Sha Uwegh ku Mateu 16:1-28
16 Tsô Mbafarishi man Mbasadushi va hen a na sha u va karen un. Ve kaa ér a er ivande ken iti i Aôndo vea nenge.+
2 A gema a kaa a ve ér: “Ka a lu aikighe yô, ne kaa ner, ‘Ura ua nôô ga, sha ci u wanger sha kwavaôndo.’
3 A lu pepe yô, ne kaa ner, ‘Wanger sha kwavaôndo nyian ga, nahan ura ua nôô; kwavaôndo nyian kpa abeen gema yuhwa sha.’ Ne fa u pasen akaa a sha kwavaôndo, kpa ne mba fetyô u kaven inja i akaa a a lu eren ne ga.
4 Kov u ifer man u idyaa* ne zer keren ivande, kpa a tese u ivande igen ga,+ saa ivande i Yona la tseegh.”+ Maa a kar a yem, a undu ve her.
5 Tsô mbahenen per yande la, kpa hungur ve u tôôn beredi.+
6 Yesu kaa a ve ér: “Wa nen ikyo sha er Mbafarishi man Mbasadushi vea hôngor ne sha kwa ve la ga yô.”+
7 Maa ve gba lamen ker ayol a ve kaan ér: “Se tôô beredi ga cii.”
8 Yesu kaven nahan yô, a kaa ér: “Er nan man ne lu ôron ker ayol a en ner ne tôô beredi ga ase? Jighjigh u nan wen vese ga tsôô!
9 Ne mba a kav kwagh u m lu ôron je gaa? Shin ne umbur kwagh u ikpenberedi i itian i yange m koso iorov* 5,000 a mi, man er ve ya neer, ne kohol avur iv akese kpishi la ga?+
10 Man ikpenberedi i itiankarihiar i iorov* 4,000 ya neer la, lu akese a vesen a me ne kohol avur shimi?+
11 M ôr kwagh u beredi a ven ga, man er nan ve ne lu kaven ga? Kpa wa nen ikyo sha er Mbafarishi man Mbasadushi vea hôngor ne sha kwa ve la ga yô.”+
12 Maa baver ve er lu kwa u wan sha beredi kaa ér ve wa ikyo sha mi ga, kpa lu ityesen i Mbafarishi man Mbasadushi yô.
13 Yesu va nyer hen haregh u Sesaria Filipi yô, a pine mbahenen nav ér: “Ior mba kaan ér Wan u or ka ana?”+
14 Ve kaa ér: “Mbagenev mba kaan ér u ngu Yohane u Eren Batisema,+ mbagen di mba kaan ér u ngu Eliya,+ mbagen ér u ngu Yeremia shin môm ken uprofeti mbagenev.”
15 A pine ve ér: “Ne yô, ne mba kaan ner m ngu ana?”
16 Shimon Peteru kaa ér: “We u ngu Kristu,+ Wan u Aôndo u uma.”+
17 Yesu kaa a na ér: “I saan we iyol Shimon wan u Yona, sha ci u ka orumace* nan pase u kwagh ne ga, kpa ka Terem u a lu sha la a pase u ye.+
18 Shi m kaan we ne, u ngu Peteru,+ man ka sha vande ne je+ me maa nongo wam ye. Man ihinda i Uwar* kpa ia hemba u agee ga.
19 Me na u akii a Tartor u sha, nahan hanma kwagh u u kange shin tar ne yô, a lu u i vande kangen sha yô; shi hanma kwagh u u sagh shin tar ne yô, a lu u i vande saghen sha yô.”
20 Maa a ta mbahenen nav icin gbang gbang ér ve de pasen or môm ér un ngu Kristu ga.+
21 Hii hen shighe la je, Yesu hii u ôron a mbahenen nav ér gba keng u una za ken Yerusalem una za ya atsan kpishi sha ikyev i mbatamen man upristi mba tamen man mbangeren, shi a wua un, kpa sha iyange i sha utar la, a nder un shin ku.+
22 Tsô Peteru ta ibyalegh a na gba za vendan a na kaan ér: “Tere, de ôron imbakwagh la sha iyol you ga; mayange kwagh a er u nahan ga.”+
23 Kpa a gema ijime a na Peteru, maa a kaa a na ér: “Kar hidem ken ijime, Satan!* U ngu kwagh u nan mo gbeev mbu nôngon, sha ci u u ngu a mhen u Aôndo ga, kpa ka u ior.”+
24 Tsô Yesu kaa a mbahenen nav ér: “Aluer or soo u dondon mo yô, nana̱ nyiman iyol i nan* nana̱ tôô kon* u nan nana̱ dondo sha a mo gbem.+
25 Gadia hanma or u nan keren ér nana war uma u nan yô, una saa nan. Kpa or u uma u nan a saa nan sha ci wam yô, nana gema a zua a mi.+
26 Mimi je, aluer or zua a tar cii kpa uma u nan gema saa nan yô, a lu nan a inja sha nyi?+ Shin ka nyi or a na sha ci u uma u nana?+
27 Gadia ka u Wan u or una va sha iengem i Ter na vea mbatyomov nav, una va kimbi hanma or injar sha ieren i nan.+
28 Mimi je me kaa ne, mbagenev ken mba ve til heen ne vea nenge a ku ashe ga, zan zan vea vande nengen a Wan u or una lu van ken Tartor na.”+
Ngeren mba shin kpe
^ Shin “kov u civir Aôndo sha mimi ga.”
^ Shin “nomso.”
^ Shin “nomso.”
^ Zwa Grika, “iyol i inyam man awambe.”
^ Shin “Hade,” ka uwar u uumace je la. Nenge Ngeren u Pasen Asember.
^ Heen ne, Yesu lu yilan Peteru ér “orhendankwagh,” sha ci u inja i iti i “Satan” la ér orhendankwagh.
^ Shin “gba u nana kera lu uma sha ci u nan iyol i nan ga.”
^ Shin “kon u manden or sha mi.” Nenge Ngeren u Pasen Asember.
