 Kpa iyange been yô, i va a ior kpishi mba ve lu a ujijingi mba bov yô hen a na. A na zwa ujijingi mbara cii due ken a ve kera, shi a bee mba ve lu yan ican a iangev la cii iangev vev,
17 sha u kuren kwagh u Aôndo yange mgbegha profeti Yesaia ôr yô, ér: “Un iyol na tôô iangev yasev, shi a tôô mbamnyoon asev kpaa.”+
18 Yesu nengen er ikpelaior i kase un yô, a kaa a mbahenen nav ér vea per Zegemnger u Galilia yande la.+
19 Tsô orngeren ugen va kohol un kaa a na ér: “Ortesen, hanma ijiir i u lu zan cii, me dondo u.”+
20 Kpa Yesu kaa a na ér: “Atsôngo nga a ubar, shi inyon i sha ngi a aya, kpa Wan u or yô ngu a ape suur ityough ga.”*+
21 Tsô orhenen na ugen kaa a na ér: “Tere, nam ian m za vande iin terem man me hide ye.”+
22 Yesu kaa a na ér: “Dondon sha a mo her. De mbakpenev ve ii mbakpenev vev.”+
23 Tsô Yesu nyôr shin tso vea mbahenen nav.+
24 Ica i gbe ga yô, zegeuraahumbe hii shin zegemnger la, maa agôndoamnger gba kpianger haan shin tso. Kpa un yô, lu yaven.+
25 Tsô ve va nder un, ve kaa a na ér: “Tere, yima se, se mba nôngon u saan!”
26 Kpa a pine ve ér: “Er nan i cier ne iyol* yum nahana?+ Jighjigh wen u nan vese ga tsôô!” Tsô a mough a yange ahumbe la kua zegemnger, maa huan ving.+
27 Nahan kpiligh ve iyol, ve kaa ér: “Or ne jim yô, ka nyi oro? Ahumbe man zegemnger je kpa mba ongo imo na.”
28 Mba peren mba gbe yande la hen haregh u Gadarene yô, iorov uhar mba lun a ujijingi mba bov za due hen iwar i mbakpenev va kohol un.+ Ve wa tswam kpishi, nahan ior cian u karen gbenda la.
29 Ve gba genger amo kaan ér: “Wan u Aôndo, ka nyi i zough se a wee?+ U va heen wer u va na se ican+ cii man shighe u i ver la yee?”+
30 Ikpela-igyo gema lu yan kwagh ica a ve kpishi ga.+
31 Tsô azôv la gba zamber a na kaan ér: “Aluer u ngu zendan se kera yô, na se ian se̱ za nyôr ken ikpela-igyo la.”+
32 Nahan a kaa a azôv la ér: “Za nen!” Tsô a due a za nyôr ken igyo la, nahan ikpela-igyo la cii hembe ayem za osough sha kurugh ku ijem haa shin zegemnger, kpe shin mngerem mara.
33 Kpa mbakuranigyo mbara yevese, mba za nyer ken gar yô, ve ôr hanma kwagh u za hemen yô, kua kwagh u ior mba azôv nzughul a ve la kpaa.
34 Nahan ior mba ken gar la cii due gba van hen Yesu. Mba va kohol un yô, ve zamber a na ér a due hen ijiir ve kera.+
