Hen Mbaroma 6:1-23
6 Nahan shi se kaa ser nyi? Se za hemen u eren asorabo sha er a seer tesen ser erdoo u hemban yôô?
2 Mayange ga! Er se lu kpenegh ken isholibo nahan,+ shi se za hemen u eren isholiboo?+
3 Shin ne fa er se mba yange i er se batisema se hingir ken mzough vea Kristu Yesu cii,+ se kpe a na imôngo gaa?+
4 Nahan yange i ii se a na imôngo sha batisema u i er se la,+ sha u se kpa se lu ken uma u he, vough er yange i nder Kristu shin ku sha tahav mbu* Ter, a lu ken uma u he nahan.+
5 Er se hingir u lun ken mzough vea na sha u kpen er un kpa yange kpe nahan yô,+ ka keng shi se va lu ken mzough vea na, sha ci u a va nder se shin ku er un kpa yange i nder un nahan.+
6 Gadia se fa, i mande aeren a ase a tse la sha kon vea na+ sha u iyol yase i isholibo la i de kera lu a tahav ga,+ nahan se de kera lun ikpan i isholibo ga yô.+
7 Gadia or u nan kpe yô, i kar a isholibo i nan kera.*
8 Shi aluer se kpe a Kristu imôngo yô, se na jighjigh ser shi se va lu uma vea na imôngo.
9 Gadia se fa ser, er hegen i nder Kristu shin ku yô,+ una kera kpe mayange ga;+ ku kera ngu a tahav sha a na ga.
10 Ku u yange kpe la, a kpe u kwa môm maa kure kwagh la gbem sha won,+ sha u karen a isholibo kera, nahan mayange una kera kpe ga. Ngu uma hegen sha u eren ishima i Aôndo.
11 Sha nahan yô, ne kpa tôô nen ner ne kpe ken isholibo, kpa ne gema ne mba uma sha er ne er ishima i Aôndo sha u dondon Kristu Yesu yô.+
12 Nahan yô, de lumun nen ner isholibo i za hemen u yan tor ken iyol yen i kpen ne,+ sha u ne hingir u eren asaren a i ga.
13 Shi de kera naan nen iyol yen* sha ikyev i isholibo sha u eren kwaghbo kpaa ga. Kpa gema wa nen ayol a en sha ikyev i Aôndo inja er i nder ne shin ku ne hide ne mba uma nahan, shi wa nen iyol yen* sha ikyev i Aôndo sha u eren kwagh u dedoo.+
14 Gadia gba u isholibo ia ya tor sha a ven ga, sha ci u ne kera mba sha ikyev i tindi ga,+ kpa Aôndo ngu tesen ne erdoo u hemban la.+
15 Nahan se er nena? Ka u se gbaa eren asorabo tsô sha ci u se kera mba sha ikyev i tindi ga, kpa Aôndo ngu tesen se erdoo u hemban yumuu?+ Mayange ga!
16 Ne fa gaa? Aluer ne na ayol a en sha ikyev i or ner ne hingir ikpan i nan shi ne ungwan imo i nan yô, ne mba ikpan i or u ne ongo imo i nan la;+ a̱ lu isholibo yô,+ ia za a ven ken ku,+ a̱ lu u ungwan imo i Aôndo yô, ne hingir mbaperapera.
17 Nahan se sugh Aôndo er yange ne lu ikpan i isholibo, kpa hegen ne hingir mbaungwan kwagh a ishima i môm sha ityesen i Aôndo a ne ne la yô.
18 Er yange ne kera lu ikpan i isholibo ga la je,+ ne hingir ikpan i perapera.+
19 Er iyol yen i yen yô, m ngu ôron kwagh sha asember a ior ve fe yô; er yange ne na alegh a iyolough a en lu ikpan i akaa a hôngorough man akaa a dang sha u eren asorabo la, hegen gema na nen alegh a iyolough a en a hingir ikpan i perapera sha u eren akaa a wang.+
20 Gadia shighe u ne lu ikpan i isholibo la, perapera lu hemen ne ga.
21 Hen shighe la lu atam a nyi ne lu umene? Lu akaa a kunya u ker ne sha mi hegen la. Gadia akaa la aa za a ven ken* ku.+
22 Nahan kpa, er hegen i de ne asorabo ne hingir ikpan i Aôndo yô, ne mba umen atam sha u eren akaa a wang,+ man injar* yô, ka uma u tsôron.+
23 Gadia injar i isholibo yô, ka ku,+ kpa iyua i Aôndo a ne yô, ka uma u tsôron+ ken Kristu Yesu Ter wase.+
