U Sha Uhar hen Mbakorinte 12:1-21
12 Gba u me kaa ihyagh. Nahan me lam sha akaa a Ter a tesem sha ivande m nenge a mi la,+ kua akaa a a pasem la,+ shin er u eren nahan la i lum a inja ga nahan kpaa.
2 M fa orgen u a lu ken mzough vea Kristu yô. Yange i tôô un i za a na sha, lu sha u sha utar la, a̱ lu ken iyol i inyam man awambe shin a̱ lu ker ga kpa m fa ga; kpa Aôndo yô fa. Kwagh ne er anyom kar 14 hegen.
3 Mimi je, m fa or la. A̱ lu ken iyol i inyam man awambe shin a̱ lu ker ga kpa m fa ga; kpa Aôndo yô fa.
4 Yange i tôô un i za a na ken paradiso za ungwa mkaanem ma or a fatyô u ôron ga, shi i ne ian ér or a̱ ôr kpaa ga yô.
5 Me kaa ihyagh sha kwagh u or la, kpa me kaa ihyagh sha kwagh wam iyol yam ga, saa sha akaa a m lu a agee a eren ga la tseegh.
6 Man aluer m soo u kaan ihyagh je kpa, me lu ibumeor ga, sha ci u me ôr a lu kwagh u mimi. Kpa m soo u eren nahan ga, sha er or a wuese mo a hemba kwagh u nan nenge a mi ken a mo shin nan ongo hen a mo la,
7 sha ci u akaa a kpilighyol a i pasem la ga yô.
I er kwagh u una na me kende a iyol sha ga yô; i wam asaa ken iyol,+ ortyom u Satan, ér a̱ zer tan mo sambe,* sha u m de kenden a iyol sha ga yô.
8 M zamber a Ter kwa tar sha kwagh ne, mer asaa ne ma a due ken a mo kera.
9 Kpa a kaa a mo ér: “Erdoo wam u hemban la kuma, gadia ka ken or u agee a yen nan la je ka m hemba tesen tahav av ye.”+ Sha nahan yô, me kaa ihyagh er m lu a agee ga yô, sha er tahav mbu Kristu mbua za hemen u lun sha a mo er ka tenti nahan yô.
10 Nahan ka i saan mo iyol shighe u m lu a agee ga man shighe u i lu tuhwan mo man shighe u m lu ken ibanave man shighe u i lu tôvon mo a ican shi m tagher a mbamtaver sha ci u Kristu yô. Gadia ka shighe u m lu a agee ga la ka m gema m lu a tahav ye.+
11 M hingir ibumeor. Ne na m hingir ibumeor, sha ci u ka ne ma ne wuese mo ye. Gadia mea lu kwagh ga je kpa, m er kwagh môm u tesen ér m yina sha mbaapostoli enev mba ve nengen ér ve hemba cii la sha ma gbenda môm ga.+
12 Jighilii yô, m er akaa a tesen ne er m lu apostoli yô sha ishima i wan tsung,+ kua uivande man akaa a kpilighyol kua ityom i ageegh.+
13 Kwagh u a ne ve ne yen sha atôônanongo agen yô, ka er yange m za ne iyol ga la tseegh gaa?+ Gba den nen mo kwagh u m er shami ga ne tsô.
14 Nenge! Ka kwa u sha utar je m kohol iyol u van hen a ven ne, shi ka u me va za ne iyol ga. Gadia ka akaa a ne lu a mi la kwagh a gbem a mi ga,+ kpa ka ne; sha ci u mba veren ishima ér mbayev+ ve koso kwagh sha ci u mbamaren vev ga, kpa ka mbamaren ka ve koso kwagh sha ci u mbayev vev ye.
15 Mo yô, a doom kpishi u eren hanma kwagh cii sha ci wen.+ Aluer ne doom ishima kpishi yô, mo me kera doo ne ishima kpishi gaa?
16 Nahan cii kpa, yange m za ne iyol ga.+ Kpa ne mba kaan ner yange m “er ayom” shi m er kwagh a ven sha “atseregh.”
17 Yange m ya mtsera sha a ven sha ikyev i ma or ken mba m tindi hen a ven laa?
18 Yange m taver Titu ishima shi m tindi anmgbianev a na imôngo. Titu yange ya mtsera sha a vene?+ Yange se lu zenden sha jijingi môm gaa? Se lu tôôn angahar kwaghmôm gaa?
19 Ne mba vanden henen kera ner se mba palegh iyol sha akaa a ne ôr sha a vese laa? Se mba ôron kwagh zwa môm vea Kristu sha ishigh ki Aôndo. Kpa, ne mba doon se ishima, akaa a se eren cii ka sha ci u taver ne ishima.
20 Gadia ka cier mo iyol er zum u me va yô, me kohol ne ne lu er i sarem la ga, shi mo kpa me lu er i sar ne la ga nahan, kpa alaghga a gema a lu iyuhwe man ishimanyoon man mpav man u lamen sha ior man u lamen ivarvase* man iyolmoron man anzughul.
21 Alaghga me hide shi me va yô, Aôndo wam una de ér m hee sha ishigh yenegh, nahan a gba u me zungwe sha kwagh u ior kpishi mba ve er isholibo kpa ve lu a gema ishima ve de ieren i hôngorough man idya* man ieren i ndôhôrshima* i ve er la ga yô.
Ngeren mba shin kpe
^ Zwa Grika, “a̱ zer gbidyen mo.”
^ Shin “eren angereke.”
^ Zwa Grika, porneia (ponia). Nenge Ngeren u Pasen Asember.
^ Shin “dang u eren.” Ka ishember i ken zwa Grika i i yer ér aselgeia (asejia) la. Nenge Ngeren u Pasen Asember.
