U Sha Uhar u Peteru 3:1-18
3 Ne mbadoon mo ishima, ka washika u sha uhar je m lu ngeren ne hegen ne. Ken ngun kpa, m ngu nderen ne sha u umbur ne kwagh ugen, u una wase ne u henen kwagh tsembelee yô, er ken u hiihii la nahan,+
2 mer, umbur nen akaaôron a uicighanmbaprofeti vande ôron la, kua kwagh u tindi u Ter man Oryiman u ne ongo hen mbaapostoli enev la.
3 Hiihii yô, fa nen kwagh ne, ken ayange a masejime yô, mbanahantar vea due a tar nahan ve, vea lu eren akaa sha asaren a ve,+
4 kaan ér: “Shighe na shon u yange i tôndo zwa a mi ér una lu a vese la ngu hana?+ Gadia hii sha ayange a uter asev kpe kera la je, akaa cii nga zan vough er lu sha mhii u igbetar la nahan.”+
5 Gadia ve soo ér kwagh u mimi ne a̱ hungur ve sha apera je, er ngise je usha lu, shi tar kpa tile dông sha mnger, man er u lu hen atô u mnger sha imo i Aôndo,+
6 man shi er lu sha akaa ne i tim ior mba sha ayange la, shighe u mngerem va sha tar deemee la yô.+
7 Kpa ka sha imo la i môm usha man tar mba ve lu hegen la cii i ver ve sha ci u usu ye. I ver ve mba keghen iyange i ijirigh man i a va tim mba ve vende Aôndo la.+
8 Kpa, ne mba doon mo ishima, kwagh ne a̱ de hungur ne ga, hen Yehova* yô, iyange i môm ngi er anyom dubu nahan, anyom dubu di er iyange i môm nahan.+
9 Yehova* ngu eren zôzô u kuren ityendezwa na er mbagenev ve nenge ér ngu eren zôzô nahan ga,+ kpa ngu wan ishima a ven, sha ci u a soo ér or môm nana tim ga, kpa sar un u ior cii ve gema asema.+
10 Kpa iyange i Yehova*+ ia va er ormbaiv+ ka nan va nahan. Hen shighe la, usha vea kar kera+ a kume,* kpa akaa a sha man a shin tar aa tsee vong, aa sough kera, shi tar ua due ken igbar, kua ityom i shin u kpaa.+
11 Er i lu u akaa ne cii aa va sough kera yô, nenge nen ior mba i doo u ne lu sha kwagh u aeren a wang man aeren a tesen ér ne mba civir Aôndo la,
12 er ne lu keghen iyange i Yehova,* shi shighe u iyange shon ia va la a lu ne sha ishima,*+ zum u a tim usha kera+ sha iniomborusu, shi akaa a sha man a shin tar aa tsee vong, aa sough kera la!
13 Kpa se mba keghen usha mba hev man tar u he er a tende zwa nahan,+ man ka ken a ve perapera una tema ye.+
14 Sha nahan yô, ne mba doon mo ishima, er ne lu keghen akaa ne yô, nôngo nen sha afatyô wen cii sha er ken masejime una va kohol ne ne lu wang a acôghor iyol shio, shi ne lu ken bem vea na yô.+
15 Heela tseegh ga, nenge nen ishimawan i Ter wase la ner ka myom, vough er Paulu, anmgbian wase u doon se ishima la kpa yange nger ne washika sha kwaghfan u i ne un la,+
16 ôr ne akaa ne ker, er a ôron ken uwashika nav cii nahan. Kpa akaa agen ken uwashika mbara taver u kaven, nahan mba banen a mkav* man mba ve taver ga la mba tsumen a akaa ne, er Uruamabera mbagenev cii kpa ve eren a mi nahan, man kwagh ne una va ve a mtim.
17 Ne mba doon mo ishima, er ne tsengafan akaa ne nahan yô, kuran nen sha er kwaghbo u mbaperenatindi la una na ne tsume a ve imôngo, ne hingir u undun mtil sha mimi wen* ga yô.+
18 Kpa za nen hemen u vesen sha erdoo u hemban man mfe u Ter wase man Oryiman Yesu Kristu la. Icivir i̱ lu i na, hegen zan zan gbem sha won. Amen.
Ngeren mba shin kpe
^ Nenge Ngeren u Seer u A5 la.
^ Nenge Ngeren u Seer u A5 la.
^ Shin “vea kar kera a hura ioo.”
^ Nenge Ngeren u Seer u A5 la.
^ Nenge Ngeren u Seer u A5 la.
^ Shin “shi i sar ne tsung u i̱ va.” Zwa Grika, “shi ne lu torough a i̱ ner i̱ va.”
^ Shin “mba i tese ve ga.”
^ Shin “ne tenger.”
