Sha Uwegh ku Mateu 27:1-66
27 Sev mbu aven yô, upristi mba tamen man mbatamen mba nongoior la tume idyu, gba henen gbenda u vea wua Yesu yô.+
2 Nahan ve kange un, ve yem a na ve za na un sha ikyev i gomna Pilatu.+
3 Tsô Yuda u tee Yesu la, nengen ér i kure Yesu ijir ér i wua un yô, ishima na un ibo, nahan a za hide a agbenger a azurufa a 30 la, a na upristi mba tamen man mbatamen mbara,+
4 a kaa ér: “M er isholibo, sha u nan ne awambe a orishôôgh.” Kpa ve kaa a na ér: “Ka nyi yase sha kwagh la? Ngula ka kwagh wou!”*
5 Tsô a gema agbenger a azurufa la a tsenda ken tempel, a kar a due a za sende iyol na.+
6 Kpa upristi mba tamen kura agbenger a azurufa la, ve kaa ér: “Doo u a haa a shin icighan akwati u inyar ga, sha ci u ka inyaregh ki awambegh.”
7 Mba tumen idyu kera yô, ve gema inyaregh kira ve yam ijiir i ormaantyegh, ve ver ér i lu ijiir i iin mba van a va.
8 Maa i hingir u yilan ijiir la ér Inya i Awambe+ zan zan nyian.
9 Nahan kwagh u i ôr sha ikyev i profeti Yeremia la maa kure sha mi, ér: “Ve kura agbenger a azurufa 30 a i lumun u kimbin sha ityough ki or shon yô. Man lu ishe i ônov mba Iserael mbagenev nenge ér a kuma sha mi je la,
10 ve gema a ve yam ijiir i ormaantyegh a mi, vough er Yehova* kaam nahan.”+
11 Yesu va til sha ishigh ki gomna yô, gomna pine un ér: “U ngu Tor u Mbayuda?” Yesu gema kaa a na ér: “U kaa vough.”+
12 Er upristi mba tamen man mbatamen lu wan un akaa iyol nahan kpa, a bugh zwa sha ma kwagh môm ga.+
13 Tsô Pilatu pine un ér: “U ungwa akaa kpishi a ve lu eren shiada sha mi sha a we la kpa?”
14 Kpa a bugh zwa a na sha ma kwagh môm ga, nahan kpiligh gomna iyol kpishi.
15 Hanma shighe u yange a eren iniongo yô, gomna a pase or môm ken mba i wuhe ve ken purusu la; or u ikpelaior i̱ soo la cii.+
16 Nahan hen shighe ne, i wuhe iferor ugen ken purusu, u i fa un wuee yô, i yilan un ér Baraba.
17 Nahan mba va kohol imôngo yô, Pilatu pine ve ér: “Ka an ne soo ner m pase nan sha ci wene? Ka Baraba shin ka Yesu u i kaan ér ngu Kristu laa?”
18 Sha ci u Pilatu fa er i lu iyuhwe i ne ve ve va yer Yesu ijir hen a na yô.
19 Bee kera yô, er tema sha ikyônough nagh ki ôron ijir la, kwase na tindi i va kaa un ér: “Dugh ave ou sha kwagh u orperapera la sha, sha ci u m ya ican nyian sha mnyam ma ma ciem sha kwagh na la kpishi.”
20 Kpa upristi mba tamen man mbatamen tuur ikpelaior la ken ityô ér ve̱ ôr i pase ve Baraba,+ kpa Yesu yô, i̱ wua un.+
21 Gomna gema kaa a ve ér: “Ken ve mba uhar mban yô, ka an ne soo ner m pase nana?” Ve kaa ér: “Ka Baraba.”
22 Pilatu pine ve ér: “Tsô ka nyi m̱ er a Yesu u i kaan ér ngu Kristu nee?” Ve cii ve kaa ér: “I za mande un sha kon!”*+
23 A pine ve ér: “Sha ci u nyi? Ka nyi kwaghbo a ere?” Kpa ve lu hemban ngoron a ngor cii, ér: “I za mande un sha kon!”+
24 Pilatu nengen ér un ngu nôngon kpa ka gban sha mi ga, ayôôso nga hemban taver a taver yô, a tôô mngerem a ôô ave na sha ashe a ikpelaior la cii, a kaa ér: “M ngu a ibo sha awambe a or ne ga. Mase shin kwagh wen.”
25 Tsô ior mbara cii gema kaa ér: “Ibo i awambe na i lu sha a vese kua ônov asev.”+
26 Tsô a pase Baraba, a gema a na zwa i gbidye Yesu,+ shi a gema un a na ér i za mande sha kon.+
27 Nahan ushoja mba gomna mbara yem a Yesu ken iyagh ki gomna, ve za kohol ikyum i ushoja cii va kase un.+
28 Ve er un akondo, ve tôô ikyondo i cirin i nyian bong ve haa un iyol,+
29 shi ve tume idyer i tor sha usaa ve cir un sha ityo, shi ve wa un aga ken uwegh ku iyanegh. Ve gure sha ishigh nagh ve gba nahan un tar kaan ér: “Se mba sughun we, Tor u Mbayuda!”
30 Shi ve ta un azer iyol,+ maa ve ngohol aga la ve gba gbidyen un sha ityo.
31 Mba nahan un tar kera yô, ve mase saghen un ikyondo i cirin iyol la, ve gema akondo a na la ve haa un iyol, maa ve gba yemen a na u za manden un sha kon.+
32 Er ve lu yemen la, ve zua a orgen u ken Shirene, i yilan un ér Shimon. Ve kighir un ér a tôô kon u za manden Yesu sha mi la.*+
33 Tsô ve va nyôr hen ijiir igen, i yilan ér Gologota, inja na yô ér, Ijiir i Igbôndotyo.+
34 Maa ve na un wain u i nungwa kwagh* u yuan sha mi yô.+ Kpa benden sha zwa yô, a venda u man.
35 Mba manden un sha kon kera yô, ve er ishor sha akondo a na, ve kar a ker ayol a ve,+
36 shi ve tema her ve lu kuran un.
37 Shi ve nger ityôkyaa i kuugh na la ve mande sha kon la sha ityough nagh. Ve nger ér: “Ka Yesu, Tor u Mbayuda je Ne.”+
38 Shi i mande mbaiv uhar sha kon ikyua a na, u môm ken uwegh nagh ku iyanegh, ugen ken uwegh nagh ku imesegh.+
39 Nahan mbakarengbenda gba lamen sha a na dang dang,+ jingir ityough+
40 kaan ér: “We u u hemben tempel, u hiden u maan ken ayange atar ne,+ yima ase iyol you! Wea lu wan u Aôndo yô, hungwa ase sha kon* ne!”+
41 Upristi mba tamen man mbangeren kua mbatamen mbara kpa gba nahan un tar, kaan ér:+
42 “A yima mbagenev; kpa ngu fantyô u yiman iyol na ga! Ngu Tor u Iserael;+ yô a̱ hungwa ase sha kon* ne, nahan se na un jighjigh.
43 A suur sha Aôndo, nahan de ase Aôndo a yima un, aluer A soo un yô.+ Gadia a kaa ér ‘M ngu Wan u Aôndo.’”+
44 Mbaiv mba i mande ve sha kon ikyua ikyua a na la je kpa, lu lahan un.+
45 Tsô ime wa hen tar la cii, hii er ahwa 12 atetan nahan* zan zan va kighir er ahwa atar* atetan nahan.+
46 Ka va kom er ahwa atar atetan nahan yô, Yesu ôr kwagh genger genger kaa ér, “Eli, Eli, lama sabatani?” inja na yô ér, “Aôndo wam, Aôndo wam, er nan u undumu?”+
47 Mbagen ken mba ve tile her la mba ongo nahan yô, ve gba kaan ér: “Or ne ngu yilan Eliya.”+
48 Nahan fese je, orgen ken a ve yevese za tôô soso wa shin wain u angen gema shindi sha aga, na un ér a ma.+
49 Kpa mbagenev cii gema kaa ér: “De un nen! De se nenge Eliya una va yima un yô.”
50 Kpa Yesu shi ôr kwagh genger genger, maa sule.*+
51 Tsô ikyondo i yisan i ken tempel+ la pav,+ hii sha tume shin inya,+ shi tar tenger, avande kpaa pav.
52 Shi iwar bugh, nahan akom a uicighanmbaiorov kpishi mba ve vande kpen kera yô, due sha,
53 (shighe u i nder un shin ku la, mbagenev kar hen iwar la nyôr ken icighan gar), nahan ior kpishi nenge a ve.*
54 Kpa zum u orshoja u vesen man mbagenev mba ve lu kuran Yesu a na imôngo la nenge er tar tenger shi akaa ne lu eren yô, cier ve iyol kpishi, nahan ve kaa ér: “Sha mimi yô, or ne lu Wan u Aôndo.”+
55 Shi kasev kpishi tile ken ica lu kenger. Lu kasev mba yange ve due ken Galilia ve za a Yesu imôngo sha u za nan un iwasen yô.+
56 Ken a ve yô, lu Maria Madalina man Maria ngô u Yakobu man Yose, kua ngô u ônov mba Sebedeu.+
57 Nahan iyange ngur been yô, ornyar ugen ken Arematia va, i yilan un ér Yosev. Un kpa yange hingir orhenen u Yesu.+
58 Or ne va hen Pilatu, va pine ian i tôôn ikyom i Yesu.+ Tsô Pilatu na zwa ér i na un i.+
59 Yosev maa tôô ikyom la, kange ken ikyondo i dedoo,+
60 za ii ken uwar u he,+ u yange time ken vande yô. A menger zegeiwen a cir sha zwa u uwar shon, maa a yem.
61 Kpa Maria Madalina man Maria ugen la tema hen kpe u uwar la, lu her.+
62 Sev mbu aven yô, ka sev mbu dondon sha Iyange i Kohol Iyol la je la,+ upristi mba tamen man Mbafarishi va hen Pilatu,
63 ve va kaa a na ér: “Orvesen, se umbur, shighe u or u tsughun ior ne lu uma la kaa ér, ‘Ayange a karen atar yô, a nderem shin ku.’+
64 Sha nahan yô, kaa i za kura uwar la zan zan iyange i sha utar la, sha er mbahenen nav ve de za iin un,+ ve geman ve kaan a ior ér, ‘I nder un shin ku!’ ga yô. Vea er nahan yô, aie u masetyô ne una hemba vihin a u hiihii la.”
65 Pilatu kaa a ve ér: “Mbakuran mban. Yô, za kura nen u er ne fe la cii.”
66 Tsô ve yem ve za cir iwen i sha uwar la gbang gbang shi ve ver mbakuran her.
Ngeren mba shin kpe
^ Shin “Ngula ka zayol wou!”
^ Nenge Ngeren u Seer u A5 la.
^ Shin “kon u manden or sha mi.” Nenge Ngeren u Pasen Asember.
^ Nenge Ngeren u Pasen Asember, “Kon u manden or sha mi.”
^ Shin “zarkwagh.”
^ Nenge Ngeren u Pasen Asember.
^ Nenge Ngeren u Pasen Asember.
^ Zwa Grika, “er ihwa i sha ataratar nahan.” Yange i hii u ôron ahwa ne pepe shighe u iyange ka i hii u duen la.
^ Zwa Grika, “ihwa i sha utaankarunyiin.”
^ Shin “a kpe.”
^ Ikyav tese ér lu ikyom i uicighanmbaiorov mba i ôr kwagh ve ken ivur i sha 52 la.
