Hen Mbaroma 7:1-25
7 Anmgbianev, ne fa zan gaa? (Gadia m ngu ôron kwagh a mba ve fe tindi yô.) Er or nan lu uma je, nan ngu sha ikyev i Tindi.*
2 U tesen ikyav yô, kwase u nan lu a nom yô, tindi kange nan vea nom u nan shighe u nom a lu uma la, kpa aluer nom u nan kpe yô, nan kera ngu sha ikyev i tindi u nom u nan la ga.+
3 Nahan aluer nan hingir kwase u orgen shighe u nom u nan a lu uma la yô, a yila nan ér idyakwase.+ Kpa aluer nom u nan la kpe yô, nana kera lu sha ikyev i tindi u nom u nan la ga, nahan nana hingir kwase u orgen kpa, a kera yila nan ér idyakwase ga.+
4 Nahan, anmgbianev av, ne kpa yange iyol i Kristu na ne lu kpenegh sha kwagh u Tindi, sha er ne hingir kwagh u orgen yô,+ ka un u yange i nder un shin ku la je la,+ man sha er se ume atam sha ci u icivir i Aôndo yô.+
5 Gadia shighe u se lu uma sha inja i iyolough la, Tindi wase se u nengen a asaren a bo a a lu eren tom ken iyol yase,* zan a vese ken ku la.+
6 Kpa hegen se kera mba sha ikyev i Tindi ga,+ sha ci u se mba kpenegh sha kwagh u yange kange se la, sha er se hingir ikpan sha gbenda u he, sha jijingi,+ a kera lu sha gbenda u tse, sha Tindi* ga yô.+
7 Nahan se kaa ser nyi? Tindi ka isholiboo? Mayange ga! Mimi je, luun er Tindi ngu ga yô, ma m fetyô u fan kwagh u a lu isholibo ga.+ U tesen ikyav yô, er Tindi a kaa ér: “De tômon kwagh u or ga” yô, kwagh la wasem m fa kwagh u a lu kwaghtômon yô.+
8 Ka tindi a ne m fe kwagh u a lu isholibo jim jim ye, sha ci u m fa er m tômon kwagh sha hanma gbenda cii yô, man kwagh la ka isholibo. Gadia shighe u tindi lu ga la, isholibo lu kpenegh.+
9 Jighilii yô, yange m lu uma shighe u tindi lu ga la. Kpa tindi za ve yô, isholibo shi hide lu uma, kpa mo m gema m kpe.+
10 Nahan tindi u yange ma za a mo ken uma la,+ gema za a mo ken ku.
11 Gadia tindi na yô, isholibo zua a ian meem wuam sha tindi shon.
12 Nahan Tindi iyol na ka icighankwagh, shi kwagh u a kaa la kpa ka icighankwagh man kwagh u perapera man u dedoo.+
13 Sha nahan yô, kwagh u dedoo gema vam a ku shinii? Mayange ga! Kpa ka isholibo i er nahan ye. I̱ na kwagh u dedoo la hingir kwagh u van mo a ku.+ Sha nahan yô, tindi tese er isholibo i lu kwagh u vihin tsung yô.+
14 Gadia hegen se fa, Tindi ka kwagh u ken jijingi, kpa mo m ngu iyol i inyam tsô, i teem m hingir kpan u isholibo.+
15 M fa kwagh u m eren ga. Gadia ka kwagh u a sarem la m eren ga, gema ka kwagh u m soo ga la m eren ye.
16 Nahan kpa, aluer ka kwagh u a sarem ga la m gem m eren yô, m lumun mer Tindi doo.
17 Nahan jighilii yô, kera ka mo iyol yam m eren un ga, kpa ka isholibo i i tem ken a mo la.+
18 Gadia m fa, kwagh u dedoo môm ngu ken a mo ga, ka ken iyol yam je la; sha ci u m ngu a isharen i eren kwagh u dedoo, kpa m gema m fetyô u eren ga.+
19 M eren kwagh u dedoo u a sarem la ga, kpa ka kwagh u bo u a sarem ga la m gem m eren ye.
20 Nahan, aluer ka kwagh u a sarem ga la m eren yô, kera ka mo m eren un ga, kpa ka isholibo i i tem ken a mo la.
21 Nahan m mase kaven tindi ne ken iyol yam: Ka a saren mo u eren kwagh u vough yô, isharen i eren kwagh u bo la kpaa i lu a mo.+
22 Ken ishima yam yô, kwagh u tindi u Aôndo gbam ishima sha mimi,+
23 kpa m gema m kav tindi ugen ken iyol yam,* ngu nôngon num a tindi u a lu ken mhen wam la,+ yemen a mo sha u m za hingir kpan u tindi u isholibo,+ u a lu ken iyol yam* la.
24 Aye, kwagh tserem ve! Ka an nana shi yimam sha ikyev i iyol i i lu yemen a mo ken ku ne sha wono?
25 I̱ wuese Aôndo ken Yesu Kristu Ter wase! Nahan, ken mhen wam yô, m ngu kpan u tindi u Aôndo, kpa ken iyol yam yô, m ngu kpan u tindi u isholibo.+
