Sha Uwegh ku Mateu 11:1-30
11 Yesu ôron mbahenen nav mba 12 mbara akaa a vea er la been yô, a mough a yem u za tesen shi pasen loho u dedoo ken agar agen.+
2 Kpa er Yohane ungwa kwagh u ityom i Kristu lu eren la ken gaadi yô,+ a tindi mbahenen nav+
3 ér ve za pine un ér: “Ka we u lu Un shon u i kaa ér ngu van la yee, shin se veren ashe a orgen kposo?”+
4 Yesu gema kaa a ve ér: “Za pase nen Yohane akaa a ne lu ungwan shi nengen ne:+
5 Mbaapirashe mba nengen hegen+ shi mbaawanev mba zenden tsembelee. Mba wanger mbaamandev+ imande, shi mbaakondoato mba ungwan. Mba nderen mbakpenev shin ku, shi mba ôron mbaatsanev loho u dedoo.+
6 Saan or u nan zough a ityôkyaa ken a mo i nan nan gbeev mbu nôngon ga la iyol.”+
7 Mbahenen mbara mba ngur yemen yô, Yesu gba ôron ikpelaior la kwagh u Yohane, pinen ve ér: “Ka nyi yange ne lu zan ken taaikyôngo ner ne za nengee?+ Lu u za nengen a iyelegh ku ahumbe a daase a mi yôô?+
8 Tsô ka nyi yange ne lu zan ner ne za nenge? Lu u za nengen a or u haa akondo a taver ishe* iyol yôô? Kpa ka mba ve lu hen uya mba utor ve huan akondo a taver ishe ye.
9 Nahan, lu nyi i na ve ne zaa? Lu sha u za nengen a profeti shinii? Sha kpôô yô, lu profeti, man me kaa ne, a hemba profeti je kpaa.+
10 Ka un shon je i nger kwagh ne sha a na ye, ér: ‘Nenge, m ngu tindin orôron-loho wam una zaan we sha hemen.* Una sôr u gbenda!’+
11 Mimi je me kaa ne, ken ior mba kasev ve mar cii, or môm ngu a due u nan hembe Yohane u Eren Batisema ga. Kpa or u hemban gban ijime ken Tartor u sha nan hemba un.+
12 Hii sha ayange a Yohane u Eren Batisema la zan zan hegen, ior mba nôngon sha afatyô ve cii ér vea nyôr ken Tartor u sha, man mba ve gbe uwer ga la mba zuan a u je.+
13 Gadia Uprofeti kua Tindi cii tsengaôron akaa a ken hemen, zan zan sha shighe u Yohane;+
14 man nea lumun a kwagh u m lu ôron ne shin nea lumun ga kpa, fa nen ner un ka ‘Eliya shon u i kaa ér ngu van la.’+
15 Or u nan lu a ato yô, nana̱ ungwa.
16 “Man me kar kov ne sha unô jimi?+ Ngu er mbayev mba kiriki mba ka ve tema sha ityembekasua, ve lamen a mbakwav ve,
17 ve kaan ér: ‘Se tôngo ne imar kpa ne vine amar ga; se gber kwelegh, kpa ne zungwe ga’* la nahan.
18 Yohane yange va, lu yan kwagh ga shi lu man kwagh ga, kpa ior kaa ér: ‘Ngu a jijingi u bo.’
19 Wan u or di va, ngu yan kwagh shi man kwagh,+ kpa ior mba kaan ér: ‘Nenge, or ne ka or u wan hua, shi me wain kpishi. Ka ijende i mbangoholkpandegh kua mbaasorabo.’+ Nahan kpa, kwaghfan zough a ishô sha ityom na.”+
20 Tsô a gba puun mba ken agar a vesen a yange hemba eren ityom na i kpilighyol* her la, sha ci u ve gema ishima ga, a kaa ér:
21 “Kwagh a tser ne, ne ior i Korashin! Kwagh a tser ne, ne ior i Beteseida! Sha ci u, luun er ityom i kpilighyol i yange i er hen a ven la, a lu ken Tiru man Shidon yô, ngise je ior mbara ma ve gem ishima, ma ve haa ikyondo i zungwen iyol kua mtuhwem.+
22 Kpa me kaa ne, kwagh wen una hemba vihin a ior i Tiru man Shidon sha Iyange i Ijirigh la.+
23 Man ne ior i Kapenaum,+ a kende a ven sha je he? Ka shin Uwar* ne kure ye.+ Sha ci u, luun er ityom i kpilighyol i yange i er hen a ven la, a lu ken Sodom yô, ma a lu her zan zan nyian.
24 Kpa me kaa ne, kwagh wen una hemba vihin a u tar u Sodom sha Iyange i Ijirigh la.”+
25 Hen shighe la je, Yesu gema kaa ér: “Terem, me wuese we ken igbar, we Ter u sha man tar, sha er u yer mbabughunashe man mbafantakeda akaa ne, u gem u pase mbayev mba kiriki a yô.+
26 Man jighilii yô, Tere, kape u soo wer i lu je la.
27 Akaa cii Terem wam sha ikyev,+ shi or môm kpa fa Wan vindi vindi ga, saa Ter tseegh.+ Ter kpaa or môm fa un vindi vindi ga, saa Wan tseegh, kua ma or u Wan a soo u pasen nan kwagh u Ter yô.+
28 Va nen hen a mo, ne mba ne lu yan ican shi ne tôô ikyav mbi yuhwan la, mo me na ne mmem.
29 Tôô nen igbur yam, shi hen nen kwagh hen a mo. Sha ci u m ngu ishima legh legh, shi m kenden a iyol sha ga,*+ nahan ne zua a mmem.*
30 Gadia igbur yam yuhwa ga, shi ikyav yav kpa peese.”
Ngeren mba shin kpe
^ Shin “akondo a dedoo.”
^ Zwa Grika, “m ngu tindin orôron-loho wam sha ishigh you.”
^ Shin “ne ta ave sha vanger sha u tesen ijungwen ga.”
^ Shin “hemba eren uivande.”
^ Shin “Hade,” ka uwar u uumace je la. Nenge Ngeren u Pasen Asember.
^ Shin “m kehen ityough ga.”
^ Shin “ne zua a mmem ken uuma enev.”
