Sha Uwegh ku Mateu 21:1-46
21 Mba va nyer hen Betefage hen Uwo u Olev, ikyua a Yerusalem yô, Yesu tindi mbahenen nav uhar.+
2 A kaa a ve ér: “Za nen hen angar u a lu se sha hemen ne, ne za nyôron ker je maa ne nenge a ngôjaki, i zer un ngu vea wan na. Sagh nen ve, vam nen a mi.
3 Aluer or pine ne kwagh yô, kaa nen ner, ‘Kwagh gba Ter a ve.’ Nahan fese je nana de ér ne va a ve.”
4 Kwagh ne er nahan sha u kuren kwagh u yange i ôr sha ikyev i profeti la, ér:
5 “Kaa wankwase u Shion wer: ‘Nenge, Tor wou ngu van hen a we,+ ngu ishima legh legh,+ a henda jaki, man ka wanjaki, zendenya u tôôn ikyav.’”+
6 Nahan mbahenen mba Yesu za er vough er a kaa ve nahan.+
7 Ve za va a ngôjaki la vea wan na, tsô ve tar akondo a ve sha ujaki mbara, maa Yesu tema sha mi.+
8 Ior kpishi ken ikpelaior la gema akondo a ve tar sha gbenda,+ mbagenev lu gberen ahu a ikyon taren sha gbenda.
9 Shi ikpelaior i i lu zan un sha hemen man i i lu van un ken ijime la cii lu ôron genger genger ér: “Ma u yima* wan u Davidi!+ Un u a ve ken iti i Yehova*+ la ngu a iveren! Ma u yima un, we u u lu sha usha mba hemban gban ica la!”+
10 Za nyer ken Yerusalem yô, gar cii num, ior lu pinen ér: “Ka an nee?”
11 Ikpelaior i i lu vea na la lu kaan ér: “Ka profeti Yesu je ne.+ A due ken Nasareti u Galilia!”
12 Yesu za nyer ken tempel yô, a zenda mba ve lu teen akaa ker kua mba ve lu yamen akaa la cii ve due kera. Shi a daa utebul mba mbamusaninyaregh kua akaateman a mba ve lu teen mkungum la cii, gba.+
13 A kaa a ve ér: “I nger ér, ‘A yilan iyou yam ér iyou i msen,’+ kpa ne mba geman i hingir bar u mbanumungbenda.”+
14 Shi mbaapirashe kua mbaawanev kpa va hen a na ken tempel, nahan a bee ve cii uzayol mban.
15 Zum u upristi mba tamen man mbangeren nenge akaa a kpilighyol a a er la, kua er mbayev* lu ôron ken tempel genger genger ér, “Ma u yima* wan u Davidi!”+ yô, ishima vihi ve ker,+
16 ve kaa a na ér: “U ungwa kwagh u mban ve lu ôron la kpa?” Yesu gema kaa a ve ér: “Een. Ne ôr kwagh u i nger ér, ‘U na mbayev mba kiriki man anikyundanev vea wuese we sha zwa ve’ la gaa?”+
17 Tsô a undu ve her, a kar a due ken gar la, a yem ken Betani, a za tsa ker.+
18 Ngur hiden ken gar pepe pepe yô, ijen kôr un.+
19 Tsô a nenge a kon u tur hen kpegbenda, maa a kar a za her, kpa a zua a ityamegh sha mi ga, lu ahu tseegh.+ Nahan a kaa a u ér: “U kera ume ityamegh mayange ga.”+ Kon u tur la maa uma her ave ave je.
20 Mbahenen mba nengen kwagh ne yô, kpilighyol ve iyol, ve kaa ér: “Er nan ve kon u tur la u om ave ave nahana?”+
21 Yesu kaa a ve ér: “Mimi je me kaa ne, aluer ne na jighjigh shi ne ta akperan ga yô, ne er kwagh u m er a kon u tur ne tseegh ga, uwo ne je kpa, aluer ne kaa a u ner, ‘Mough za gba shin zegemnger,’ kpa á lu nahan je.+
22 Man hanma kwagh u ne er msen ne sôn cii, aluer ne na jighjigh yô, a na ne.”+
23 Nyer ken tempel yô, upristi mba tamen man mbatamen mba nongoior la va hen a na zum u lu tesen yô, ve va pine un ér: “Ka sha tahav mbu nyi u eren akaa nee? Man ka an nan ne u tahav mbunu?”+
24 Yesu gema kaa a ve ér: “Mo kpa me pine ne kwagh môm. Aluer ne ôrom yô, mo kpa me ôr ne tahav mbu m eren akaa ne a mi la:
25 Batisema u Yohane la yô, lu hana due? Lu sha shinii lu hen ioro?” Kpa ve gba henen ker ayol a ve kaan ér: “Aluer se kaa ser, ‘Lu sha’ yô, una pine se ér, ‘Tsô er nan yange ne na un jighjigh ga?’+
26 Kpa aluer se kaa ser, ‘Lu hen ior’ yô, ikpelaior ne ia mough ayôôso a vese, sha ci u ve cii ve nenge Yohane ér ka profeti.”
27 Maa ve kaa a Yesu ér: “Se fa ga.” Yesu kpa kaa a ve ér: “Nahan mo kpa me ôr ne tahav mbu m eren akaa ne a mi la ga.
28 “Ne nenge nena? Orgen lu a ônov uhar. A za kaa a u hiihii la ér, ‘Wan wam, yar ken sule u wain nyian.’
29 Wan la gema kaa a na ér, ‘Me yar ga,’ kpa va hide vaa afanyô sha kwagh u ôr la, maa due yar.
30 Shi a kar a za hen wan na u sha uhar la, a za ôr un kwagh shon môm. Ngun kaa a na ér, ‘Baba, me yar,’ kpa a kera yar ga.
31 Ken ve mba uhar mban, ka u han a er ishima i ter naa?” Ve kaa ér: “Ka u hiihii la.” Yesu gema kaa a ve ér: “Mimi je me kaa ne, mbangoholkpandegh man mbaagbaga vea vande nyôron ken Tartor u Aôndo a ven.
32 Gadia Yohane yange va hen a ven, lu tesen ne gbenda u perapera, kpa ne na un jighjigh ga. Mbangoholkpandegh man mbaagbaga yô, na un jighjigh.+ Kpa ne yô, shin er ne nenge akaa ne nahan je kpa, ne hide ne vaa afanyô, ne na un jighjigh ga.
33 “Ungwa nen injakwagh igen: Orgen lu a inya, nahan a er sule u wain.+ A wa u igyar ningir tser, shi a time ihyungwa i shoghor wain shi a maa iyou i taven gôgônan ker.+ Tsô a gema u a wa mbatomov sha ikyev, a mough a yem zende ken tar u icaa.+
34 Ka va kom yô, a tindi ikpan na hen mbatomov mbara, ér ve̱ za ngohol atam a wain a a lu a na la.
35 Kpa mbatomov mbara kôr ikpan la, ve gbidye u môm, ve wua ugen, ugen la di ve ta un awen.+
36 Shi a tindi ikpan igen hemba ngeen a i hiihii la; ingin kpa ve er a i di nahan.+
37 Ken masejime yô, a tindi wan na u nomso hen a ve, a kaa ken ishima na ér: ‘Wan wam yô, vea na un icivir.’
38 Mbatomov mbara mba nengen a wan la yô, ve gba kaan ker ayol a ve ér, ‘Ngun ka wan u una va ya dyako je ne.+ Va se wua un nen se ngohol nen dyako na la!’
39 Tsô ve kôr un ve due a na ken sule u wain la, ve za wua un.+
40 Nahan zum u or u a lu a sule u wain la una va yô, una er a mbatomov mbara nena?”
41 Ve kaa a na ér: “Er ve lu aferaior yô, una tim ve sha gbenda u cieryol,* una gema sule u wain la una wa sha ikyev i mbatomov mba vea naan un atam a wain sha shighe vough yô.”
42 Yesu kaa a ve ér: “Ne ôr ken Ruamabera gaa? I nger ér, ‘Iwen i mbamaankwagh ve vende i la, i hingir iwen i hange hange i sha zongo.+ Kwagh ne due ka hen Yehova,* man ka kwagh u kpilighyol sha ashe ase.’+
43 Ka nahan ve m lu kaan a ven mer a ngohol Tartor u Aôndo hen a ven kera, a gema a na ikyurior igen i ia ume atam ye.
44 Shi or u nan gbe sha iwen ne yô, nana sombo vughô vughô.+ Man or u iwen ne i gbe sha a nan yô, ia njighe nan a njighe.”+
45 Upristi mba tamen man Mbafarishi mba ongo anzaakaa a Yesu ôr la yô, ve kav er lu ve je lu ôron yô;+
46 nahan ve soo u kôron un, kpa ve cia ikpelaior, sha ci u i̱ nenge ér ngu profeti.+
Ngeren mba shin kpe
^ Zwa Grika, “Hosana.” Ka u sônon Aôndo sha u a̱ va a myom, shi ashighe agen ka i ter ishember ne sha u tesen msaanyol.
^ Nenge Ngeren u Seer u A5 la.
^ Zwa Grika, “anmbayevnomso.”
^ Zwa Grika, “Hosana.” Ka u sônon Aôndo sha u a̱ va a myom, shi ashighe agen ka i ter ishember ne sha u tesen msaanyol.
^ Shin “sha gbenda u nyoon tsung.”
^ Nenge Ngeren u Seer u A5 la.
