Hen Mbaroma 3:1-31
3 Nahan yô, shi ka a inja u lun Oryuda sha nyi? Man icôngo yô, ngi a inja sha nyi?
2 Ka a inja kpishi sha hanma gbenda cii. Hiihii yô, yange i wa ve icighan loho u Aôndo sha ikyev.+
3 Sha nahan yô, aluer Mbayuda mbagenev mba a jighjigh u nan ga yô, a kaa ér nyi? Er ve ban a jighjigh yô, tese ér ior vea kera fatyô u nan Aôndo jighjigh gaa?
4 Mayange ga! Aluer ior cica cii vea eren aie je kpa,+ kwaghôron u Aôndo yô una lu u mimi,+ vough er i nger nahan, ér: “U lu perapera zum u u ôr kwagh yô, man shighe u ior ve lu nan we ibo kpaa, u tese er u lu a ishô yô.”+
5 Nahan kpa, aluer iferkwagh i se eren la gema na ior nenge er Aôndo a lu u perapera yô, se kaa ser nyi? Aôndo ka una tsaha se yô, i tese ér a er a vese shami gaa? (Kape ior mbagenev ve henen je la.)
6 Ka nahan ga cii! Aluer ka nahan yô, Aôndo una ôr tar ijir nena?+
7 Kpa aluer m er aie, man aie la tese ér kwaghôron u Aôndo ka u mimi shi a na ior mba wuese un yô, er nan Aôndo shi a nengen mo ér m ngu orsholibo?
8 Er nan se kaa ser: “De se eren nen akaabo sha u akaa a dedoo a̱ due ker” ga? Gadia ka kwagh u ior mbagenev ka ve wa se iyol ér se mba ôron je la. Sha kpôô yô, ambaaior la kuma mtsaha.+
9 Nahan se kaa ser nyi? Kwagh wase ngu guda a u mbagenev shinii? Mayange ga! Gadia se vande ôron ser Mbayuda kua Mbagrika cii mba sha ikyev i isholibo;+
10 ka vough er i nger nahan, ér: “Orperapera ngu ga, môm tsô kpaa ga;+
11 or môm u lun a kwaghfan nan ngu ga; or môm ngu u nan keren Aôndo ga.
12 Ior cii gema ijime, ve cii ve kera gba kwagh ga; or u tesen erdoo nan ngu ga, mô tsô kpaa ga.”+
13 “Gôngor ve ka uwar u u lu ivegher yô; ve tsugh ior sha iniombor ve.”+ “Megh ku igbindegh ku sha ityumbujôôgh ve.”+
14 “Zwa ve iv a ityuhwanev man ishima i yuan.”+
15 “Angahar a ve ka a zaan ayem u za haan awambe inya.”+
16 “Mtim man ican mba sha igbenda ve,
17 ve fa gbenda u bem ga.”+
18 “Mba cie Aôndo je ga.”+
19 Hegen se fa, hanma kwagh u Tindi a kaa cii, ka sha ci u mba ve lu sha ikyev i Tindi la, sha u hanma or nana̱ cir zwa, shi tar cii u ya ibo sha ishigh ki Aôndo yô.+
20 Nahan sha tindi u kuran tseegh yô, or môm kpa a kaa ér nan ngu orperapera sha ishigh nagh ga,+ gadia ka tindi ka a na i fa isholibo wang ye.+
21 Kpa hegen ne, i pase wang ér, dugh tindi sha kpa, or a fatyô u eren kwagh u perapera sha ishigh ki Aôndo.+ Man ka kwagh u i pase ken Tindi kua Uprofeti* kpaa je la.+
22 Se fatyô u eren kwagh u perapera sha ishigh ki Aôndo sha u nan Yesu Kristu jighjigh, man kwagh ne ngu sha ci u hanma or u nan ne jighjigh cii, i sange a sange ga.+
23 Gadia ior cica cii er isholibo, nahan kera mba a iengem i Aôndo ga,+
24 kpa Aôndo na ve iyua gbilin,+ er a tese ve erdoo u hemban,+ a kaa ér mba mbaperapera sha u paan ve sha nagh ku ipaan ku Kristu Yesu a kimbi la yô.+
25 Aôndo na un ér a lu nagh ku wamen*+ sha awambe a na la;+ a hingir gbenda u den mba ve ne un jighjigh la isholibo. Lu sha u una tese perapera na, gadia Aôndo lu vanden wan ishima, den asorabo a ior lu eren sha ayange a tsuaa la.
26 Lu sha u una tese perapera na+ sha ayange ne, sha er zum u una kaa ér or u nan ne Yesu jighjigh la nan ngu orperapera je kpa, a lu vough yô.+
27 Nahan se mba a ityôkyaa i kaan ihyagha? Ityôkyaa ngi ga. Ka tindi u han se fatyô u kaan ihyagh a mini? Ka tindi u sha kwagh u aerenee?+ Mayange ga; ka tindi u sha kwagh u jighjigh u nan.
28 Gadia se nenge ser, mba kaan ér or ngu orperapera ka sha jighjigh u nan, ka sha tindi u kuran ga.+
29 Shin un ka Aôndo u Mbayuda tseeghele?+ Kera ka Aôndo u ior mba ken akuraior kpaa gaa?+ Sha kpôô yô, ka u ior mba ken akuraior agen kpaa.+
30 Er Aôndo a lu môm yô,+ una yila mba i tsenge ve la ér mbaperapera+ sha ci u jighjigh ve u nan, shi mbapyusugh kpaa una yila ve ér mbaperapera+ sha ci u jighjigh ve u nan.
31 Nahan yô, se de kwagh u atindi sha ci u se na jighjigh yumuu? Mayange ga! Kpa se mba we atindi ikyo.+
