U Hiihii hen Mbakorinte 2:1-16
2 Nahan, anmgbianev, zum u m va hen a ven u va pasen ne icighan kwaghmyer+ u Aôndo la, m lu pasen un sha ihyemban kwaghôron+ shin tesen mer m ngu orfankwagh ga.
2 Gadia shighe u m lu vea ven la, m tsua u lamen a ven sha ma kwagh ugen môm ga, saa kwagh u Yesu Kristu, hemban je yô, kwagh u i mande un sha kon la.+
3 Shi yange m va hen a ven sha inja i or u lun a tahav ga, man a mciem man akarkase iyol kpishi;
4 m lu lamen shi pasen kwagh mer i̱ kuma ken ato er mbafantakeda ve eren nahan ga, kpa kwaghôron wam lu tesen tahav mbu icighan jijingi,+
5 sha er ne na jighjigh, a lu sha kwaghfan u ior ga, kpa a lu sha tahav mbu Aôndo yô.
6 Nahan se mba ôron kwagh u kwaghfan hen atô u ior mba ve vie ken jijingi yô,+ kpa ka kwaghfan u tar* ne ga, shi ka u mbahemen tar ne mba vea va kar kera la kpaa ga.+
7 Kpa se mba ôron ka kwaghfan u Aôndo u ken icighan kwaghmyer la,+ ka kwaghfan u a lu myer la je la. Cii man shighe ne yô, Aôndo vande wan ishima u va eren tom sha kwaghfan shon, sha ci u icivir yase.
8 Ka kwaghfan u orhemen môm ken tar* ne nan fe un ga yô,+ sha ci u, luun er mba a kwaghfan ne yô, yange ma ve wua* Ter u icivirigh la ga.
9 Kpa ka vough er i nger nahan, ér: “Akaa a ashe a nenge a mi ga, ato kpaa a ongo ga, shi a ve or ken ishima kpaa ga la, Aôndo wa ishima u va eren a sha ci u mba a doo ve ishima yô.”+
10 Gadia ka se Aôndo a pase se a+ sha jijingi na ye,+ sha ci u jijingi tôvon akaa cii, kua mbamhen mba Aôndo mba ve cimin* la je kpaa.+
11 Gadia ka an ken uumace nan fe akaa a orgene, saa ishima i* or shon tseegh gaa? Nahan, kape or kpa nan fe akaa a Aôndo ga, saa jijingi u Aôndo je la.
12 Nahan se ngohol ka jijingi u taregh ga, kpa ka jijingi u Aôndo,+ sha er se fatyô u fan akaa a Aôndo a ne se sha erdoo la yô.
13 Shi se mba ôron akaa shon, ka sha asemberakaa a i tesen sha kwaghfan u orumace la ga,+ kpa ka sha asemberakaa a i tesen sha jijingi la.+ Nahan se mba pasen* akaa a ken jijingi sha asemberakaa a jijingi.
14 Kpa or u nan eren kwagh sha mhen u iyolough yô, nan ngohol akaa a jijingi u Aôndo la ga, gadia ka a lu nan ibumekwagh; shi nana fatyô u fan a kpaa ga, sha ci u mba tôvon a sha iwasen i jijingi.
15 Nahan kpa, or u nan eren kwagh sha inja i jijingi yô, nan tôvon akaa cii,+ kpa nan iyol i nan yô, or tôvon nan ga.
16 Gadia “ka an nan fe ishima i Yehova* sha er nana tese unu?”+ Kpa se yô, se mba a mhen u Kristu.+
Ngeren mba shin kpe
^ Shin “kov.” Nenge Ngeren u Pasen Asember.
^ Shin “kov.” Nenge Ngeren u Pasen Asember.
^ Shin “ma ve mande.”
^ Shin “kua akaa a Aôndo a a cimin.”
^ Zwa Grika, “saa jijingi u.”
^ Shin “karen.”
^ Nenge Ngeren u Seer u A5 la.
