Sha Uwegh ku Yohane 12:1-50
12 Ka shin ayange ataratar u a er Paseka yô, Yesu va nyôr ken Betani, hen ijiir i Lasaru,+ un u Yesu nder un shin ku la.
2 Tsô i yôr un iwer her aikighe, nahan Marta lu duen a iwer,+ kpa Lasaru kua mbagenev lu yan kwagh vea na sha tebul.
3 Tsô Maria tôô mkurem ma human doon ma kuman pam* môm haa Yesu shin angahar, shi uma un angahar sha ice na. Lu mkurem ma nardu* ma taver ishe kpishi, ma i nungwa kwagh môm sha mi ga yô. Iyou la iv a ihyuma i mkurem mara.+
4 Kpa Yuda Isekarioti,+ orhenen na ugen, u lu u ica a gba ga tsô una tee un la, kaa ér:
5 “Er nan i tee mkurem ma human doon man sha udenariu* 300, i ne mbaatsanev ga?”
6 A ôr kwagh ne nahan kpa lu sha ci u a wa mbaatsanev ikyo ga, kpa lu sha ci u lu ormbaiv, shi luun a akwati u inyar, nahan a iin inyaregh ki i we ker la.
7 Yesu gema kaa ér: “De kwase ne, a er kwagh ne sha u tesen kwagh u a va er sha iyange i iin mo la.+
8 Gadia mbaatsanev vea lu vea ven gbem,+ kpa mo yô m ngu lun vea ven gbem ga.”+
9 Hen shighe ne Mbayuda kpishi ungwa ér ngu heela, nahan ve va her, lu sha u va nengen a Yesu tseegh ga, kpa lu u va nengen a Lasaru u Yesu yange nder un shin ku la kpaa.+
10 Nahan upristi mba tamen kôso ér vea wua Lasaru kpaa,
11 sha ci u lu sha kwagh na je Mbayuda kpishi lu zan her shi nan Yesu jighjigh ye.+
12 Ka ker ken sev mbugen yô, ikpelaior i vesen i i va iniongo la ungwa ér Yesu ngu van ken Yerusalem.
13 Nahan ve tôô andar a avilegh ve due u za keghen un gbenda, ve gba ôron genger genger ér: “Ma u yima* un! Un u a ve ken iti i Yehova* la ngu a iveren!+ Un ka Tor u Iserael!”+
14 Yesu zough a wanjaki yô, a tema sha mi,+ vough er i nger nahan, ér:
15 “De cie ga, wankwase u Shion. Nenge! Tor wou ngu van, a tema sha wanjaki.”+
16 Mbahenen nav kav akaa ne sha hiihii la ga, kpa yange mba va veren Yesu sha ian i icivirigh yô,+ ve umbur er i nger akaa ne sha kwagh na, shi i er akaa ne a na kpaa yô.+
17 Ikpelaior i i lu vea na shighe u yila Lasaru ér a due ken uwar,+ maa nder un shin ku la, lu eren shiada.+
18 Shi lu kwagh u na ve ikpelaior la za u za keghen un gbenda kpaa je ne, sha ci u ve ungwa ér a er ivande ne.
19 Nahan Mbafarishi kaa ker ayol a ve ér: “Ne nenge kpa, kwagh ngu hemban se. Nenge! Tar cii dondo un.”+
20 Tsô Mbagrika mbagenev lu ken mba ve va iniongo ne u va civir Aôndo la.
21 Nahan ve va hen Filibu,+ or u ken Beteseida u ken Galilia, ve va kaa a na ér: “Orvesen, sar se ape nengen a Yesu.”
22 Nahan Filibu va ôr Anderia. Tsô Anderia man Filibu va ôr Yesu.
23 Kpa Yesu kaa a ve ér: “Ka shighe u* a ver Wan u or sha ian i icivirigh je ne.+
24 Mimi mimi je* me kaa ne, aluer ishange i alakema gba hen inya hôr* ga yô, ia lu her i môm di tsô; kpa aluer i̱ hôr* yô,+ ia ume atam kpishi.
25 Or u uma u nan a doo nan ishima yô, nan ngu timin un a tim, kpa or u nan ker uma u nan ihyom*+ ken tar ne yô, nana kura un sha ci u uma u tsôron.+
26 Aluer or soo u eren mo tom yô, nana dondom, nahan ape m lu la nan kpa nana lu her.+ Aluer or ngu eren mo tom yô, Terem una er kwagh a nan sha icivir.
27 Ishima zam iyol hegen kpishi.+ Shi me kaa mer nyi? Tere, yimam hen shighe u* ican ne.+ Nahan cii kpa, gba u me nyôr ken shighe u* ican ne, gadia ka kwagh u m ve je la.
28 Tere, na iti you icivir.” Maa imo+ due sha kaa ér: “M vande nan i icivir, shi me na i icivir kpaa.”+
29 Ior kpishi mba ve tile her la mba ongo imo la yô, ve kaa ér Aôndo kume. Mbagenev kaa ér: “Ka ortyom nan ôr kwagh a na ye.”
30 Yesu gema kaa ér: “Imo ne va ka sha ci wam ga, kpa ka sha ci wen.
31 Mba ôron tar ne ijir hegen; hegen ne, a kar a tor u tar+ ne kera.+
32 Man mo yô, zum u a tôôm hen inya, a kende a mo sha la,+ me urugh ior cii sha ci wam.”
33 Jighilii yô, lu ôron kwagh ne sha u tesen inja ku i una kpe yô.+
34 Ikpelaior la gema kaa a na ér: “Se ungwa i ôr ken Tindi ér Kristu ngu lun gbem sha won.+ Man er nan u lu kaan wer gba u a kende a Wan u or sha?+ Ka an jim nan lu Wan u or laa?”
35 Nahan Yesu kaa a ve ér: “Iwanger ia za hemen u lun hen a ven sha anshighe kpuaa. Zende nen er ne lu a iwanger her ne, ime i de hembe ne ga; or u nan zenden ken ime yô, nan fe ape nan lu zan ga.+
36 Er ne lu a iwanger ne, na nen iwanger la jighjigh, sha er ne hingir ônov mba iwanger yô.”+
Yesu ôr akaa ne maa kar yem za yer ér ve de nengen a na ga.
37 Shin er Yesu er uivande kpishi sha ishigh vev nahan kpa, ve lu nan un jighjigh ga,
38 sha er kwagh u profeti Yesaia yange ôr la a̱ kure sha mi vough yô, ér: “Yehova,* ka an nan ne jighjigh a kwagh u i ongo hen a vese laa?+ Man ka an Yehova* a tese nan uwegh nagha?”+
39 Yesaia shi ôr kwagh ugen u a lu ityôkyaa i yange ve fatyô u nan jighjigh ga yô, ér:
40 “A pir ve ashe shi a cighir ve asema, sha u ve̱ de nengen sha ashe a ve shi ve̱ kaven inja i kwagh shon ken ishima, shi ve̱ gema asema, nahan m bee ve iangev ga yô.”+
41 Yesaia yange ôr akaa ne nahan sha ci u nenge a na sha ian na i icivirigh la ve ôr kwagh na ye.+
42 Shi ior kpishi, kua mbahemenev mbagenev je kpaa, na un jighjigh,+ kpa Mbafarishi na yô, ve pase ér ve na un jighjigh ga, sha u i de dughun ve ken shinagoge kera ga yô,+
43 sha ci u ve soo icivir i ior hemba icivir i i dugh hen Aôndo la je kpaa.+
44 Kpa Yesu ôr genger genger ér: “Hanma or u nan nem jighjigh cii yô, ka mo tseegh nan nem jighjigh ga, kpa kua un u a tindim la;+
45 shi or u nan nenge a mo yô, nan nenge a Un u a tindim la kpaa.+
46 M va shin tar er iwanger nahan,+ sha u hanma or u nan nem jighjigh yô, nana de saan ken ime ga.+
47 Kpa aluer or ungwa akaaôron a am man nan wa a ikyo ga kpa, me ôr nan ijir ga; gadia m va ka u ôron tar ijir ga, kpa ka u yiman tar.+
48 Or u nan vendem shi nan ngohol akaaôron a am ga yô, or ngu u nana ôr nan ijir yô. Ka kwaghôron wam la una ôr nan ijir sha iyange i masetyô ye.
49 Gadia m ôron kwagh sha mnenge wam ga, kpa ka Ter u a tindim la iyol na ka a kaam kwagh* u me ôr man u me tese ye.+
50 Shi m fa mkaanem nam* ma ne uma u tsôron.+ Nahan hanma kwagh u m ôron cii yô, ka m ôr vough er Ter a tesem la.”+
Ngeren mba shin kpe
^ Nardu ka ankon u human doon.
^ Ka pam u Mbaroma je la. Myohom ma kuman er ugeram 327 nahan.
^ Nenge Ngeren u Seer u B14 la.
^ Zwa Grika, “Hosana.” Ka u sônon Aôndo sha u a̱ va a myom, shi ashighe agen ka i ter ishember ne sha u tesen msaanyol.
^ Nenge Ngeren u Seer u A5 la.
^ Zwa Grika, “ihwa i.”
^ Zwa Grika, “Amen, Amen.” Nenge Ngeren u Pasen Asember.
^ Zwa Grika, “kpe.”
^ Zwa Grika, “kpe.”
^ Shin “nan kegh iyol ér uma u nan a saa nan.”
^ Zwa Grika, “hen ihwa i.”
^ Zwa Grika, “ken ihwa i.”
^ Nenge Ngeren u Seer u A5 la.
^ Nenge Ngeren u Seer u A5 la.
^ Zwa Grika, “a wam tindi.”
^ Zwa Grika, “tindi na.”
