Sha Uwegh ku Yohane 5:1-47
5 Shighe kar yô, iniongo+ i Mbayuda igen shi kuma, nahan Yesu mough kôndo sha Yerusalem.
2 Ityungu igen gema lu ken Yerusalem, hen Hunda Iyôngo,+ i yilan i ken zwa Heberu ér Beteseta, i maa uvarenda utaan kase ityungu shon.*
3 Nahan mbauangev kpishi yav sha uvarenda mban, kua mbaapirashe man mbaawanev man mba uman ave kua mba uman angahar.*
4 * ——
5 Orgen gema lu her u tsa a angev anyom 38 yô.
6 Er Yesu nenge or ne yav her shi fa er a lu uange ica i gbe yô, a pine un ér: “U soo wer angev ou mbu bee?”+
7 Oruange la gema kaa a na ér: “Orvesen, m ngu a or u nana hungwa a mo shin ityungu shighe u í kpianger mngerem ga, nahan ka mea nguren zan yô, orgen nan kar nan vande hungwan a mo.”
8 Yesu kaa a na ér: “Mough sha! Tôô butu wou* zende.”+
9 Maa angev mbu or la bee her ave ave je, tsô a tôô butu na* a gba zenden.
Gema lu sha Iyange i Memen.
10 Nahan Mbayuda gba ôron a or shon ér: “Nyian ka Iyange i Memen, nahan u tôô butu* ka shami ga.”+
11 Kpa a gema a kaa a ve ér: “Ka or u a beem angev la shi a kaa a mo ér, ‘Tôô butu wou* zende’ ye.”
12 Ve pine un ér: “Or shon u a kaa a we ér, ‘Tôô butu* zende’ la ka ana?”
13 Kpa or u i bee un angev la fatyô u fan or u Yesu lu jim ga, sha ci u a kar sha, a nyôr ken ikpelaior i i lu her la.
14 Shighe kar yô, Yesu za zua a or shon ken tempel, nahan a kaa a na ér: “Nenge, i bee u angev hegen. De kera shi eren isholibo ga, sha er kwagh u vihin hemban ngun una er u ga yô.”
15 Or la maa yem za ôr Mbayuda mbara er i lu Yesu a bee un angev yô.
16 Kwagh ne na yô, Mbayuda lu tôvon Yesu a ican, sha ci u lu eren akaa ne sha Iyange i Memen.
17 Kpa a gema a kaa a ve ér: “Terem ngu eren tom zan zan hegen, nahan mo kpa m ngu eren tom her.”+
18 Ka sha ityôkyaa ne je Mbayuda lu hemban keren ér vea wua un ye. Lu sha ci u lu peren tindi u Iyange i Memen tseegh ga, kpa lu sha ci u lu yilan Aôndo ér Ter na,+ tesen ér un ngu kwaghmôm a Aôndo.+
19 Nahan Yesu kaa a ve ér: “Mimi mimi je* me kaa ne, Wan una gba karen a ishima na tsô eren ma kwagh ga, saa kwagh u a nenge Ter na a eren la tseegh.+ Gadia nyityôkwagh i Ter a eren cii, Wan kpa ka a er akaa ne er un nahan vough.
20 Gadia Wan doo Ter ishima tsung,+ shi tesen un akaa a un iyol na a eren la cii, man una va tese un akaa a hemban angan je kpaa, nahan a kpiligh ne iyol.+
21 Er Ter ka a nder mbakpenev ve hingir mbaumav nahan,+ kape Wan kpa ngu a na hanma or u a soo la cii uma je la.+
22 Gadia or môm kpa Ter ôron nan ijir ga, kpa a gema ijirôron cii a wa sha ikyev i Wan,+
23 sha er ior cii vea na Wan icivir vough er ve ne Ter icivir nahan yô. Or u nan ne Wan icivir ga yô, Ter u a tindi un la kpa nan ne un icivir ga.+
24 Mimi mimi je me kaa ne, hanma or u nana ungwa kwaghôron wam man nana na Un u a tindim la jighjigh yô, nana zua a uma u tsôron;+ a kera gba u a ôr nan ijir ga, kpa nan due ken ku, nan nyôr ken uma.+
25 “Mimi mimi je me kaa ne, shighe ngu van, man a kuma kera kpaa, u mbakpenev vea ungwa imo i Wan u Aôndo, nahan mba ve we i ikyo yô, vea lu uma.
26 Gadia er i lu Ter a ne uma* yô,+ Wan kpa a na un tahav mbu nan uma nahan vough.+
27 Shi a na un tahav mbu ôron ijir,+ sha ci u ngu Wan u or.+
28 Kwagh ne a de kpiligh ne iyol ga, gadia shighe ngu van u mba ve lu shin iwar* cii vea ungwa imo na+
29 vea due yô. Mba yange ve er akaa a dedoo la, vea nder vea zua a uma, kpa mba yange ve er akaa a bo la yô, vea nder a ôr ve ijir.+
30 Me fatyô u gban karen a ishima tsô eren ma kwagh ga. Ka er m ongo la ka m ôr ijir ye, shi ijirôron yam ka i perapera,+ sha ci u m keren u eren ishima yam ga, kpa ka ishima i un u a tindim la.+
31 “Aluer mo tswen m ngu eren shiada sha kwagh wam yô, shiada wam la ka u mimi ga.+
32 Orgen ngu u a lu eren shiada sha kwagh wam yô, shi m fa shiada u a lu eren sha kwagh wam la ka u mimi.+
33 Ne tindi ior hen Yohane, shi a er shiada sha kwagh u a lu u mimi la.+
34 Nahan kpa, kwagh gbam a shiada u orumace ga, kpa m ngu ôron akaa ne sha er a yima ne yô.
35 Or la yange lu er ka imenger i yeghen shi mondon iwanger nahan, shi doo ne u ember tsung ken iwanger na la sha anshighe kpuaa.+
36 Kpa m ngu a shiada u a hembe u Yohane la yô, sha ci u ityom i Terem a nem ér m er la, ityom shon i m lu eren ne, ngi eren shiada er i lu Terem a tindim yô.+
37 Man Ter u a tindim la iyol na er shiada sha kwagh wam.+ Mayange ne mba a ungwa imo na ga, shi ne mba a nenge mluashe na kpaa ga,+
38 mkaanem nam kpa tema ken asema a en ga, sha ci u ne na or shon u A* tindi nan hen a ven la jighjigh ga.
39 “Ne mba timen ken Uruamabera+ sha ci u ne mba henen ner ka ve vea na ne zua a uma u tsôron ye; kpa gema ka ve* je ve er shiada sha kwagh wam ye.+
40 Nahan kpa, ne soo u van hen a mo sha er ne zua a uma u tsôron ga.+
41 Kwagh gbam a icivir i ior ga,
42 kpa m fa dedoo Aôndo doo ne ishima ga.
43 M va ken iti i Terem, kpa ne ngohol mo ga. Luun er orgen va ken iti i nan iyol i nan yô, ma ne ngohol nan.
44 Ka i doo ne u ngohol icivir hen mbagenev. Kpa ne mba keren icivir i Un u a lu Aôndo tswen la a ne la ga, nahan a er nan man ne na jighjigh?+
45 De henen nen ner me na ne ibo sha ishigh ki Ter ga; or ngu môm u nan ne ne ibo yô, ka Mose,+ un u ne lu suur sha a na la.
46 Jighilii yô, nea ne Mose jighjigh yô, mo kpa ma ne nem jighjigh, gadia yange nger kwagh wam.+
47 Kpa aluer ne na akaa a yange nger la jighjigh ga yô, a er nan man ne na kwaghôron wam jighjigh?”
Ngeren mba shin kpe
^ Yange i kuva uvarenda mban sha er ior vea karen sha mi ken mure yô.
^ Shin “mbakpenalegh.”
^ Nenge Ngeren u Seer u A3 la.
^ Shin “ikyagh you ki yaven.”
^ Shin “ikyagh nagh ki yaven.”
^ Shin “ikyagh ki yaven.”
^ Shin “ikyagh you ki yaven.”
^ Shin “ikyagh ki yaven.”
^ Zwa Grika, “Amen, Amen.” Nenge Ngeren u Pasen Asember.
^ Shin “a lu a iyua i uma.”
^ Zwa Grika, “iwar i umbur mbakpenev.”
^ Ka Aôndo je la.
^ Ka uruamabera je la.
