U Sha Uhar hen Mbakorinte 13:1-14
13 Ka kwa u sha utar je m lu wan iyol u van hen a ven ne. “Gba u shiada u iorov uhar shin utar una wanger hanma kwagh.”+
2 Shin er m lu a va ga nahan kpa, kam er m hila va kwa u sha uhar kera kpaa nahan, shi m ngu tan mba ve er isholibo la kua hanma or cii icin tsuaa mer, aluer m hide m va yô, me de ve ga.
3 Nahan kwagh ne una tese ne er Kristu a ôron kwagh sha ikyev yam yô. Man un yô, ngu tesen ér un gba kera hen atô wen ga, kpa ngu tesen er un lu a tahav kpishi yô.
4 Jighilii yô, yange i mande un sha kon sha ci u lu a tahav ga, kpa ngu uma sha tahav mbu Aôndo.+ Mimi je, se kpa se mba a tahav ga er un nahan, kpa se va lu vea na imôngo+ sha tahav mbu Aôndo mbu mbu eren tom ken a ven la.+
5 Karen nen ayol a en sha u ne fa aluer ne mba dondon akaa a ne ne jighjigh a mi la yô; eren nen kwagh u tesen ior mba ne lu la.+ Ne fa er Yesu Kristu a lu ken mzough a ven gaa? Saa Aôndo lumun ne ga di je.
6 Se yô, Aôndo lumun se. Mimi je, sarem u ma ne fe kwagh ne.
7 Nahan se mba eren msen ser Aôndo ma a wase ma ne er ma kwaghbo ga. Awashima wase ka u tesen ser ior lumun se ga, kpa se soo ser ma ne eren kwagh u dedoo, aluer ior lumun se ga je kpaa.
8 Gadia se fatyô u eren ma kwagh u hendan a mimi ga, saa kwagh u suen mimi tseegh.
9 Ka sea lu a tahav ga kpa ne nea lu a tahav yô, i saan se iyol. Shi ka kwagh u se lu eren msen sha mi je ne ser, ma ne kôôm gbenda wen.
10 Ka nahan ve m nger ne washika ne shighe u m lu a va ga ne ye, sha er zum u me va yô, me er tom a tahav mbu Ter a nem la me tsughur ishigh sha ga,+ kpa me taver ne ishima, me na ne iyolkpen ga yô.
11 U masen yô, anmgbianev, za nen hemen u ember shi kôôm gbenda wen shi zuan a ishimasurun+ shi lun ishima i môm+ shi lun ken bem;+ nahan Aôndo u dooshima man u bem+ la una lu a ven.
12 Sugh nen hanma wen, kuve nen ayol.*
13 Uicighanmbaiorov cii mba sughun ne.
14 Ne cii Ter Yesu Kristu a̱ tese ne erdoo na u hemban, shi Aôndo a̱ tese ne dooshima na shi zua nen a averen a icighan jijingi kpaa.
Ngeren mba shin kpe
^ Zwa Grika, “sugh nen hanma wen sha icighan zwa susen.”
