Sha Uwegh ku Mateu 12:1-50
-
Yesu ka “Ter u Iyange i Memen” (1-8)
-
I bee or u uman uwegh iwan (9-14)
-
Ortom u doon Aôndo ishima (15-21)
-
I zenda azôv ken ior kera sha icighan jijingi (22-30)
-
Isholibo i or a er ve a de nan ga yô (31, 32)
-
Mba fe kon sha ityamegh ki u (33-37)
-
Ivande i Yona (38-42)
-
Zum u jijingi u bo a za cin a hide hen or yô (43-45)
-
Ngô u Yesu man anmgbianev nav (46-50)
12 Sha shighe ugen la, Yesu lu karen ken ishule i samuyia sha Iyange i Memen. Er ijen kôr mbahenen nav yô, ve gba tôndon asagher a uyia yan.+
2 Mbafarishi mba nengen nahan yô, ve kaa a na ér: “Nenge, mbahenen ou mba eren kwagh u tindi a yange ér i de eren sha Iyange i Memen ga yô.”+
3 A kaa a ve ér: “Ne ôr kwagh u Davidi yange er shighe u ijen kôr un kua nomso mba ve lu a na imôngo la gaa?+
4 Ne umbur er yange nyôr ken iyou i Aôndo za ya ikpenberedi i i ver sha ishigh ki Aôndo,+ i tindi tese* ér un shin mba ve lu a na la cii ve kuma u yan ga, saa upristi tseegh la gaa?+
5 Shin ne ôr ken Tindi er ka a lu sha Iyange i Memen kpa upristi mba ve eren tom ken tempel la ve per tindi u Iyange i Memen, kpa ve lu a ishô her la gaa?+
6 Yô me kaa ne, or ngu heen u a hembe tempel yô.+
7 Nahan kpa, luun er ne kav inja i mkaanem ma ma kaa ér, ‘M soo ka mhôônom ma zungwen,+ ka nagh ku nanden ga’+ la yô, ma ne ne mbaishôôv ibo ga.
8 Gadia Wan u or ka Ter u Iyange i Memen.”+
9 Karen hen ijiir la kera yô, a yem ken shinagoge ve.
10 Yô nenge! orgen gema lu ker u uma* uwegh yô!+ Tsô ve pine Yesu ér, “Tindi na ian ér i bee or angev sha Iyange i Memenee?” Ve pine nahan sha er vea zua a ityôkyaa i nan un ibo yô.+
11 A gema a kaa a ve ér: “Ka an ken a ven nana lu a iyôngo i môm man ia gba shin ihyungwa sha Iyange i Memen ve, nana kôr i nana due a mi ga?+
12 Kpa orumace gba kwagh hemba iyôngo ica je! Nahan tindi yange u eren kwagh u dedoo sha Iyange i Memen ga.”
13 Maa a kaa a or la ér: “Naregh uwegh ough.” Tsô a naregh ku, maa ku hide ku lu dedoo, er ku genegh kura nahan.
14 Kpa Mbafarishi due za zua zwa ér vea wua Yesu.
15 Yesu va fe nahan yô, a mough her kera. Ior kpishi dondo un ijime,+ nahan a bee ve iangev vev cii.
16 Kpa a ta ve icin gbang gbang ér ve de pasen ior or u un lu ga,+
17 sha u kuren kwagh u Aôndo pase sha ikyev i profeti Yesaia la, ér:
18 “Nenge! Ngun ka wanye wam+ u m tsough yô. Ka Wan wam u ishima ishima, u i doom a na yô!+ Me haa jijingi wam sha a na,+ nahan una na akuraior aa fa kwagh u a lu ijirôron i mimi la wang.
19 Una zôhô ga,+ shi una ngor ga; or a ungwa imo na sha ugodobi mba vesen* kpaa ga.
20 Una mase kever ijinga i sombon ga. Shi una pir tsar u yughur mnyim ga,+ zan zan una kar van a ijirôron i mimi.
21 Ka sha iti na je akuraior cii aa veren ishima aa keghen ye.”+
22 Tsô ve va un a orgen u azôv lu nzughul a na, u pir ashe shi kondo ikyer yô. Nahan a zenda azôv la kera, shi a sôr un, maa orkondonikyer shon hii u lamen shi gba nengen.
23 Nahan kunda ikpelaior la iyol, ve gba pinen ér: “Alaghga tsô a lu Wan u Davidi shon ne gaa?”
24 Mbafarishi mba ongo nahan yô, ve kaa ér: “Or ne gbe zendan azôv ken ior kera ga, saa sha tahav mbu Belesebul,* tor u azôv.”+
25 Yesu fe mbamhen vev mban yô, a kaa a ve ér: “Hanma tartor u u pav cii yô, ua gba, shi hanma gar shin ya u a pav ker yô, una lu ga.
26 Nahan aluer Satan ngu zendan Satan kera yô, a pav iyol na ker, nahan a er nan je ve tartor na ua gba ga?
27 Shi aluer ka sha tahav mbu Belesebul m zendan azôv ken ior kera yô, ônov enev di mba zendan a sha tahav mbu ana? Ka sha ityôkyaa ne je ônov enev vea va ôr ne ijir ye.
28 Kpa aluer ka sha jijingi u Aôndo m zendan azôv ken ior kera yô, mimi je, Tartor u Aôndo kar ne je ve.+
29 Shin a er nan man or a nyôr hen ya u or u taver iyol nana ngohol nan akaa? Saa nana vande kangen or u taver iyol shon gaa? Ka er nana er nahan la ve, nana fatyô u kuran nan akaa hen ya ye.
30 Or u nan lu ken nongo wam ga yô, nan ngu hendan a mo, shi or u nan wasen mo u kohol ga yô, nan ngu saren a sar.+
31 “Sha ityôkyaa ne yô, m ngu kaan a ven mer, nyityô isholibo i or nan er cii a de nan i, aluer nan laha Aôndo kpaa. Kpa or u nan laha jijingi yô, mayange a de nan isholibo la ga.+
32 U tesen ikyav yô, or a lam sha Wan u or dang kpa a de nan isholibo la.+ Kpa aluer or lam sha icighan jijingi dang yô, a de nan isholibo la ga, hegen* shin ken hemen kpaa ga.+
33 “Ne fatyô u lôôn kon u dedoo, nahan ua ume atam a dedoo, shin ne fatyô u lôôn kon u bo, nahan ua ume atam a bo. Gadia mba fe kon sha atam a u.+
34 Ne ônov mba igbindev mban,+ ne mba mbaaferev, nahan a er nan je ve ne ôr kwagh u dedoo? Ka kwagh u or nan hembe henen ken ishima la zwa u nan ka u ôron ye.+
35 Or u dedoo ka nan ôron akaa a dedoo a nan koso ken ishima i nan la, kpa iferor yô, ka nan ôron aferakaa a nan koso ken vanger u nan la.+
36 Me ôr ne, sha Iyange i Ijirigh la, akaa a dang a ior ve ôr cii, a na ve ibo sha mi,+
37 sha ci u ka sha kwaghôron wou a na u ishô ye, shi ka sha kwaghôron wou a na u ibo ye.”
38 Tsô mbangeren man Mbafarishi gema kaa a na ér: “Ortesen, se soo ser ma u er ivande ma se nenge.”+
39 A gema a kaa a ve ér: “Kov u ifer man u idyaa* ne zer keren ivande, kpa a tese u ivande igen ga, saa ivande i profeti Yona la tseegh.+
40 Gadia er Yona lu ken iyav mbu zegeishu ayange atar man aime atar nahan,+ kape Wan u or kpaa una lu shin atô u inyaagh ayange atar man aime atar je la.+
41 Ior i Ninive ia nder shin ku sha shighe u ijirôron la vea kov ne kpa ia na u ibo. Sha ci u Yona yange pase ve loho ve ungwa ve gema asema.+ Kpa nenge ase, or u a hembe Yona ngun heen ne.+
42 A nder torkwase u ken imbusutariyan shin ku sha shighe u ijirôron la vea kov ne kpa una na u ibo. Sha ci u yange mough ken akighir a tar je va u va ungwan kwaghfan u Solomon.+ Kpa nenge ase, or u a hembe Solomon ngun heen ne.+
43 “Jijingi u bo* ka una due ken or kera yô, a yem ken ikyôngo, ape mngerem ma lu ga yô, a za ker ijiir i memen, kpa a zua a mi ga.+
44 Nahan a kaa ér, ‘Me hide me yem ken iyou yam i yange m due ker la.’ Una va sôôn yô, a nenge iyou la i lu gbilin, i ese i wang, i er a i ker doo doo.
45 Maa a yem a za kua a ujijingi mbagenev utaankaruhar mba ve we ifer i hembe un yô, a va mi. Vea va nyôron ken or la yô, ve tema ken a nan. Nahan mlu u or la u masetyô a hemba vihin a u hiihii la.+ Kape kov u ifer ne kpa kwagh a za a u je la.”
46 Er lu lamen a ikpelaior zan a mi la, ngô na man anmgbianev nav+ tile ken won, ve soo u lamen a na.+
47 Nahan orgen kaa a na ér: “Nenge, ngôu man anmgbianev ou va tile ken won, ve soo u lamen a we.”
48 A gema a kaa a or u lam a na la ér: “Ka an nan lu ngômô? Man ka unô ve lu anmgbianev ava?”
49 Maa a tese uwegh sha mbahenen nav, a kaa ér: “Nenge, ngôm man anmgbianev av mban!+
50 Hanma or u nan eren ishima i Terem u a lu sha la cii yô, ka nan nan lu anmgbian wam u nomso man anmgbian wam u kwase man ngôm ye.”+
