Sha Uwegh ku Mateu 20:1-34
20 “Gadia Tartor u sha ngu er orya ugen u due pepe lu keren mba vea yar un tom ken sule u wain nahan.+
2 Er za zua a mbatomov mba ve lumun u ngohol denariu* môm sha iyange yô, a kaa ér ve yar ken sule na u wain la.
3 Shi va duen er ahwa ataankaranyiin pepe* nahan yô, a nenge ior mbagenev tile sha tembekasua, ve lu a tom ga.
4 Nahan a kaa a ve ér, ‘Ne kpa za yarem nen tom ken sule u wain. Me kimbi ne a doo.’
5 Nahan ve yar. Shi orya ne va due er ahwa 12 atetan,* man er ahwa atar atetan* nahan, shi a zua a ior mbagenev ve yar un tom.
6 A va mase duen er ahwa ataan aikighe* nahan, a zua a ior mbagenev gba tilen tsô. Nahan a pine ve ér, ‘Er nan pepe je ne gbe tilen heen a kwagheren shio nahana?’
7 Ve kaa a na ér: ‘Ka sha ci u or ngu a tôô se ijodo ga.’ Nahan a kaa a ve ér, ‘Ne kpa za yarem nen tom ken sule u wain.’
8 “Iyange va been yô, orvesen u lu a sule u wain la kaa a or u nengen un sha akaa la ér, ‘Yila mbatomov mbara kimbi ve injar ve.+ Hii sha mba ve mase yaren la zan zan za kure sha mba hiihii mbara.’
9 Mbatomov mba ve yar sha ahwa ataan aikighe la mba ve yô, hanmô ve ngohol denariu* môm.
10 Nahan mba ve hii yaren la mba ve yô, ve hen ér vea ngohol a hemba nahan. Kpa ve kpa i kimbi ve denariu* môm.
11 Mba ngohol yô, ve gba ahon a orya la,
12 ve kaa ér, ‘Mba ve mase yaren mban er tom ihwa i môm tseegh, kpa u kimbi ve injar vough er se nahan, se mba se er tom sha oo iyange jimin ne!’
13 A gema a kaa a ugen ken a ve ér, ‘Orne, m nzughul a ven ga. Ashen ne lumun u ngohol denariu* môm, shin ka nahan ga?+
14 Ngohol kwagh u a lu u wou la yem. M soo u nan mba ve mase yaren mban injar vough er we nahan.
15 M ngu a ian i eren kwagh u m soo la a akaa am gaa? Shin u ngu gban iyuhwe sha ci u m er a ve doo* yumu?’+
16 Kape mba hiihii vea va hingir mba masetyô, mba masetyô di vea hingir mba hiihii je la.”+
17 Yesu va ngur zan sha Yerusalem yô, a za ta ibyalegh a mbahenen nav mba 12 mbara sha gbenda, a kaa a ve ér:+
18 “Nenge! Se mba zan sha Yerusalem, man a za na Wan u or sha ikyev i upristi mba tamen man mbangeren. Vea ôr un ijir vea kure ér i wua un.+
19 Maa vea gema un vea na sha ikyev i ior mba ken atôatyev, vea naha un tar shi vea gbidye un shi vea mande un sha kon.*+ Kpa sha iyange i sha utar la, a nder un shin ku.”+
20 Tsô ngô u ônov mba Sebedeu+ za va vea ônov nav mba nomso, va gure un inya gba sônon un kwagh.+
21 Yesu pine un ér: “Ka nyi u soo?” A kaa a na ér: “Na zwa ônov av mba uhar mban ve va tema vea we imôngo ken Tartor wou, u môm ken uwegh ough ku iyanegh, ugen ken uwegh ough ku imesegh.”+
22 Yesu gema kaa ér: “Ne fa kwagh u ne lu sônon la ga. Ne fatyô u man shin iyongo i m sôôn man shimi la kpa?”+ Ve kaa a na ér: “Se fatyô.”
23 A kaa a ve ér: “Ka mimi, ne va ma shin iyongo yam.+ Kpa u teman mo ken uwegh ku iyanegh man ku imesegh la yô, ka mo me na zwa ga, sha ci u ka Terem una tsua mba vea tema la ye.”+
24 Mbapuev mbara mba ongo kwagh ne yô, ishima vihi ve a anmgbianev mba uhar mbara.+
25 Kpa Yesu yila ve kaa a ve ér: “Ne fa, utor mba tar ne ka ve eren tahav sha ior vev, shi uzegembaiorov kpaa ve tesen mhembe sha ior vev.+
26 Ne yô, gba u ne lu nahan ga.+ Kpa or u nan soo u lun or u hemban ken a ven yô, a gba u nana lu or u eren ne tom.+
27 Shi hanma or u nan soo u lun or u hiihii ken a ven yô, a gba u nana lu kpan wen,+
28 vough er Wan u or kpaa a ve, i lu sha u i er un tom ga, kpa i lu sha u una er mbagenev tom,+ shi una na uma na sha u paan ior kpishi nahan.”+
29 Mba ngur duen ken Yeriko yô, ikpelaior i vesen dondo un ijime.
30 Mbaapirashe mbagenev uhar gema tema hen kpegbenda. Mba ongo ér Yesu ngu karen yô, ve gba yilan genger genger kaan ér: “Tere, zungwe se mhôônom, Wan u Davidi!”+
31 Tsô ikpelaior la gba vendan a ve, kaan ér ve cir zwa; kpa ve lu hemban yilan genger genger kaan ér: “Tere, zungwe se mhôônom, Wan u Davidi!”
32 Yesu maa tile, yila ve kaa ér: “Ka nyi ne soo ner m er ne?”
33 Ve kaa a na ér: “Tere, bugh se ashe.”
34 Tsô kunya kôr Yesu, nahan a bende ve ave sha ashe,+ maa her je ve hii u nengen kera, shi ve dondo un ijime.
Ngeren mba shin kpe
^ Nenge Ngeren u Seer u B14 la.
^ Zwa Grika, “er ihwa i sha utar nahan.” Yange i hii u ôron ahwa ne pepe shighe u iyange ka i hii u duen la.
^ Zwa Grika, “er ihwa i sha ataratar nahan.”
^ Zwa Grika, “er ihwa i sha utaankarunyiin nahan.”
^ Zwa Grika, “er ihwa i sha 11 nahan.”
^ Nenge Ngeren u Seer u B14 la.
^ Nenge Ngeren u Seer u B14 la.
^ Nenge Ngeren u Seer u B14 la.
^ Shin “m wa nagh.”
^ Shin “kon u manden or sha mi.” Nenge Ngeren u Pasen Asember.
