Sha Uwegh ku Mateu 10:1-42
10 Tsô a yila mbahenen nav 12, a na ve tahav mbu dughun ujijingi mba bov*+ ken ior kera shi been hanma inja i uange man hanma inja i mkpeyolga* cii.
2 Ka ati a mbaapostoli mba 12 mbara je ne:+ Shimon, u i yilan un ér Peteru+ la, man anmgbian na Anderia;+ Yakobu man anmgbian na Yohane,+ ônov mba Sebedeu;
3 Filibu man Batolomiu;+ Toma+ man Mateu,+ u lu orngoholkpandegh la; Yakobu wan u Alefeu; man Tadeu
4 man Shimon, Orkana;* man Yuda Isekarioti, u va tee un la.+
5 Yesu tindi mba 12 mban, shi ôr ve akaa a vea er yô,+ a kaa ér: “De kahan zaan nen ken akuraior agen ga, shi de nyer nen ken ma gar u Mbasamaria kpaa ga.+
6 Kpa zaan nen hen iyôngo i ken ya u Iserael, i i saa la.+
7 Ne zaan yô, pasen nen ve kwagh kaan nen ner: ‘Tartor u sha zurum.’+
8 Bee nen ior angev,+ nder nen mbakpenev shi wanger nen mbaamandev shi zenda nen azôv ken ior kera. Ne ngohol gbilin, nahan na nen gbilin.
9 De tôôn nen zanaria shin azurufa shin togula ken akpa a inyar* a en+
10 shin ikpa i wan kwaghyan sha ci u zende ne ga, shi de tôôn nen akondo ahar ahar* shin akôv shin gbough kpaa ga,+ gadia ortom kuma u a na nan kwaghyan u nan.+
11 “Hanma gar u vesen shin gar u kiriki u ne za nyôr her yô, ker nen or her u nan tese ér nan kuma yô,* shi lu nen her zan zan ne kar moughon.+
12 Nea nyôr hen ya yô, sugh nen mba hen ya la.
13 Aluer ya la tese ér un kuma yô, bem wen a lu sha a na.+ Kpa aluer ya la kuma ga yô, bem wen a hide sha a ven.
14 Aluer or môm ngohol ne shin kegh ato a loho wen ga, man ne mba duen hen ya la shin ken gar la kera yô, kure nen ihyundu i shin angahar a en.+
15 Mimi je me kaa ne, sha Iyange i Ijirigh la, kwagh u gar la una hemba vihin a u tar u Sodom man Gomora.+
16 “Nenge, m ngu tindin ne er iyôngo hen atô u ugbaseela nahan. Yô, lu nen sulaa er iyô nahan, kpa gema lu nen wang er mkungum nahan.+
17 Wa nen ikyo, sha ci u ior vea za a ven ken mbaatejir vev,+ vea gbidye ne+ ken ushinagoge vev.+
18 Shi a za a ven sha ishigh ki ugomna man utor+ sha ikyaa yam, sha u a lu shiada hen a ve man hen akuraior yô.+
19 Kpa zum u ve ze a ven yô, ishima i de nyian ne sha kwagh u ne ôr man er ne ôr kwagh shon la ga. Gadia hen shighe* la je, a na ne kwagh u ne ôr yô.+
20 Sha ci u ka ne ne lamen ga, kpa ka jijingi u Ter wen una lamen ken a ven ye.+
21 Heela tseegh ga, or nana na anmgbian u nan ér i wua, ter kpaa nana na wan u nan, shi mbayev vea mough num a mbamaren vev, vea na a wua ve.+
22 Shi ior cii vea kôr ne ihyom sha ci u iti yam,+ kpa ka or u nan taver ishima zan zan mkur la a yima nan ye.+
23 Aluer ve tôv ne a ican hen ma gar yô, yevese yem nen hen ugen.+ Mimi je me kaa ne, ne lu a zende sha agar a Iserael ne tser ga je tsô Wan u or una va.
24 “Wanyemakeranta nan hembe tica u nan ga, shi kpan kpaa nan hembe orvesen u nan ga.+
25 Á er a wanyemakeranta vough er tica u nan nahan, shi kpan kpaa á er a nan er orvesen u nan nahan.+ Aluer orvesen u nan lu ityough sha ya je kpa ior mba yilan nan ér Belesebul* yô,+ hide mba hen ya u nan ve a yila ve nahan ga yee?
26 Nahan de cian nen ve ga, sha ci u ma kwagh u i yer, u a va pase un ken igbar ga je kpa ngu ga. Shi kwaghmyer môm u a va fa un ga je kpa ngu ga.+
27 Kwagh u m ôr ne ken ime yô, gema ôr nen ken iwanger, shi kwagh u m ôr ne ivarvase yô, gema pase nen sha ityouv mbi iyoughouv je.+
28 Shi de cian nen mba ka ve wua iyol tseegh, kpa uma yô ve fetyô u wuan ga la ze.+ Kpa cia nen un u una fatyô u timin uma kua iyol cii ken Gehena* la.+
29 Ka i tee mbaatsator uhar sha an-inyar u cuku* gaa? Nahan kpa mô ve môm una gba hen inya a mfe u Ter wen u sha la shio ga.+
30 Shi ice yen i sha ityo je kpa a fa iyenge i i cii.
31 Nahan de cian nen ga; ne gba kwagh hemba mbaatsator imôngo.+
32 “Sha nahan yô, hanma or u nan pasen kwagh wam sha ishigh ki iorough yô,+ mo kpa me pase kwagh u nan sha ishigh ki Terem u a lu sha la.+
33 Kpa or u nan vendam sha ishigh ki iorough yô, mo di kpaa me venda nan sha ishigh ki Terem u a lu sha la.+
34 De henen nen ner m va ka sha u me va na bem a lu shin tar ga; m va ka u nan bem ga, kpa ka sanker.+
35 Gadia m va ka sha u nan mpav hen atô u or a ter u nan, man wan u kwase kpaa a ngô u nan, kua kwase a ngô u nom u nan.+
36 Jighilii yô, mba hen ya u or vea gema a lu mbahyomov mba nan.
37 Or u ter u nan shin ngô u nan a hembe doon nan ishima a mo yô, nan kuma u lun orhenen wam ga; shi or u wan u nan u nomso shin u kwase a hembe doon nan ishima a mo yô, nan kuma u lun orhenen wam ga.+
38 Shi or u nan lumun u tôôn kon* u nan dondon sha a mo ga cii, nan kuma u lun orhenen wam ga.+
39 Or u nan keren ér nana war uma u nan yô, una de a saa nan, kpa or u uma u nan a saa nan sha ci wam yô, nana gema a zua a mi.+
40 “Or u nan ngohol ne yô, mo kpa nan ngohol mo. Man or u nan ngohol mo yô, nan ngohol Un u a tindim la kpaa.+
41 Or u nan ngohol ma profeti sha ci u ka profeti yô, nana zua a injar i profeti,+ shi or u nan ngohol orperapera sha ci u ka orperapera yô, nana zua a injar i orperapera.
42 Shi or u nan ne môm ken mbakiriki mban kôôpu u mngerem ma ndôhôr môm tseegh ér nana ma, sha ci u ka orhenen wam yô, mimi je me kaa ne, nana zua a injar i nan kpee, a bunde ga.”+
Ngeren mba shin kpe
^ Shin “mlu u korkor.”
^ Zwa Grika, “ujijingi mba hôngorov.”
^ Shin “ortseenshima la.”
^ Ka akpa a inyar a zeren ken iwenge je la.
^ Shin “ikyondo igen.”
^ Shin “or u injaa.”
^ Zwa Grika, “ihwa.”
^ Ka Satan u a lu orvesen shin orhemen u azôv la i yer un sha iti ne ye.
^ Nenge Ngeren u Pasen Asember.
^ Zwa Grika, “gbenger asariôn.” Nenge Ngeren u Seer u B14 la.
^ Ka kon u manden or sha mi je la. Nenge Ngeren u Pasen Asember.
