U Sha Uhar u Peteru 1:1-21
1 Shimon Peteru, kpan man apostoli u Yesu Kristu, ngu ngeren hen ne mba jighjigh u nan wen a gbe kwagh tsung, er u wase nahan, u se cii se zough a mi sha perapera u Aôndo wase man u Oryiman Yesu Kristu la ér:
2 I̱ seer tesen ne erdoo u hemban shi i seer ne bem sha u nan ne mfe u vough+ u sha kwagh u Aôndo man u Yesu Ter wase,
3 sha ci u tahav mbu Aôndo na se akaa cii,* a i gbe u se lu a mi ve se za hemen u lun uma shi se civir un sha mfe u vough, u sha kwagh u Un u a yer se+ sha iengem na man sha ieren na i vough la.
4 Ka sha akaa ne* a er uityendezwa a vese* mba doon tsung man mba vesen ye,+ sha er uityendezwa mba shon vea na ne kpa ne hingir u zuan a iengem i Aôndo yô.+ Gadia se due ken isharen i bo,* i i ne tar u vihi la kera.
5 Sha ityôkyaa ne yô, nôngo nen sha afatyô wen cii+ seer nen ieren i dedoo sha jighjigh u nan wen la;+ sha ieren i dedoo yen la, seer nen mfe,+
6 sha mfe wen la, seer nen iyolkôrontsaha, sha iyolkôrontsaha yen la,+ seer nen ishimataver, sha ishimataver yen la, seer civir nen Aôndo,+
7 sha mciviraôndo wen la, seer doon nen ayol a en er anmgbianev nahan, sha dooshima u ne lu a mi er anmgbianev nahan la, seer lun a dooshima.+
8 Aluer ne mba a aeren ne cii shi a dumbur ken a ven yô, aa na iyol ia kera kpe ne ga, shin aa na ne de u umen atam+ sha kwagh u mfe u vough u sha kwagh u Ter Yesu Kristu la ga.
9 Gadia hanma or u nan ban a aeren ne yô, nan pir ashe, nan kusu ashe a nan ér nana nenge a iwanger ga,*+ nan hungur er i kire asorabo a nan+ a ngise la yô.
10 Sha nahan yô, anmgbianev, lu nen a gbashima i hemba ave a tse, sha er kwagh u i yer ne+ shi i tsough ne ér ne lu la una kar ne ga yô. Gadia aluer ne za hemen u eren akaa ne yô, mayange ne gba ga.+
11 Jighilii yô, ka nahan man a na ne zua a ian i icivirigh tsung,* i nyôron ken Tartor+ u tsôron u Ter man Oryiman wase Yesu Kristu ye.+
12 Ka sha ityôkyaa ne ka i lum ape umbur ne akaa ne hanma shighe ye, shin er ne fe a shi ne var a ityesen i mimi i ne hen la tsembelee nahan kpaa.
13 Kpa, er m lu ken tabernakel* ne her yô,+ m nenge mer doo u me nder ne sha u umbur ne akaa ne,+
14 gadia m fa je mer ica a kera gba ga tsô a va kar a tabernakel wam ne kera, vough er Ter wase Yesu Kristu yange pasem wang nahan.+
15 Me za hemen u eren kwagh u m fetyô la cii, sha er me va yem kpa, ne fatyô u umbur* akaa ne ayol a en yô.
16 Yange se pase ne kwagh u tahav man shighe u Ter wase Yesu Kristu una lu vea vese la sha u ôron ne ukwaghhir mba ior ga, kpa lu sha ashe a ase se nenge a iengem na ye.+
17 Gadia yange zua a icivir man iengem hen Aôndo Ter, zum u Un u a lu iengem i hemban la ôr mkaanem man a na la, ér: “Ngun ka Wan wam u ishima ishima. Doom a na.”+
18 Man se ungwa i ôr mkaanem man sha, zum u se lu vea na imôngo sha icighan uwo yô.
19 Nahan se hemba mban a vangertiôr ser akaaôron a profeti aa kure sha mi. Ne mba eren kwagh u vough, er ne lu keghen ato a akaaôron shon, a a lu er imenger+ i i lu mondon iwanger ken ime la, ka asema a en je la (zan zan sev mbu hii u wanger shi ishan i sha use+ i kar duen).
20 Gadia ne hii fan er i lu sha mhen u or i pasen kwaghôron u profeti u Ruamabera ga yô.
21 Gadia ma shighe môm kpa orumace gba karen a ishima i nan tsô ôron kwaghôron u profeti ga,+ kpa ka icighan jijingi yange a mgbegha* ior ve ôr loho u Aôndo ye.+
Ngeren mba shin kpe
^ Shin “na se akaa cii gbilin.”
^ Ka iengem na man ieren na i vough je la.
^ Shin “a er ityendezwa u nan se uiyua.”
^ Shin “isharen i yaven a or i ka i taver ken or la.”
^ Shin a fatyô u kaan ér, “nan pir ashe, nan nengen ka ze ica ga.”
^ Shin “a na ne iveren ngôgh.”
^ Shin “tenti,” ka iyol na i shin tar je la.
^ Shin “ôron kwagh teren.”
^ Zwa Grika, “a tuur.”
