Sha Uwegh ku Mateu 14:1-36
14 Sha ayange la, Herode u hemen haregh* shon la ungwa ibaver sha kwagh u Yesu.+
2 Nahan a kaa a mbatomov nav ér: “Ka Yohane u Eren Batisema i nder un shin ku ve, a lu eren ityom i kpilighyol ne* ye.”+
3 Herode yange kôr Yohane haa un ahye, za wuhe ken purusu sha ikyaa i Herodia. Herodia lu kwase u Filibu, anmgbian u Herode.+
4 Gadia Yohane zer kaan a na ér: “U vôso kwase la ka shami ga.”+
5 Nahan Herode soo u wuan Yohane, kpa lu cian ikpelaior, sha ci u ve nenge ér Yohane ka profeti.+
6 Kpa zum u i lu eren iniongo i ember iyangemar i Herode yô,+ wan u Herodia u kwase vine amar hen iniongo la doo Herode kpishi.+
7 Nahan a tôndo zwa shi a bum ér una na un nyityôkwagh i a sen cii.
8 Tsô ngô u wankwase la za wa un kwagh, nahan wankwase la va ôr a tor ér: “Nam ityough ki Yohane u Eren Batisema la sha pelengi heen.”+
9 Kwagh ne doo tor ga, nahan kpa, er vande bumun sha ishigh ki mba ve lu yan kwagh vea na la yô, a tindi ér i va na wankwase la kwagh u a kaa la.
10 Nahan a tindi i za gber Yohane ityough ken purusu,
11 i va a ki sha pelengi i va na wankwase la, a yem a mi a za na ngô na.
12 Tsô mbahenen mba Yohane va tôô ikyom na za ii, maa ve hide ve va ôr Yesu.
13 Yesu ungwan kwagh ne yô, a mough hen ape lu la, a nyôr tso a yem hen ijiir i or lu her ga yô, sha u una za lu her tswen. Kpa ior kpishi mba fe nahan yô, ve due ken agar a ve, ve dondo un ijime angahar.+
14 Va duen sha tar yô, a nenge a ikpelaior i vesen, tsô kunya kôr un a ve,+ nahan a bee ior vev mba ve lu uange la cii iangev vev.+
15 Kpa iyange va been yô, mbahenen nav va kaa a na ér: “Gar ngu ikyua heen ga, man shighe kpa za hegen. Yô na ikpelaior ne ian ve̱ yem ken agar a kiriki ve za yam kwaghyan.”+
16 Yesu gema kaa a ve ér: “Ve de gbe yemen nahan ga, na nen ve kwagh ve ya.”
17 Kpa ve kaa a na ér: “Ka ikpenberedi itian man ishu ihiar tseegh se lu a mi heen ye.”
18 A kaa ér: “Vam nen a mi heen.”
19 Tsô a kaa ikpelaior la shar inya sha toho. A tôô ikpenberedi i itian man ishu i ihiar la, a gema a kenger sha, a er msen,*+ maa a coon ikpenberedi la a na mbahenen nav, mbahenen mbara di gema na ikpelaior la.
20 Nahan ior cii ya kuma ve, shi ve kohol avur a a neer yô, iv akese 12 poo poo.+
21 Ken mba ve ya la, nomso kuma er 5,000 nahan, i wa iyenge i kasev man mbayev ker ga.+
22 Tsô a kera ngôôr ga je maa a kaa a mbahenen nav ér ve za nyôr tso ve hemen a na, ve per yande la, un una na ikpelaior la gbenda ve yem.+
23 Ne ikpelaior la gbenda i yemen yô, a kar a yem sha uwo tswen, u za eren msen. Ime va hii u wan,+ kpa lu her tswen.
24 Hen shighe ne nahan tso la lu ken mnger ica a kpetar.* Er ve ver ishigh sha ahumbe yô, agôndoamnger lu tan sha tso, nahan ve lu nahan sha ican.
25 Sev mbu va hiin u aven* yô, Yesu lu zenden sha kwavmnger van ape ve lu la.
26 Mbahenen nav mba nengen a na zenden sha zegemnger yô, cier ve iyol, tsô ve gba pinen ér: “Ka mnyamciem shinii?” Nahan ve gba ngoron sha mcie.
27 Kpa fese je Yesu ôr kwagh a ve kaa ér: “Taver nen ishima. Ka mo; de cie nen ga.”+
28 Peteru gema kaa a na ér: “Tere, a lu we yô kaam m zende sha kwavmnger m va kohol we.”
29 A kaa ér: “Va!” Tsô Peteru due shin tso gba zenden sha kwavmnger zan ape Yesu lu la.
30 Kpa gem kenger ijeverahumbe la yô, cier un iyol. Maa a hii u miren, nahan a ngor a kaa ér: “Tere, yimam!”
31 Fese je Yesu naregh uwegh kôr un, a kaa a na ér: “Ka nyi man u te akperana? Jighjigh u nan wou vese ga tsôô!”+
32 Mba za nyer shin tso yô, ijeverahumbe la maa de.
33 Nahan mba ve lu shin tso la gure un inya* kaa ér: “Mimi je, u ngu wan u Aôndo.”
34 Tsô ve per ve due sha kpetar hen Genesareti.+
35 Ior mba hen ijiir la mba kaven un yô, ve tindi i kaa mba hen ningirtar la cii, nahan ior va un a mba ve lu dedoo ga la cii.
36 Ve zamber a na ér ma ve bende a tsumbur u ikyondo na tseegh tsô.+ Nahan mba ve bende a mi la cii angev vev bee vindi vindi.
