Sha Uwegh ku Mateu 26:1-75
-
Upristi er mhen u wuan Yesu (1-5)
-
I haa Yesu mkurem ma human doon sha ityo (6-13)
-
Yesu ya Paseka na u masetyô; i tee un (14-25)
-
I hii kwagh u Kwaghyan u Ter u Aikighe (26-30)
-
Yesu tsengaôron ér Peteru una venda un (31-35)
-
Yesu er msen ken Gesemane (36-46)
-
I kôr Yesu (47-56)
-
I ôr Yesu ijir sha ishigh ki Sanhederin (57-68)
-
Peteru venda Yesu (69-75)
26 Yesu ôron akaa ne cii been yô, a kaa a mbahenen nav ér:
2 “Ne fa, mase shin ayange ahar tsô a er Paseka,+ nahan a na Wan u or sha ikyev i mbahyomov ér ve za mande un sha kon.”+
3 Tsô upristi mba tamen man mbatamen mba nongoior la zua hen tembeya u zegepristi, u i yilan un ér Kayafa la.+
4 Ve gba henen er vea er ve vea kôr+ Yesu sha ayom vea wua un yô.
5 Nahan kpa, ve lu kaan ér: “I de lu sha shighe u iniongo ga, sha er ior vea mough ayôôso a vese ga yô.”
6 Shighe u Yesu lu ken Betani hen ya u Shimon, u yange i bee un imande la,+
7 kwase ugen va a mkurem ma human doon, ma taver ishe, ken ikpe i alabasetu,* gba va haan un sha ityo, zum u a lu yan kwagh yô.
8 Mbahenen mba nengen nahan yô, ishima vihi ve, ve gba kaan ker ayol a ve ér: “Er nan a vihin ma nahana?
9 Ma i tee ma ma i zough a zegeinyar ma i ne mbaatsanev.”
10 Yesu fe kwagh u ve lu ôron la yô, a kaa a ve ér: “Er nan ne ze kwase ne iyolo? A erem kwagh u dedoo.
11 Gadia mbaatsanev vea lu vea ven gbem,+ kpa mo yô, m ngu lun vea ven gbem ga.+
12 Gadia mkurem ma a heem iyol ne, ka sha u wan ago a va iin mo shighe u me kpe yô.+
13 Mimi je me kaa ne, hanma ijiir sha tar i a pase loho u dedoo ne her cii yô, kwagh u kwase ne a er ne kpa a ôr sha u umbur un.”+
14 Tsô u môm ken Mbapuekaruhar, u i yilan un ér Yuda Isekarioti la,+ za hen upristi mba tamen+
15 za pine ve ér: “Ne nam nyi sha u m̱ na ne unu?”+ Ve kaa ér vea na un agbenger a azurufa 30.+
16 Nahan hii shighe la je, a gba keren ér ian i due tsembelee una tee un.
17 Ka va nyer sha iyange i hiihii i iniongo i Beredi u I We Kwa sha Mi Ga+ la yô, mbahenen va hen Yesu, va pine un ér: “Ka han u soo wer se sôr u ijiir u ya Paseka here?”+
18 A kaa a ve ér: “Za nen ken gar, za kohol nen Via, kaa nen a na ner, ‘Ortesen kaa ér: “Shighe u i verem la zurum; me va ya Paseka vea mbahenen av hen ya wou.”’”
19 Tsô mbahenen mbara za er kwagh u Yesu kaa ve la, ve wa iyol i Paseka.
20 Iyange i been yô,+ un vea mbahenen nav mba 12 mbara ve kase kwaghyan sha tebul.+
21 Mba ngur yan kwagh yô, a kaa ér: “Mimi je me kaa ne, or môm ken a ven nana teem.”+
22 Tsô ishima gba ve awambe, hanma ve gba pinen ér: “Tere, ka mo ga ga̱?”
23 A gema a kaa ér: “Ka or u nan lu zan uwegh shin gbande vea mo la nana teem ye.+
24 Ka mimi, Wan u or ngu kpen, vough er i nger nahan. Kpa kwagh a tser+ or u nan tee Wan u or la!+ Guda yange ma i mar nan ga.”+
25 Tsô Yuda, u lu nôngon u teen un la, gema pine un ér: “Rabi, ka moo?” Yesu kaa a na ér: “U kaa vough.”
26 Er ve lu yan kwagh zan a mi ave la je, Yesu tôô kpenberedi, sôn iveren,* maa coon,+ gema na mbahenen nav, kaa ér: “Ngohol, ya nen. Beredi ne tile sha ityough ki iyol yam.”+
27 Shi a tôô kôôpu, a er msen,* maa a gema a na ve, a kaa ér: “Ne cii ma nen,+
28 sha ci u wain ne tile sha ityough ki awambe a am,+ a a lu ‘awambe a ikyuryan,’+ a i gbe u a haa inya sha ci u den ior kpishi+ asorabo la.+
29 Kpa me kaa ne: Mayange me kera ma zar u wain ga, zan zan iyange i me ma wain u he a ven imôngo ken Tartor u Terem la.”+
30 Mba we atsam* mba been yô, ve due ve yem sha Uwo u Olev.+
31 Tsô Yesu kaa a ve ér: “Ne cii ne nôngo gbeev hen tugh mbun sha kwagh wam. Gadia i nger ér: ‘Me ta num sha orkuranilev, nahan iyôngo i ken ikyumuile ia sambe.’+
32 Kpa a nderen mo shin ku yô, me vande yemen a ven ken Galilia.”+
33 Kpa Peteru gema kaa ér: “Aluer mbagenev cii nôngo gbeev sha kwagh wou kpa, mo yô, mayange me nôngo gbeev ga!”+
34 Yesu kaa a na ér: “Mimi je me kaa u, hen tugh mbun, ikyegh ia lu a tôngo ga je tsô, u vendam kwa tar.”+
35 Peteru kaa a na ér: “Aluer ka u me kpe a we imôngo je kpaa, mayange me venda u ga.”+ Mbahenen mbagenev mbara cii kpa ôr nahan.
36 Tsô Yesu va vea mbahenen hen anijiir ugen, i yilan ér Gesemane,+ maa a kaa a ve ér: “Tema nen heen, mo me yem keera, me za er msen.”+
37 Karen vea Peteru man ônov mba Sebedeu mba uhar mbara mba gbe yemen yô, ishima hii u zan un iyol, a gba zungwen kpishi.+
38 Tsô a kaa a ve ér: “Ishima vihim je ar ken ku. Tema nen heen kuran nen vea mo imôngo.”+
39 Kporom ken hemen kpuaa yô, a gure a sua ityough inya, a gba eren msen+ kaan ér: “Tere, a gbe sha mi yô, ma i karem a iyongo+ ne kera. Nahan kpa, i de eren sha ishima yam ga, i̱ er sha ishima you.”+
40 A hide a va hen mbahenen a va kohol ve ve lu yaven, nahan a kaa a Peteru ér: “Ihwa i môm tsô kpa ne fatyô u kuran a mo imôngo gaa?+
41 Kuran nen+ shi eren nen msen hanma shighe,+ sha er ne gba ken imeen ga yô.+ Gbashima yô ngu,* kpa iyol gema vôr.”+
42 Shi a hide a yem sha kwa har, a za er msen, a kaa ér: “Terem, aluer ka u iyongo ne ia kar kera ga, saa me ma shimi keng yô, i er ishima you.”+
43 Shi a za hide a va kohol ve ve lu yaven, gadia ashe yuhwa ve ikyôr.
44 Tsô shi a undu ve, a yem a gba za eren msen sha kwa tar, shi a ôr kwagh u lu vanden ôron la.
45 Shi a hide a va hen mbahenen, maa a kaa a ve ér: “Hen shighe ne nahan, ne mba yaven memen! Nenge! Shighe kuma u a na Wan u or sha ikyev i mbaasorabo ve.
46 Mough se yem nen. Nenge! Or u a teem la ngu ikyua.”
47 Er lu lamen zan a mi ave la je, Yuda, u lu môm ken Mbapuekaruhar mbara za va vea ikpelaior, i̱ lu a usanker man igbough. Lu upristi mba tamen man mbatamen mba nongoior la tindi ve ye.+
48 Un u a tee un la vande ôron ve kwagh u una lu ve ikyav yô, a kaa a ve ér: “Or u me susen nan zwa la yô, ka un je la; kôr un nen yem nen a na.”
49 Nahan, a za hen Yesu jighilii, a kaa ér: “Rabi, m sugh u!” Maa a suse un zwa.
50 Kpa Yesu kaa a na ér: “Orne, ka nyi i ve a we heene?”+ Maa ve va kôr Yesu ve yem a na.
51 Tsô môm ken mba ve lu vea Yesu la za uwegh tsua sanker na gema gber kpan u zegepristi, bugh un tough.+
52 Kpa Yesu kaa a na ér: “Hide a sanker wou wa ape u dugh la,+ gadia mba ve tôôn sanker a or cii vea kpe sha sanker.+
53 Shin u fa wer me fatyô u zamber a Terem una tindim a mbatyomov mba shaav a hemba akum 12 gaa?+
54 Kpa aluer ka nahan yô, a er nan man kwagh u Ruamabera a kaa ér gba keng u una er la, una kure sha mi voughlo?”
55 Hen shighe la je Yesu kaa a ikpelaior la ér: “Ne va u va kôron mo a usanker man igbough er ka ormbaiv yôô? Yange m teman ken tempel ayange ayange m tesen,+ kpa ne kôrom ga.+
56 Kpa kwagh ne cii er ka sha u akaa a uprofeti ve nger la cii a̱ kure sha mi vough yô.”+ Maa mbahenen cii yevese undu un.+
57 Mba ve kôr Yesu la, ve yem a na hen Kayafa,+ zegepristi, ape mbangeren man mbatamen kohol la.+
58 Kpa Peteru dondo un ijime lu van ken ica, zan zan va ar hen tembeya u zegepristi. Nyer ker yô, a kar a za tema vea mbashirentom mba hen ya la, sha u una nenge er ikyaa shon ia za a za kure yô.+
59 Tsô upristi mba tamen man Sanhederin* cii gba keren atôakyaa a aiegh a vea wa Yesu iyol, sha er vea wua un yô.+
60 Kpa ve zua a mi ga, shin er mbashiada mba aiev va kpishi nahan kpaa.+ Shighe kar yô, iorov uhar za va,
61 va kaa ér: “Or ne yange kaa ér, ‘Me fatyô u hemben tempel u Aôndo, hiden maan un ken ayange atar.’”+
62 Tsô zegepristi mough tile sha pine un ér: “U shi bugh zwa sha ma kwagh je gaa? U ungwa shiada u ior mban ve lu eren sha a we la gaa?”+
63 Kpa Yesu ungwa ato.+ Nahan zegepristi la kaa a na ér: “M ngu kaan a we mer bum Aôndo u uma wer u ôr mimi, nahan pase se, wea lu Kristu, wan u Aôndo yô!”+
64 Yesu kaa a na ér: “U kaa vough. Kpa m ngu kaan a ven mer: Hii hegen je, ne nenge Wan u or+ una tema ken uwegh ku iyanegh ku ageegh,+ una lu van sha abeen a sha kwavaôndo.”+
65 Tsô zegepristi la ande akondo a na, a gba kaan ér: “A laha Aôndo ve! Shi ka nyi i̱ gbe se a mbashiada? Nenge ase! Ne ungwa er a laha Aôndo ve ga̱?
66 Ne nenge nena?” Ve kaa ér: “A kuma ku.”+
67 Tsô ve ta un azer sha ishi,+ shi ve ta un azu.+ Mbagenev ta un sambe sha ishi,+
68 ve lu kaan ér: “We Kristu, wea lu profeti yô, ôr se or u nan gbidye u la.”
69 Hen shighe ne, Peteru tema ken won hen tembeya, maa wankwase ugen u shiren tom hen ya la va kaa a na ér: “We kpa yange u zenden vea Yesu, Orgalilia ne!”+
70 Kpa a tuna sha ishigh vev cii, a kaa ér: “M fa kwagh u u lu ôron la ga.”
71 Moughon yemen hen anyou u sha hundaya la yô, wankwase ugen nenge a na kav, maa kaa a mba ve lu her la ér: “Or ne yange zenden vea Yesu, Ornasareti la.”+
72 Shi a tuna je a bum, a kaa ér: “M fa or la ga!”
73 Shighe kar kpuaa yô, mba ve tile her la gba va kaan a Peteru ér: “Mimi je, we kpa u ngu môm ken a ve, gadia iliam you tese nahan.”
74 Tsô a gba tuhwan* shi bumun kaan ér: “M fa or la ga!” Fese nahan ikyegh maa tôngo!
75 Maa Peteru umbur kwagh u Yesu kaa ér: “Ikyegh ia lu a tôngo ga je tsô, u vendam kwa tar”+ la. Tsô a due ken won a za vaa tsung.
