U Sha Uhar hen Mbakorinte 6:1-18
6 Er se lu eren tom vea na imôngo nahan,+ ne kpa se mba kaan a ven ser de ngohol nen erdoo u hemban u Aôndo la a u eren sha awashima u erdoo la shio ga.+
2 Gadia a kaa ér: “Yange m ungwa u hen shighe u tesen erdoo, shi sha iyange i myom la, m wase u.”+ Nenge! Ka hegen i hembe lun shighe u tesen erdoo cii ye. Nenge! Ka iyange i myom je ne.
3 Se mba eren kwagh u nan gbeev mbu nôngon sha ma gbenda môm ga, sha er a zua a ma mshi sha tom wase ga yô;+
4 kpa se mba tesen sha hanma gbenda cii ser se mba mbatomov mba Aôndo,+ sha u taver ishima ken akaa kpishi, man sha atsan a yan, man sha ashighe a ican,* man sha mbamtaver,+
5 man sha u yan gbidiv, man sha u nyôron purusu acin imôngo,+ man sha ashighe a ikpelaior i̱ mough ayôôso a vese, man sha tom u eren kpoghuloo, man sha u tsan per acin imôngo, man sha u lun ijen acin imôngo;+
6 sha mlu u wang, man sha mfe, man sha ishimawan,+ man sha erdoo,+ man sha icighan jijingi, man sha dooshima u sha atseregh ga,+
7 man sha kwaghôron u mimi, man sha tahav mbu Aôndo,+ a ikyav mbi utyaav mbi perapera+ ken uwegh ku iyanegh* man ku imesegh;*
8 ken icivir man ken ihyeen, ken ibaver i bo man ibaver i dedoo. I nenge se ér se mba mba tsughun ior, nahan kpa se mba mbaôronkwagh sha mimi,
9 se mba er i fa se ga nahan, kpa i fa se; ka inja er se mba sôôn kpen nahan,* kpa nenge! se mba uma;+ se mba er i tsaha se nahan, kpa i na se ken ku ga;+
10 ka inja er se mba zungwen nahan, kpa se mba ember hanma shighe cii; se mba er ka atsanaior nahan, kpa se mba nan ior kpishi mba hingir yôughyôugh; ka inja er se mba a kwagh ga nahan, kpa se mba a akaa cii.+
11 Se bugh zwa wase sha u lamen a ven,* ne ior i Korinte, shi se bugh ishima yase gbangelaa.
12 Se mba tesen ne ser ne doo se ishima a ikighir* shio,+ kpa ne yô, dooshima u ne tesen se la ngu a ikighir.
13 Nahan yô, m ngu ôron kwagh a ven er ka ônov av nahan mer, ne kpa bugh nen asema a en gbangelaa.+
14 I̱ de zuan ne* ken mzough u kpeegh vea mbanan jighjigh ga imôngo ga.+ Gadia ka nyi i zough perapera vea tindi u perene?+ Shin iwanger zua vea ime sha nyi?+
15 Heela tseegh ga, Kristu zua vea Belia* sha nyi?+ Shin or u nan jighjigh* nan zua vea ornan jighjigh ga sha nyi?+
16 Man ka nyi i zough tempel u Aôndo a akombo?+ Gadia se mba tempel u Aôndo u uma;+ ka vough er Aôndo a kaa nahan, ér: “Me tema hen atô ve,+ shi me zenden hen atô ve; me lu Aôndo ve, ve di vea lu ior av.”+
17 “‘Sha nahan yô, due nen hen atô ve kera, pav nen a ve,’ kape Yehova* a kaa la, ‘shi de nen u benden a kwagh u hôngorough’”;+ “‘nahan me ngohol ne.’”+
18 “‘Shi me hingir Ter wen,+ ne di ne hingir ônov av mba nomso man mba kasev,’+ kape Yehova,* un u a lu Uhembanagee Cii la, a kaa la.”
Ngeren mba shin kpe
^ Shin “ibanave.”
^ Adooga lu sha ci u tan num.
^ Adooga lu sha ci u yisan.
^ Shin “i nenge se ér se kuma ku.”
^ Shin “Se lam a ven gbar gbar.”
^ Shin “a iyoltangen.”
^ Zwa Grika, “I̱ de kangen ne igbur i môm.”
^ Shin “ormimi.”
^ Ka ishember i ken zwa Heberu, inja na yô ér, “Gbilinkwagh.” Ngi ôron kwagh u Satan.
^ Nenge Ngeren u Seer u A5 la.
^ Nenge Ngeren u Seer u A5 la.
