Sha Uwegh ku Yohane 19:1-42
19 Pilatu maa na zwa i yem a Yesu i za gbidye un.+
2 Nahan ushoja mbara tume idyer i tor sha usaa ve cir un sha ityo shi ve haa un ikyondo i nyian dindee iyol,+
3 ve lu van hen a na va kaan ér: “Se mba sughun we, Tor u Mbayuda!” Shi ve zer tan un ishambe sha ishi.+
4 Pilatu shi due ken won va kaa a ve ér: “Nenge! M due a na ken won m va a na hen a ven, sha u fa nen ner m zua un a ibo ga.”+
5 Nahan Yesu due ken won, a idyer i tor i sha usaa la sha ityo, shi lu a ikyondo i nyian dindee la iyol. Nahan Pilatu kaa a ve ér: “Nenge nen or ne!”
6 Nahan kpa, upristi mba tamen man mbakuran mba nengen a na yô, ve ôr taver taver ér: “I za mande un sha kon! I za mande un sha kon!”+ Pilatu kaa a ve ér: “Yem nen a na ayol a en za wua un nen,* gadia mo m zua un a ibo ga.”+
7 Mbayuda gema kaa a na ér: “Se mba a tindi, man tindi wase la tese ér a kuma ku,+ sha ci u a tôô ér un ngu wan u Aôndo.”+
8 Pilatu ungwan akaa a ve lu ôron la yô, hemba cier un iyol cii,
9 nahan a hide a nyôr ken ya u gomna, a pine Yesu ér: “Ka han u dughu?” Kpa Yesu bugh un zwa ga.+
10 Maa Pilatu kaa a na ér: “U ngu ungwan mo ato zee? U fa er m lu a tahav mbu pasen we, shi m lu a tahav mbu wuan we* kpa?”
11 Yesu kaa a na ér: “Ka sha i ne u ian ye, gayô mayange ma u lu a tahav sha a mo ga. Ka nahan ve or u a nem sha ikyev you la a hembe eren kwaghbo u vesen ye.”
12 Kwagh ne na yô, Pilatu zer keren gbenda u pasen un, kpa Mbayuda ôr taver taver ér: “Aluer u pase or ne yô, u ngu ijende i Shisar ga. Hanma or u nan kaan ér nan ngu tor yô, nan ngu hendan a Shisar.”+
13 Tsô Pilatu ongo akaa a ve lu ôron la yô, a due a Yesu ken won, maa a tema sha ikyônough ki ijirigh, hen ijiir i i yer ér Tembe u sha Awen la. Kpa mba yer ken zwa Heberu ér Gabata.
14 Gema lu sha Iyange i Kohol Iyol+ i Paseka; lu er ahwa 12 atetan nahan.* Tsô a kaa a Mbayuda ér: “Nenge! Tor wen ngun!”
15 Kpa ve ôr taver taver ér: “Bee a na sha! Bee a na sha! I za mande un sha kon!” Pilatu kaa a ve ér: “Ner m wua* tor wenee?” Upristi mba tamen gema kaa ér: “Se mba a tor ugen ga, saa Shisar.”
16 Tsô a gema un a na ér i za mande un sha kon.+
Maa ve yem a Yesu.
17 Tsô a tôô kon u za manden un a mi la iyol na, a yem a mi hen ijiir i i yilan ér Ijiir i Igbôndotyo la.+ Mba yer ken zwa Heberu ér Gologota.+
18 Ve za mande un sha kon her+ vea iorov mbagenev uhar, u môm vegher ne, ugen vegher la, Yesu lu hen atô.+
19 Shi Pilatu nger kwagh mande sha kon* u i mande un sha mi la. I nger sha mi ér: “Yesu Ornasareti, Tor u Mbayuda.”+
20 Mbayuda kpishi ôr kwagh u i nger ne, sha ci u ijiir i i mande Yesu la lu ikyua a gar, shi i nger kwagh shon ken zwa Heberu man zwa Latin kua ken zwa Grika.
21 Kpa upristi mba tamen mba Mbayuda kaa a Pilatu ér: “De ngeren wer, ‘Tor u Mbayuda’ ga, kpa nger wer, kaan ér, ‘M ngu Tor u Mbayuda.’”
22 Pilatu gema kaa ér: “Kwagh u m nger yô, m nger je ve.”
23 Ushoja mbara mba manden Yesu sha kon yô, ve tôô akondo a na a haan iyol ve pav a ker avegher anyiin, hanma orshoja tôô vegher môm. Shi ve tôô ikyondo i ken atô la kpaa. Kpa ikyondo i ken atô la lu a ikyoron ga, i tume i̱ lu elemeen, hii sha va tume shin inya.
24 Nahan ve kaa ker ayol a ve ér: “Se ande nen ikyondo ne ga, kpa de se er nen ishor se fa or u ia lu i nan la.”+ Kwagh ne er sha u kuren kwagh u ruamabera kaa la, ér: “Ve kar akondo a am ker ayol a ve, ve er ishor sha ikyondo yam.”+ Man lu akaa a ushoja mbara er mimi yô.
25 Hen kon u i mande Yesu la, ngô na tile her ikyua,+ man anmgbian u ngô na u kwase, kua Maria kwase u Kelopa man Maria Madalina.+
26 Tsô zum u Yesu nenge a ngô na kua orhenen u doo un ishima la+ tile ikyua her yô, a kaa a ngô na ér: “Kwase, nenge! Wan wou ngula!”
27 Shi a gema a kaa a orhenen la ér: “Nenge! Ngôu ngula!” Nahan hen shighe* la je, orhenen la kua a na yem a na hen ya na.
28 Ken masejime, Yesu fe ér hen shighe ne nahan hanma kwagh er sha u kuren kwagh u ruamabera ôr la yô, a kaa ér: “Imura kôrom.”+
29 Ikyagh kigen gema lu her, wain u angen lu shimi poo. Nahan ve tôô soso u iv a wain u angen kimi yô, ve wa sha iyiagh ki hisop,* ve za un a mi sha zwa.+
30 Yesu benden wain u angen la yô, a kaa ér: “Bee ve!”+ Tsô a sua ityough inya, maa a sule.*+
31 Er lu Iyange i Kohol Iyol yô,+ doo u ikyom i ior ia lu sha kon+ sha Iyange i Memen ga, (gadia lu Iyange i Memen i vesen je),+ nahan Mbayuda kaa a Pilatu ér a na zwa i za kever ve angahar, i tôô ikyom ve kera.
32 Nahan ushoja mbara va kever angahar a or u hiihii la, kua angahar a orgen u un kpa i mande un ikyua a na la.
33 Kpa mba ve hen Yesu yô, ve nenge vande kpen kera, nahan ve kera kever un angahar ga.
34 Kpa orshoja ugen ken ve kuma un iwange hen ihyan,+ maa her je, awambe man mngerem due.
35 Un u a nenge kwagh ne la er shiada sha mi, man shiada na la ka u mimi. Shi a fa er kwagh u un lu ôron ne i lu mimi, sha er ne kpaa ne na jighjigh yô.+
36 Jighilii yô, akaa ne er sha u kuren kwagh u ruamabera kaa la, ér: “Kuhe na môm kpa a kever ga.”+
37 Shi ruamabera ôr ijiir igen la ér: “Vea kenger sha un u ve kuma un la.”+
38 Ken masejime yô, Yosev u ken Arematia u lu orhenen u Yesu, kpa lu u ken myer sha ci u lu cian Mbayuda la,+ va pine Pilatu ian ér ma un tôô ikyom i Yesu. Tsô Pilatu na un ian. Nahan a va tôô ikyom la kera.+
39 Nahan Nikodemu+ u yange va hen Yesu sha kwa hiihii tugh la kpa va a mire u i nungwa sha aloe yô, kuma er ukilogeram 30* nahan.+
40 Tsô ve tôô ikyom i Yesu ve kange ken ikyondo i i lu a akaahumandoon ker la,+ er Mbayuda iin ior la.
41 Kwagh ka a er yô, hen ape i wua un* la, sule lu her, uwar u he gema lu ken sule la,+ u i lu a vande iin or ker ga yô.
42 Er lu sha Iyange i Kohol Iyol+ i Mbayuda, man uwar la gema lu ikyua yô, ve ii Yesu ker.
Ngeren mba shin kpe
^ Shin “za mande un nen sha kon.”
^ Shin “manden we sha kon.”
^ Zwa Grika, “er ihwa i sha ataratar nahan.” Yange i hii u ôron ahwa ne pepe shighe u iyange ka i hii u duen la.
^ Shin “m mande.”
^ Nenge Ngeren u Pasen Asember.
^ Zwa Grika, “hen ihwa.”
^ Nenge Ngeren u Pasen Asember.
^ Shin “a tôndo iôôn.”
^ Yuhwa hemba tiôn ibya semetu kpuaa.
^ Shin “i mande un sha kon.”
