Sha Uwegh ku Mateu 23:1-39

KUHWA

De kaven mbangeren man Mbafarishi ga (1-12)
Akaa a aa tser mbangeren man Mbafarishi yô (13-36)
Yesu vaa iyol sha kwagh u Yerusalem (37-39)

23 Tsô Yesu ôr kwagh a ikpelaior man mbahenen nav kaa ér: ² “Mbangeren man Mbafarishi nenge ér ka ityesen i Mose la ve kpa ve tesen ye. ³ Sha nahan yô, eren nen hanma kwagh u ve kaa ne cii, kpa de dondon nen aeren a ve ga, sha ci u mba eren kwagh u ve kaan la ga.+ ⁴ Ka ve kange ikyav mbi yuhwan ve tôô ior sha akende,+ kpa ve ayol a ve yô, ve kegh iyol u benden ihyôwe ve sha mi ga.+ ⁵ Ityom i ve eren cii, ka ve eren i sha u ior ve nenge.+ Ka ve er anikpa ve u wan avur a ruamabera ker u hemban kehen la ve zer sha icul, ér a̱ lu kurayol ve,+ shi ve tume ica i shin akur a akondo a ve kpa i hemba lihen.+ ⁶ Ka vea za hen iniongo yô, ve soo u teman sha ajiir a hemban doon la. Shi ka ve soo u teman sha mkônom ma sha hemen* ken ushinagoge.+ ⁷ Ka ve soo ér i̱ sughun ve sha icivir ken igbar,* shi i̱ yilan ve ér Rabi.* ⁸ Kpa ne yô, i̱ de yer ne ér Rabi ga, sha ci u Ortesen wen ngu môm,+ man ne cii ne mba anmgbianev. ⁹ Heela tseegh ga, de yer nen or môm shin tar ne ner ter ga, gadia Ter wen ngu môm tseegh,+ ka u a lu sha la. ¹⁰ Shi i̱ de yer mô wen ér orhemen ga, sha ci u Orhemen wen ngu môm tseegh, ka Kristu. ¹¹ Kpa or u nan hembe ken a ven yô, a gba u nana lu or u eren ne tom.+ ¹² Or u nan kenden a iyol sha yô, a hide a nan ijime,+ kpa or u nan hiden a iyol ijime yô, a kende a nan sha.+ ¹³ “Kwagh a tser ne, ne mbangeren man Mbafarishi, ne mbawanatseregh! sha ci u ne mba yangen ior u nyôron ken Tartor u sha. Gadia ne ayol a en ne mba nyôron ga, shi ior mba ve soo u nyôron la kpa ne mba yangen ve.+ ¹⁴ * —— ¹⁵ “Kwagh a tser ne, ne mbangeren man Mbafarishi, ne mbawanatseregh!+ sha ci u ka ne zende shin zegemnger man sha tar sha u keren ortyôtyev môm ner ne gema nan nana nyôr nongo a ven. Nana nyôron nongo a ven yô, ne na nan kuma u a va kende nan ken Gehena,* shi nan ya ibo i hemba ne kwa har. ¹⁶ “Kwagh a tser ne, ne mbaapirashe mba hemen ior!+ Ka ne kaa ner, ‘Aluer or bum tempel yô, ka kwagh ga; kpa aluer or bum zanaria u ken tempel yô, a gba u nana er sha kwagh u nan bum la keng.’+ ¹⁷ Ne mbalanenkwagh man mbapirinashe! Ka nyi i hembe gban kwagha? Ka zanaria shin ka tempel u a ne zanaria a hingir icighankwagh laa? ¹⁸ Shi ka ne kaa ner, ‘Aluer or bum atse a nan nagh yô, ka kwagh ga; kpa aluer or bum nagh ku i ne sha mi la yô, a gba u nana er sha kwagh u nan bum la keng.’ ¹⁹ Ne mbaapirashe! Ka nyi i hembe gban kwagha? Ka nagh kura shin ka atse a a ne nagh ku shon ku hingir icighankwagh laa? ²⁰ Nahan or u nan lu bumun atse a nan nagh yô, nan ngu bumun a kua hanma kwagh u a lu sha a cii. ²¹ Shi hanma or u nan lu bumun tempel yô, nan ngu bumun tempel la kua Un u i lu iyou na la.+ ²² Shi hanma or u nan lu bumun sha yô, nan ngu bumun ka ikyônough ki torough ki Aôndo, kua Un u a tem sha ki la. ²³ “Kwagh a tser ne, ne mbangeren man Mbafarishi, ne mbawanatseregh! sha ci u ka ne na môm-ken-pue u kunguraku man yiye kua kumin,*+ kpa akaa a a hembe lun hange hange ken Tindi la yô, ne mba we a ikyo ga, er ijirôron i mimi+ man mhôônom ma zungwen+ man jighjigh nahan. Gba u a er akaa la, kpa ka u a gema a undu a a hembe lun hange hange ne ga.+ ²⁴ Ne mbaapirashe mba hemen ior!+ Ka ne kese imunan kera,+ kpa ne gema ne ma rakumi.+ ²⁵ “Kwagh a tser ne, ne mbangeren man Mbafarishi, ne mbawanatseregh! sha ci u ka ne kire kôôpu man gbande ken won,+ kpa ve gema ve iv a hua+ man asaren a i fetyô u kighir ga yô.+ ²⁶ We Orfarishi u pirin ashe, vande kiren kôôpu shin gbande kimi, sha er ken won kpaa una hingir wang yô. ²⁷ “Kwagh a tser ne, ne mbangeren man Mbafarishi, ne mbawanatseregh!+ sha ci u ne mba er iwar i i shighe i ivue i* pupuu nahan.+ Ken won yô, ka i doo ashe tsô, kpa kimi yô, i gema i iv a akuhe a mbakpenev kua hanma inja kwagh i hôngorough cii. ²⁸ Kape ne kpaa, ior ve nengen ér ne mba perapera je la, kpa kimi yô, ne iv a atseregh man ieren i vendan atindi.+ ²⁹ “Kwagh a tser ne, ne mbangeren man Mbafarishi, ne mbawanatseregh!+ sha ci u ka ne maa iwar i uprofeti shi ne er hwe sha iwar i mbaperapera,+ ³⁰ ne kaan ner, ‘Yange sea lu sha ayange a uter asev la yô, ma se nyôr nongo a ve sha u wuan uprofeti mban ga.’ ³¹ Sha nahan yô, ne mba eren shiada sha ayol a en ner, ne mba ônov mba ior mba yange ve wua uprofeti la.+ ³² Yô, er nen ase kwagh u uter enev er la, er ne fetyô la cii.* ³³ “Ne iyô, ônov mba igbindev mban,+ a er nan man ne war ijir i Gehena* la sha wono?+ ³⁴ Sha ityôkyaa ne yô, m ngu tindin uprofeti+ man mbafankwagh man mbatesen hen a ven.+ Né wua mbagenev ken a ve,+ né mande ve sha kon. Mbagenev di né gbidye ve+ ken ushinagoge enev shi né er ve atsan+ ken agar kposo kposo. ³⁵ Nahan né ya ibo sha awambe a mbaperapera a i hee inya shin tar la cii, hii sha awambe a orperapera Abel+ zan zan ar sha awambe a Sekaria wan u Barakia, u ne wua un ken tempel hen atô u icighanjiir man atse a nan nagh la.+ ³⁶ Mimi je me kaa ne, akaa ne cii aa er kov ne. ³⁷ “Yerusalem, Yerusalem, we u u wuan uprofeti shi u tan mba i tindi ve hen a we awen ne!+ M nôngo acin imôngo mer me kohol ônov ou, er ngôkyegh ka a kohol ônov nav ken akper a na nahan! Kpa u soo ga.+ ³⁸ Yô nenge, i undu ne a ya wen* ve.+ ³⁹ Nahan me kaa ne, mayange ne kera nenge a mo ga, zan zan ne va kaa ner, ‘Un u a ve ken iti i Yehova* la ngu a iveren.’”+