Sha Uwegh ku Yohane 1:1-51
1 Sha hiihii la, Imo lu,+ man Imo la lu vea Aôndo,+ shi Imo la lu er Aôndo nahan.*+
2 Un lu vea Aôndo sha hiihii je.
3 Lu sha ikyev na i gba akaa cii ye.+ Akaa a a lu ne cii, i gba eren ma kwagh môm ga, lu sha ikyev na i gba hanma kwagh ye.
Kwagh u yange i gba
4 sha ikyev na yô, lu uma, man uma la lu iwanger i uumace.+
5 Shi iwanger la ngi tan ken ime,+ kpa ime la fatyô u hemban i ga.
6 Orgen yange va, u Aôndo tindi un yô, i yilan un ér Yohane.+
7 Or ne va u va eren shiada, sha er una pase kwagh u iwanger la,+ nahan una wase hanma or cii nana̱ na jighjigh yô.
8 Lu un iyol na lu iwanger la ga,+ kpa lu u una er shiada sha kwagh u iwanger shon.
9 Lu u ica a gba ga tsô iwanger i mimi i ia ta hanma injaor cii la ia va shin tar.+
10 Un ne yange lu shin tar,+ man lu sha ikyev na i gba tar ye,+ kpa tar gema fa un ga.
11 Yange va hen ya na, kpa ior nav ngohol un ga.
12 Nahan kpa, mba yange ve ngohol un cii yô, a na ve ian i hingir ônov mba Aôndo,+ sha ci u ve na iti na jighjigh.+
13 Nahan i mar ve, lu sha awashima u iyol i inyam man awambe shin sha awashima u or ga, kpa lu sha awashima u Aôndo.+
14 Tsô Imo la va hingir or+ lu a vese imôngo, nahan se nenge a iengem na; iengem i wan u ter u môm môm;+ shi a iv a mhôônom* kua mimi u Aôndo la.
15 (Yohane er shiada sha kwagh na, yôô genger genger ér: “Ka un shon u yange m lu ôron kwagh na je ne, mer, ‘U a lu van mo ken ijime la hembam, sha ci u yange vande lun cii man i marem ye.’”)+
16 Er iv a erdoo u Aôndo u hemban la yô, lu tesen se erdoo u hemban la hanma shighe cii.
17 Er yange i na Tindi sha ikyev i Mose yô,+ Aôndo gema tese se erdoo na u hemban+ kua mimi na la sha ikyev i Yesu Kristu.+
18 Ma shighe môm kpa or ngu a nenge a Aôndo ga,+ ka aôndo u a lu wan u môm môm,+ a lu hen ikyum i Ter na*+ la tseegh a pase se kwagh Na ye.+
19 Ngun ka shiada u Yohane er zum u Mbayuda tindi upristi man Mbalevi mba ken Yerusalem hen a na je ne. Ve tindi ér i va pine un ér: “U ngu ana?”+
20 A venda u ôron ve ga, kpa a pase ve wang, a kaa ér: “Ka mo m lu Kristu ga.”
21 Nahan ve pine un ér: “Tsô, u ngu ana? U ngu Eliya shinii?”+ A kaa ér: “M ngu un ga.” “Nahan u ngu Profeti shon laa?”+ A kaa a ve ér: “Ei!”
22 Tsô ve kaa a na ér: “Ka an jim u lu ase? Pase se sha er se za ôr mba ve tindi se la yô. U kaan wer u ngu ana?”
23 A gema a kaa ér: “Mo m ngu imo i or u yôôn ken taaikyôngo ér: ‘Kôôm nen gbenda u Yehova* u lu jighilii,’+ vough er profeti Yesaia yange kaa nahan.”+
24 Lu Mbafarishi tindi ior mban ye.
25 Nahan ve pine un ér: “Tsô aluer u ngu Kristu shin Eliya shin Profeti shon ga yô, er nan u lu eren batisema?”
26 Yohane gema kaa a ve ér: “M ngu eren batisema sha mnger. Kpa orgen ngu hen atô wen, u ne fe un ga yô,
27 un shon u a lu van ken ijime yam la. M kuma u saghen un ikyor i akôvough ga.”+
28 Akaa ne er ken Betani, Yordan yande la, ape Yohane lu eren ior batisema la.+
29 Mba ker ken sev mbugen yô, a nenge Yesu lu van hen a na, maa a kaa ér: “Nenge, Waniyôngo+ u Aôndo u a lu va tôôn asorabo+ a tar ne kera la!+
30 Ka un shon u yange m lu ôron kwagh na je ne, mer, ‘Orgen ngu van mo ken ijime, a hembam, sha ci u yange vande lun cii man i marem ye.’+
31 Mo je kpa yange m fa un ga, kpa m va u va eren ior batisema sha mnger sha u i fa kwagh na ken Iserael yô.”+
32 Yohane shi er shiada kaa ér: “M nenge jijingi lu senen sha aôndo er ka ikyungugh nahan, va tema sha a na.+
33 Mo je kpa m vande fan un ga, kpa Un u a tindim ér m er ior batisema sha mnger la kaa a mo ér: ‘Or u ú nenge jijingi una sen a va tema sha a nan la yô,+ ka or la i lu u nana er ior batisema sha icighan jijingi ye.’+
34 Nahan m nenge kwagh ne, shi m ngu eren shiada mer ngun ka Wan u Aôndo.”+
35 Shi mba ker ken sev mbugen yô, Yohane tile vea mbahenen nav mbagenev uhar,
36 tsô a nenge Yesu lu zenden karen, maa a kaa ér: “Nenge, Waniyôngo+ u Aôndo ngula!”
37 Mbahenen mba uhar mbara mba ongo kwagh u ôr ne yô, ve dondo sha Yesu.
38 Yesu gem yô, a nenge ve lu van un ken ijime, maa a pine ve ér: “Ka nyi ne kerene?” Ve kaa a na ér: “Rabi, u ngu za tsan hana?” (Inja i Rabi ér, Ortesen).
39 A kaa a ve ér, “Va nen tsô ne nenge.” Nahan ve yem ve za nenge ape lu u una tsa la, shighe ne lu er ahwa anyiin aikighe* nahan, maa ve lu vea na zan zan iyange la kar been.
40 Anderia,+ anmgbian u Shimon Peteru kpa lu môm ken mbahenen mba uhar mba ve ungwa kwagh u Yohane ôr maa ve dondo Yesu la.
41 A za hii zuan a anmgbian na Shimon, a kaa a na ér: “Se zua a Mesiya”+ (inja na yô ér, “Kristu”),
42 maa a za a na hen Yesu. Tsô Yesu kenger un, maa kaa ér: “We u ngu Shimon,+ wan u Yohane; a gema yilan we ér Kefa” (inja na yô ér, “Peteru”).+
43 Mba ker ken sev mbugen yô, lu Yesu ape zan ken Galilia. Tsô a zua a Filibu,+ a kaa a na ér: “Dondom.”
44 Filibu gema lu or u ken Beteseida, lu gar u Anderia man Peteru kpaa je la.
45 Filibu zough a Nataniel yô,+ a kaa a na ér: “Se zua a un u Mose yange ôr kwagh na ken Tindi, shi Uprofeti kpa nger kwagh na la: Ka Yesu, wan u Yosev,+ or u ken Nasareti.”
46 Kpa Nataniel pine un ér: “Ma kwagh u dedoo una fatyô u duen ken Nasareti je kpa?” Filibu gema kaa a na ér: “Va va nenge.”
47 Yesu nengen Nataniel ngur van hen a na yô, a ôr kwagh na a kaa ér: “Nenge, mimi je, Oriserael ne ngu a icugh ken a na ga.”+
48 Nataniel pine un ér: “Ka han u feme?” Yesu kaa a na ér: “Ashen m nenge a we hen itine i kon u tur je Filibu lu a yila u ga.”
49 Nataniel gema kaa ér: “Rabi, u ngu Wan u Aôndo, u ngu Tor u Iserael.”+
50 Yesu kaa a na ér: “Ka er m kaa mer ashen m nenge a we hen itine i kon u tur ve u ne jighjigh yee? U va nenge a akaa a hemban angan.”
51 A kaa a na ér: “Mimi mimi* je me kaa ne, ne va nenge a bugh sha, nahan mbatyomov mba Aôndo vea lu kôndon sha shi senen hen Wan u or.”+
Ngeren mba shin kpe
^ Zwa Grika, “lu aôndo.”
^ Shin “erdoo u hemban.”
^ Shin “u Ter na a we un ikyum.” Ishember ne ngi ôron kwagh u ior mba ve lu kôôsôô yô.
^ Nenge Ngeren u Seer u A5 la.
^ Zwa Grika, “er ihwa i sha pue nahan.” Yange i hii u ôron ahwa ne pepe shighe u iyange ka i hii u duen la.
^ Zwa Grika, “Amen, Amen.” Nenge Ngeren u Pasen Asember.
