Hen Mbaroma 8:1-39
-
Ka sha jijingi or zough a uma shi nan dugh ken kpan kera ye (1-11)
-
Jijingi ka a er shiada ér se mba ônov (12-17)
-
Akaa a i gbe la nga keghen shighe u a pase ônov mba Aôndo la (18-25)
-
‘Jijingi ka a zamber sha ci wase’ (26, 27)
-
Aôndo tsengatseghan ior (28-30)
-
Se mba hemban sha ci u se doo Aôndo ishima (31-39)
8 Sha nahan yô, i nenge mba ve lu ken mzough vea Kristu Yesu la ér ve kuma ku ga.
2 Gadia tindi u jijingi la ne uma, sha er u lu ken mzough vea Kristu Yesu yô. Shi tindi la pase u,+ u kera ngu sha ikyev i tindi u isholibo man ku la ga.
3 Er Tindi yange yina sha ci u myen u orumace yô,+ a fatyô u karen a isholibo kera ga.+ Nahan Aôndo tindi Wan na+ ken iyol i orumace i isholibo la+ va kar a isholibo kera. Sha nahan yô, Aôndo bee a isholibo ken iyol sha,
4 sha er a kure kwagh u perapera u a lu awashima u Tindi la ken a vese yô,+ sha ci u se mba eren kwagh sha inja i iyolough ga, kpa ka sha inja i jijingi.+
5 Gadia mba ve eren kwagh sha inja i iyolough la mba veren ishima sha akaa a iyolough,+ kpa mba ve eren kwagh sha inja i jijingi yô, mba veren ishima sha akaa a ken jijingi.+
6 Gadia u veren ishima sha akaa a iyolough la ka ku,+ kpa u veren ishima sha akaa a ken jijingi yô, ka uma man bem;+
7 sha ci u ieren i veren ishima sha akaa a iyolough la ngi ihyom a Aôndo,+ gadia ngi sha ikyev i tindi u Aôndo ga, shi ia fatyô u lun kpaa ga.
8 Nahan mba ve eren kwagh sha inja i iyolough la vea fatyô u eren ishima i Aôndo ga.
9 Nahan kpa, aluer mimi je jijingi u Aôndo ngu ken a ven yô, ne mba eren kwagh sha inja i iyolough ga, kpa ka sha jijingi.+ Kpa aluer or ngu a jijingi u Kristu ga yô, or la nan ngu kwagh na ga.
10 Aluer Kristu ngu ken mzough vea ven yô,+ iyol ngi kpenegh sha ci u isholibo, kpa jijingi la ne uma, gadia Aôndo nenge ér ne mba mbaperapera.
11 Aluer jijingi u un shon u yange nder Yesu shin ku la ngu ken a ven yô, un u yange nder Kristu Yesu shin ku la+ una na iyol yen i i kpen la kpa ia lu uma+ sha jijingi na u a lu ken a ven la.
12 Sha nahan yô, anmgbianev, gba u se de ser iyol yase i kighir se se eren kwagh u i soo la ga.+
13 Gadia aluer ne mba eren kwagh sha inja i iyolough yô, ne kpe kpee je; kpa aluer ne wua aeren a iyolough la+ sha jijingi yô, ne lu uma.+
14 Mba jijingi u Aôndo a hemen ve cii yô, mba ônov mba Aôndo jim.+
15 Gadia ne ngohol ka jijingi u lun ken kpan, sha u ne hide shi ne lu ken mcie ga, kpa ne ngohol ka jijingi u hingir ônov; man ka sha jijingi shon kpaa se yilan ser: “Aba,* Tere!” ye.+
16 Jijingi la iyol na ka a er shiada vea jijingi wase+ ér se mba ônov mba Aôndo.+
17 Nahan, aluer se mba ônov yô, se mba mbayandyako kpaa—man se mba mbayandyako u Aôndo jim, shi se mba mbayandyako a Kristu imôngo+—aluer se ya ican vea na imôngo+ sha er a va ver se sha ian i icivirigh a na imôngo yô.+
18 Gadia m nenge mer atsan a se lu yan hegen ne kuma sha iengem i a va pase ken igbar sha kwagh wase la cuku tsô kpaa ga.+
19 Gadia akaa a i gbe la nga veren ashe keghen shighe u a va pase ônov mba Aôndo ken igbar la,+
20 sha ci u akaa a i gbe la cii yange i gbihi a ken mlu u gbilinigh,+ lu sha ishima i a ga, kpa lu sha ishima i un u gbihi a la, sha ci u ishimaverenkeghen lu
21 ér a va pase akaa a i gbe a la+ a̱ de kera lu ikpan i iyol i i hôôn ne ga, kpa a̱ lu sha ian i icivirigh i ônov mba Aôndo mba i pase ve, ve kera lu uikyangen ga la.
22 Gadia se fa, akaa a i gbe a la cii nga kinen imôngo shi nga ken mnyoon zan zan hegen.
23 Kpa ka a tseegh ga, se mba se ngohol iyiagh ki i hii sundan la, ka jijingi je la; se ayol a ase kpa se mba kinen ken avanger a ase,+ keghen shighe u a va yila se se hingir ônov la a ishima i môm,+ zum u nagh ku ipaan kura ku a na a pase se, se kera lu ken iyol yase ne ga la.
24 Gadia se zua a ishimaverenkeghen ne zum u i yima se la. Kpa zum u i nenge a kwagh u i lu veren ishima keghen yô, ishimaverenkeghen la bee; sha ci u zum u or nenge a kwagh yô, shi nan lun a ishimaverenkeghen sha minii?
25 Kpa ka sea lu a ishimaverenkeghen+ sha kwagh u se lu a nenge a mi ga yô,+ i sar se tsung u nengen a mi, se wa ishima se keghen.+
26 Kape jijingi kpa ngu a wase se shighe u se vôr je la,+ sha ci u zayol yô, ka se fa kwagh u i doo u se er msen sha mi er i gbe u ma se er la ga, kpa jijingi iyol na ngu a zamber sha ci wase zum u se lu kinen shin ishima yô.
27 Kpa un u a tev asema la+ fa kwagh u jijingi, gadia jijingi ngu zamber sha ci u uicighanmbaiorov, vough er Aôndo a soo la..
28 Se fa, Aôndo ka a na ityom na cii i zaan sha inja sha inja sha ci u iwasen i mba Aôndo a doo ve ishima la, ka mbara mba i tsough ve sha awashima na je la;+
29 sha ci u sha hiihii la je yange fa mba lu u una tsua ve la, shi tsenga tseghan ve* ér ve lu er Wan na nahan,+ sha er Wan na una lu waniunda+ u lun a anmgbianev kpishi yô.+
30 Man ka mba a tsenga tseghan ve la,+ shi a yer ve ye.+ Man ka mba a yer ve la shi a kaa ér mba perapera ye.+ Shi ka mba a kaa ér mba perapera la shi a ver ve sha ian i icivirigh kpaa ye.+
31 Nahan se kaa ser nyi sha akaa nee? Aluer Aôndo ta ikyaa a vese yô, ka an nana hendan a vese?+
32 Er Wan na je kpa yange tange ga, gema un na sha ci wase cii nahan,+ una kera na se akaa agen kpaa gbilin, u seer sha a na gaa?
33 Ka an nana wa mba Aôndo a tsough ve la ijiri?+ Ka Aôndo iyol na a kaan ér mba perapera ye.+
34 Ka an nana na ve ibo? Ka Kristu Yesu iyol na yange kpe ye, shi ka un yange i nder un shin ku ye; ngu ken uwegh ku iyanegh ku Aôndo,+ shi ka un kpa a lu zamber sha ci wase ye.+
35 Ka nyi je ia pav se a dooshima u Kristu?+ Ka ican shin ka ishimanyiana? Ka mtev u sha ican shin ka ijen shin ka idyelegh shin ka kwagh u cier iyol shin ka sankere?+
36 Ka vough er i nger nahan, ér: “Ka i shi wuan se sha kwagh wou didi; i nenge se mba er ka iyôngo i i gbe u a za sôngo yô.”+
37 Nahan kpa, se mba hemban akaa ne cii,+ sha iwasen i un u se doo un ishima la.
38 Gadia m fa dedoo mer, ku shin uma shin mbatyomov shin ugomoti shin akaa a hegen shin akaa a ken hemen shin tahav+
39 shin akaa a sha gayô akaa a shin, gayô ma kwagh ugen u i gbe a gba kpaa, una fatyô u paven se a dooshima u Aôndo u ken Kristu Yesu Ter wase la ga.
