Sha Uwegh ku Mateu 13:1-58

  • ANZAAKAA A SHA KWAGH U TARTOR (1-52)

    • Ortanivor (1-9)

    • Ityôkyaa i Yesu ôron kwagh sha anzaakaa yô (10-17)

    • I pase injakwagh i ortanivor la (18-23)

    • Alakema man toho (24-30)

    • Ishange i masetadi man kwa (31-33)

    • U ôron kwagh sha anzaakaa la kure kwaghôron u profeti (34, 35)

    • I pase injakwagh i alakema man toho la (36-43)

    • Kwagh u injaa u lun myer man tagbede u injaa (44-46)

    • Kper u kpelan (47-50)

    • Akaainjaa a he man a tse (51, 52)

  • I venda Yesu hen ijiir na (53-58)

13  Sha iyange shon la, Yesu due ken iyou la za tema hen kpezegemnger. 2  Tsô zegeikpelaior va kase un je yô, a nyôr a tema shin tso. Nahan ikpelaior la cii va tile hen kpemnger.+ 3  Tsô a ôr ve akaa kpishi sha anzaakaa,+ a kaa ér: “Orsule ugen yar lu tan ivor.+ 4  Er lu tan ivor la, isham igen haa sha kpegbenda, nahan inyon va ya i.+ 5  Igen haa sha vande, ape inya lu kpishi ga yô, nahan fese je, i mende sha ci u inya civir her ga.+ 6  Kpa iyange duen yô, oo ta i, maa i use, sha ci u i wa amise ga. 7  Igen haa ken usaa, nahan usaa vese imbishi i.+ 8  Igen gema haa sha inya i dedoo, tsô i gba umen atam, igen ker ume atam hemba er yange i lôô la kwa 100, igen kwa 60, igen di kwa 30.+ 9  Or u nan lu a ato yô, nana̱ ungwa.”+ 10  Nahan mbahenen nav va pine un ér: “Er nan ve ka u ôron ve kwagh sha anzaakaa?”+ 11  A gema a kaa a ve ér: “Ne yô, i na ne sha u ne kav akaamyer+ a sha kwagh u Tartor u sha, kpa ve yô, ka nahan ga. 12  Gadia or u nan lu a kwagh yô, a seer nan, nana lu a mi kpishi. Kpa or u nan lu a kwagh ga yô, kwagh u nan henen ér nan ngu a mi la je kpa a ngohol kera.+ 13  Ka nahan ve ka m ôron ve kwagh sha anzaakaa ye. Gadia ka vea kenger kpa ve kaven ga, shi vea ungwan kpa ve ungwan tumbuluu, ve kaven inja i kwagh shon ga.+ 14  Nahan kwaghôron u profeti u Yesaia la kure sha a ve. A kaa ér: ‘Né ungwa, kpa mayange né kav inja i kwagh shon ga, shi né nenge, kpa mayange né kav je ga.+ 15  Gadia asema a ior mban cighir. Ato a ve ungwa, kpa ve wa ikyo ga. Shi ve kusu ashe a ve, sha er mayange vea nenge sha ashe a ve ga, shin vea ungwa ken ato a ve, vea kav inja i kwagh shon, sha u vea gema asema, nahan m bee ve angev kpaa ga.’+ 16  “Nahan kpa, saan ne iyol sha ci u ashe a en nga nengen, shi ato a en kpaa nga ungwan.+ 17  Mimi je me kaa ne, uprofeti man mbaperapera kpishi yange sar ve u nengen a akaa a ne lu nengen a mi ne, kpa ve nenge a a ga.+ Shi sar ve u ungwan akaa a ne lu ungwan ne, kpa ve ungwa a ga. 18  “Yô ver ase nen ato m pase ne injakwagh i sha kwagh u ortanivor la.+ 19  Or u nan ongo loho* u Tartor kpa nan kav u ga yô, iferor+ ka a va tsue kwagh u i lee ken ishima i nan la kera. Or ne nan ngu er ka ivor i i hee sha kpegbenda la nahan.+ 20  Ivor i i hee sha vande la di ka or u ka nan ungwa loho la, maa fese je nan ngohol u a iember yô.+ 21  Nahan kpa, er nan we amise ga yô, ka nan za hemen sha anshighe kpuaa. Kpa nana̱ va nguren yan ican shin a tôvon nan a ican sha ci u loho la yô, nan gba fele. 22  Ivor i i hee ken usaa la ka or u ka nan ungwa loho la, kpa ishimanyian i sha akaa a tar ne*+ kua tahav mbu tsughun or mbu inyaregh ki lu a mi la ka ve imbishi loho shon u kera ume atam ga la.+ 23  Kpa ivor i i hee sha inya i dedoo la yô, ka or u ka nan ungwa loho la shi nan kav inja i u la. Imbaor la ka nan ume atam shi nan tser kpishi, orgen kwa 100, orgen kwa 60, orgen di kwa 30.”+ 24  A shi a ôr ve injakwagh igen a kaa ér: “Tartor u sha ngu er orsule u yange ta ivor i alakema* ken sule na nahan. 25  Zum u ior lu yaven yô, orhyom na va ta ishamtoho* ken alakema, maa yem. 26  Alakema la vesen shi maren yô, toho la kpa due. 27  Nahan mbatomov mba orsule la va pine un ér: ‘Orvesen, ka ivor i alakema yange u lôô ken sule wou gaa? Man er nan ve toho u lu kere?’ 28  A gema a kaa a ve ér, ‘Ka orhyom nan er kwagh ne ye.’+ Mbatomov mbara pine un ér, ‘Nahan u soo wer se za wuhe u keraa?’ 29  A kaa ér, ‘Ei, sha ci u alaghga ne za wuhen toho la yô, ne wuhe u a kua alakema. 30  De nen ve cii ve vese imôngo zan zan shighe u sundan. Nahan sha shighe u sunda la, me kaa a mbasundan mbara mer: Vande wuhen nen toho la kange nen aile aile, a za nande; gema kohol nen alakema la za ombo nen ken iyou yam i koson iyiav.’”*+ 31  Shi a ôr ve injakwagh igen a kaa ér: “Tartor u sha ngu er ka ishange i masetadi i̱ or nan tôô nan za lôô ken sule u nan nahan.+ 32  I̱ hemba ndahar ken ishamakaa cii. Kpa ka ia vese yô, i̱ kehe i̱ hemba ahu a iue agen cii, je i̱ va hingir kon. Nahan inyon i purugh i va wa aya sha agbaa a u.” 33  Shi a ôr ve injakwagh igen a kaa ér: “Tartor u sha ngu er kwa u kwase nan tôô nan nungwa sha mwem ma kuman uikyaren mba vesen utar,* ve u ange ma cica cii nahan.”+ 34  Akaa ne cii Yesu ôr ikpelaior la sha anzaakaa. Jim je yô, hanma shighe u una ôron ve kwagh yô, i lu sha anzaakaa,+ 35  sha u kuren kwagh u Aôndo ôr sha ikyev i profeti na la, ér: “Me bugh zwa wam me ôr anzaakaa, me pase akaa a i yer a, hii sha mhii* la je.”+ 36  Tsô ne ikpelaior la gbenda ér ve yem yô, a nyôr ken iyou. Nahan mbahenen va hen a na, va kaa a na ér: “Pase ase se injakwagh i sha kwagh u toho u ken sule la.” 37  A gema a kaa a ve ér: “Or u a te ivor i alakema la ka Wan u or. 38  Sule la yô ka tar.+ Ivor i alakema la di ka ônov mba Tartor. Kpa toho la yô, ka ônov mba iferor.+ 39  Orhyom u a te ishamtoho la ka Diabolo. Sunda la ka shighe u mkur u tar* ne, man mbasundan mbara gema ka mbatyomov mba shaav. 40  Nahan yô, er ka i wuhe toho i nande nahan, kape a lu sha shighe u mkur u tar* ne je la.+ 41  Wan u or una tindi mbatyomov nav, vea kar a hanma kwagh u nan gbeev mbu nôngon cii ken Tartor na kera, kua mba ve peren atindi la cii. 42  Vea haa ve ken atse a usu u yeghen ibyugh ibyugh,+ ape vea vaa je vea wua anyi* yô. 43  Hen shighe la, mbaperapera vea mondo er ka iyange nahan,+ ken Tartor u Ter ve. Or u nan lu a ato yô, nana̱ ungwa. 44  “Tartor u sha ngu er kwagh u injaa u a lu myer ken sule,* u or nan za zough a mi ve shi nan hide nan yer un nahan. Er i saan nan iyol yô, nan yem nan za tee akaa a nan cii nan za yam sule shon.+ 45  “Shi Tartor u sha ngu er or u zenden kpenga, u nan lu keren utagbede mba injaa nahan. 46  Nan za zuan a tagbede u taver ishe kpishi yô, nan hide fese nan za tee akaa a nan cii, nan yam un.+ 47  “Shi Tartor u sha ngu er kper u kpelan u i haa shin zegemnger, i kôr ishu ker anza kposo kposo nahan. 48  Ivin yô, mbakôronishu mbara due a mi sha kpetar, maa ve tema ve sange i dedoo la+ ve haa ken uikya, kpa i doon ga la+ ve haa kera. 49  Kape a lu sha shighe u mkur u tar* ne je la. Mbatyomov vea due vea pav aferaior kposo a mbaperapera, 50  vea kende ve ken atse a usu u yeghen ibyugh ibyugh, ape vea vaa je vea wua anyi yô. 51  “Ne kav inja i akaa ne cii kpa?” Ve kaa a na ér: “Een.” 52  Maa a kaa a ve ér: “Sha nahan yô, hanma or u tesen ior, u i tese nan kwagh u Tartor u sha yô, nan ngu er orya u ka nan duen a akaainjaa a he man a tse ken iyou i nan i koson akaainjaa nahan.” 53  Yesu kuren anzaakaa ne yô, a mough her a gba yemen. 54  Va nyer hen ijiir na yô,+ a gba tesen ior ken shinagoge ve, nahan kpiligh ve iyol, ve kaa ér: “Ka han or ne a zough a kwaghfan ne kua tahav mbu eren ityom i kpilighyol* nahana?+ 55  Ka wan u orkapinta ne gaa?+ Ka ngô na i yer ér Maria gaa? Anmgbianev nav mba nomso ka Yakobu man Yosev man Shimon kua Yuda gaa?+ 56  Shi anmgbianev nav mba kasev kpa mba a vese heen cii gaa? Nahan ka han or ne a zough a akaa ne cii ase?”+ 57  Nahan kwagh ne hingir u nan ve gbeev mbu nôngon.+ Kpa Yesu gema kaa a ve ér: “Profeti banen a icivir ga, saa hen ijiir i nan man hen ya u nan tseegh tsô.”+ 58  Maa a kera er ityom i kpilighyol her kpishi ga, sha ci u ve ban a jighjigh u nan yum.

Ngeren mba shin kpe

^ Zwa Grika, “kwaghôron.”
^ Shin “kov ne.” Nenge Ngeren u Pasen Asember.
^ Zwa Grika, “ivor i dedoo.”
^ Toho ne bee alakema, kpa gema ka toho u bo.
^ Shin “za ombom nen ken ityumbe.”
^ Zwa Grika, “usea utar.” Ka ikyaren i mwem ma yuhwan kuman er ukilogeram 10 nahan.
^ Shin a fatyô u kaan ér, “sha igbetar.”
^ Ikyav i tesen ér mba nyoon ishima shi kwagh hemba ve.
^ Shin “ken tsa.”
^ Shin “eren uivande.”

Copyrights for this publication