Sha Uwegh ku Mateu 17:1-27
17 Ayange nga karen ataratar yô, Yesu mough a Peteru man Yakobu vea anmgbian na Yohane yem a ve sha uwo u taven tsung, ve za lu her ve tseegh.+
2 Tsô ve nenge i gema mluyol u Yesu; ishigh nagh mondo er iyange nahan, shi akondo a a haa iyol la engem* er iwanger nahan.+
3 Ica i gbe ga yô, ve nenge Mose man Eliya lu lamen vea na.
4 Maa Peteru kaa a Yesu ér: “Tere, doo kpishi er se lu heen yô. Wea nenge a doo u yô, me tim atumbe atar heen, i môm sha ci wou, i môm sha ci u Mose, igen di sha ci u Eliya.”
5 Er lu lamen zan a mi ave la je, ibyeenegh ki wanger va cir ve, maa imo due ken ibyeenegh kira kaa ér: “Ngun ka Wan wam u ishima ishima. Doom a na.+ Ungwan nen un.”+
6 Mbahenen mbara mba ongo nahan yô, cier ve iyol, ve gba ve cir ishigh inya.
7 Tsô Yesu va ikyua a ve, va kpoghor ve, kaa ér: “Mough nen sha. De cie nen ga.”
8 Mba moughon ityough sha yô, ve kera nenge a orgen ga, lu Yesu tseegh.
9 Mba ngur hungwan sha uwo la yô, Yesu ta ve icin ér: “De er nen or môm mpase u sha mnenge ne ga, zan zan saa a va nder Wan u or shin ku.”+
10 Kpa mbahenen pine un ér: “Man er nan ve mbangeren ka ve kaa ér gba u Eliya una vande vana?”+
11 A gema a kaa ér: “Ka mimi, Eliya ngu van, shi una va sôr akaa cii.+
12 Nahan kpa, m ngu kaan ne, Eliya vande van kera, kpa ve kav un ga, ve gema ve er hanma kwagh u ve soo cii a na.+ Kape Wan u or kpaa una va ya ican sha ikyev ve je la.”+
13 Maa mbahenen kav er lu Yohane u Eren Batisema lu ôron ve kwagh na yô.
14 Mba va zurum a ikpelaior yô,+ orgen za va, va gure un inya kaa ér:
15 “Tere, zungwe wan wam mhôônom, sha ci u gbe ikyungu shi doo un iyol ga. Ka a shi gban sha atse kua shin mnger.+
16 M va a na hen mbahenen ou, kpa ve fatyô u been un angev ga.”
17 Yesu gema kaa ér: “Kpash! Kov u banen a jighjigh man u hemban ato ne.+ Me lu a ven a kuma nena je man ne lu a jighjigh u nan sha wono? M̱ wa ishima a ven i̱ kuma nan je? Vam a na heen.”
18 Mba ve a na yô, Yesu zenda jijingi u bo* la due ken wan la kera, maa her* je angev nav bee.+
19 Tsô mbahenen va hen Yesu ve tseegh, va pine un ér: “Er nan man se se fetyô u zendan jijingi shon kera ga?”
20 A kaa a ve ér: “Ka sha ci u jighjigh u nan wen kuma ga. Mimi je me kaa ne, aluer ne mba a anjighjigh u nan er ishange i masetadi nahan tseegh kpa, ne fatyô u kaan a uwo ne ner, ‘Mough heen yem heela,’ maa ua mough, shi kwagh môm una hemba ne ga.”+
21 * ——
22 Zum u ve kohol imôngo ken Galilia yô, Yesu kaa a ve ér: “Ka u a za zua zwa a na Wan u or sha ikyev i ior,+
23 vea wua un, kpa sha iyange i sha utar la, a nder un shin ku.”+ Nahan ve ure tsung.
24 Mba va nyer ken Kapenaum yô, mba ngohol kpandegh ku tempel* va pine Peteru ér: “Ortesen wou te kpandegh ku tempel je kpa?”+
25 A kaa ér: “Een, te.” Kpa va nyer ken iyou yô, Yesu hii lamen a na, a pine un ér: “Shimon, u nenge nena? Ka hen unô utor mba tar ne ka ve sav kasua* shin ve ngohol kpandegh? Ka hen ônov vev shin ka hen mbageneve?”
26 A kaa ér: “Ka hen mbagenev.” Maa Yesu kaa ér: “Nahan yô, mimi je gba u ônov vea taan kpandegh ga.
27 Kpa, u nan ve gbeev mbu nôngon ga yô,+ za shin kpezegemnger, za kende tsue. Nahan ishu i u hii tsuen la, bugh zwa u i, maa u nenge a gbenger azurufa* ker. Dugh va na ve sha ci wam man ci wou.”
Ngeren mba shin kpe
^ Shin “kungu.”
^ Zwa Grika, “jijingi u hôngorough.”
^ Zwa Grika, “hen ihwa la.”
^ Nenge Ngeren u Seer u A3 la.
^ Zwa Grika, “kpandegh ku uderakema uhar.” Nenge Ngeren u Seer u B14 la.
^ Shin “ve ngohol mtsera ve sha ikyav mbi mbakasuav.”
^ Zwa Grika, “gbenger seteta.” Ka uderakema unyiin je la. Nenge Ngeren u Seer u B14 la.
