U Sha Uhar hen Mbakorinte 11:1-33
11 Sarem u ma ne we ishima a anibume wam ne tsô. Kpa jighilii yô, ne mba wan ishima a mo!
2 Gadia kwagh wen gbam ishima tsung er Aôndo kpa kwagh wen a gbe un ishima nahan, sha ci u m tôndo zwa u nan ne nom môm. M soo mer ma m tôô ne ma m ne Kristu, er iniuunkwase i i lu wang nahan.+
3 Kpa ka cier mo iyol, sha ci u, alaghga a va vihi mbamhen enev er iyô yange i mee Ifa sha ayom nahan,+ maa ne kera lu a mimi iyol ga shi ne kera lu wang er i doo u ne lu sha ci u Kristu la ga.+
4 Sha ci u or ka nana̱ va pase ne kwagh u Yesu ugen kposo a Yesu u yange se pase kwagh na la, shin nana̱ geman mhen wen sha jijingi ugen kposo a u yange ne ngohol la, shin nana̱ va a loho u dedoo ugen kposo a u yange ne ngohol la kpa,+ i taver ne u wan ishima a nan ga.
5 Gadia m nenge mer cuku tsô kpa m er kwagh u tesen ér m yina sha mbaapostoli enev mba ve nengen ér ve hemba cii la ga.+
6 Aluer mea fa iliam ga je kpa,+ mfe yô, mimi je m ngu a mi; jighilii yô, se pase ne kwagh ne wang sha hanma gbenda man ken akaa cii.
7 Yange doom u pasen ne loho u dedoo u Aôndo gbilin. Kpa er yange m hide a iyol yam ijime mer zua nen a icivir nahan, lu isholibo m er yee?+
8 M ngohol iwasen hen atôônanongo agen,* sha u me er ne tom a mi yô.+
9 Nahan kpa, zum u m nyôr ken ibanave shighe u m lu vea ven la, m za ma or iyol ga, gadia anmgbianev mba ken Masedonia va a akaa kpishi a kwagh gbam a mi la.+ Mimi je, yange m palegh u zan ne iyol sha hanma gbenda cii, shi me za hemen u eren nahan.+
10 M ngu ôron mimi u Kristu kpa una ôr yô, nahan me de u kaan ihyagh sha kwagh ne+ sha ajiir a ken Akaya ga.
11 Sha ci u nyi? Ka sha ci u ne doom ishima ga shinii? Aôndo fa er ne doom ishima yô.
12 Kpa hegen yô, ka u me za hemen u eren kwagh u m lu eren ne,+ sha er mba ve soo u zuan a ityôkyaa i* kaan ér ve mba kwaghmôm a vese sha akaa a* ve lu kaan ihyagh a mi la, vea zua a ityôkyaa ga yô.
13 Gadia ambaaior la ka mbaapostoli mba aiev, ka mbatomov mba tsughun ior; ka ve yer ayol sha u vea lu er ka mbaapostoli mba Kristu nahan yô.+
14 Man kwagh ne kpiligh se iyol ga, gadia Satan ka a zer yeren iyol sha u una lu er ka ortyom u iwangeregh nahan yô.+
15 Nahan, aluer mbatomov nav kpa zer yeren ayol a ve sha u vea lu er ka mbatomov mba perapera nahan yô, kpilighyol ga. Kpa mkur ve una lu er ityom ve la nahan.+
16 Shi m ngu kaan mer: Or a de henen ér m ngu ibumeor ga. Nea hen nahan je kpa, lumun nen mo er m ngu ibumeor nahan, sha er mo kpa me kaa ihyagh cuku yô.
17 Hegen m ngu ôron kwagh sha inja i or u dondon ikyav i Ter ga, kpa ka sha inja i ibumeor u nan suur sha iyol i nan shi nan kaan ihyagh yô.
18 Er ior kpishi ve lu kaan ihyagh sha inja i uumace yô, mo kpa me kaa ihyagh.
19 Ne “fa kwagh” je ka ne waan ishima a abumeaior saan saan.
20 Jighilii yô, ka a̱ lu or u nan ker ne kpan je kpa ne wa ishima a nan, shin a̱ lu or u nan ye ne kwagh, shin nan ngohol ne kwagh, shin nan nenge ér nan hemba ne, shin a̱ lu or u nan te ne sambe sha ishi kpaa.
21 M ngu ôron kwagh ne sha u kunya u kôr se a ayol a ase, sha ci u ka inja er se yina u eren tom a tahav asev sha inja nahan.
Kpa aluer kunya kôr mbagenev u kaan ihyagh ga yô, mo kpa kunya kôrom u kaan ihyagh ga, aluer orgen nan nenge ér m bume je kpaa.
22 Ka Mbaheberu shinii? Mo kpa m ngu Orheberu.+ Ka Mbaiserael shinii? Mo kpa m ngu Oriserael. Ka ônov mba* Aberaham shinii? Mo kpa m ngu wan* na.+
23 Ka mbatomov mba Kristu shinii? De m ôr er m ngu orihyundu yô, m hemba ngun ortom na cii: M hemba eren tom;+ i wuhem ken purusu kwa imôngo,+ i gbidyem acin gande u ôron, shi m war ku sha ikyughur kwa imôngo.+
24 Mbayuda gbidyem kwa taan, hanma kwa yô, yina akpa môm u lun mbaakpa 40;+
25 i gbidyem sha gbo acin atar,+ kwagen la i tam awen.+ Tso ur a mo acin atar;+ kwagen la m tsa ken atô u zegemnger iyange jimin, tugh man atetan;
26 ashighe kpishi m lu sha gbenda u zan zende, m tagher a akaabo shin uifi, m tagher a mbanumungbenda acin imôngo, m tagher ishigh a kwaghbo sha ikyev i ior av+ man sha ikyev i akuraior agen acin imôngo,+ m tagher ishigh a kwaghbo ken gar+ man ken taaikyôngo man ken atô u zegemnger man hen atô u anmgbianev mba aiev acin imôngo,
27 m er ityom kpoghuloo shi lu sha ican, m tsa per acin imôngo,+ ashighe agen m lu ijen shi imura i kôron mo,+ ashighe kpishi m lu a kwaghyan ga,+ m lu ken wuhe a ikyondo shio.*
28 Dugh atsan a sha iyol ne kera yô, kwagh ugen kpa lu zan mo iyol ayange ayange: Ishima lu nyian mo sha kwagh u atôônanongo cii.+
29 Ka an nan vôr, ve mo m vôr ga? Ka an nan nôngo gbeev ve i vihim ga?
30 Aluer gba keng u me kaa ihyagh yô, me kaa ihyagh sha akaa a a tese ér m vôr la.
31 Aôndo, Ter u Ter Yesu, Un u i gbe u a wuese un gbem sha won la, fa er m lu eren aie ga yô.
32 Zum u m lu ken Damaseku la, gomna u lu hemen shighe u Areta lu tor la, lu kuran gar u ior i Damaseku la ér una kôrom.
33 Kpa i wam shin ikyese i due a mo hen windou sha kpekpe u gar, i shiligh a mo ken won,+ nahan m yevese m war sha ikyev na.
