Hen Mbaroma 2:1-29
2 Nahan yô, wea lu nyi or je kpa,+ aluer u ngu ôron mbagenev ijir yô, anngôm, u ngu a ishô ga; gadia zum u u ôr orgen ijir yô u ôr ka ijir you, sha ci u u ngu eren akaa shon a u lu ôron ijir sha mi la.+
2 Se fa, Aôndo ka a ôr mba ve eren ambaakaa la ijir ér ve kuma mtsaha, man ijirôron i Aôndo ka i mimi.
3 Kpa, anngôm, aluer u ngu ôron mba ve eren ambaakaa la ijir man we kpa u ngu eren a yô, u hen wer u war ijirôron i Aôndo?
4 Shin er Aôndo a lu a erdoo kpishi+ shi a gbe ishima ikyôr+ shi a lu wan ishima+ nahan cii kpa kwagh la gba u kwagh gaa? U kera fa er i lu sha erdoo u Aôndo la a lu nôngon ér u̱ gema ishima gaa?+
5 Kpa er u taver ityough shi u soo u geman ishima ga yô, u ngu van a iyugh i Aôndo sha iyol you. Una pase i sha iyange i una ôr uumace ijir la, man una ôr i sha perapera je.+
6 Una na hanma or injar sha aeren a nan:+
7 mba ve lu keren iengem man icivir man mtsôr+ shi ve lu wan ishima eren kwagh u dedoo la cii, una na ve uma u tsôron;
8 kpa mba ve eren ayôôso man mba ve vende mimi, ve gem ve lumun iferkwagh la yô, vea tagher a iyugh kua ishimavihin.+
9 Hanma or u nan eren kwaghbo cii, nana tagher a ican man mbamzeyol, Oryuda hiihii, maa Orgrika kpaa;
10 kpa hanma or u nan eren kwagh u dedoo yô, nana zua a iengem man icivir man bem, Oryuda hiihii,+ maa Orgrika kpaa.+
11 Gadia Aôndo sangen a sange ga.+
12 Mbafan atindi ga mba ve er isholibo cii vea kpe, aluer mba a atindi ga je kpaa;+ kpa mba ve fe atindi shi ve er isholibo cii, a ôr ve ijir sha atindi.+
13 Gadia ka mba ve ungwan a ungwa tindi la ve lu perapera sha ishigh ki Aôndo ga, kpa ka mba ve eren kwagh u tindi a tese la a yila ve ér mbaperapera ye.+
14 Gadia ior mba ken akuraior mba ve fe tindi ga la,+ mba eren kwagh sha tindi sha gbaaôndo ve je. Er ve fe tindi ga nahan kpa, mba tesen ér mba a tindi ken a ve.
15 Ve ayol a ve ka ve tese ér i nger tindi ken asema a ve, shighe u imoshima ve kpa ka i eren shiada, shi asema a ve a naan ve ibo, shin a naan ve ishô la.
16 Kwagh ne una er sha iyange i Aôndo una ôr uumace ijir sha akaamyer a ve eren la,+ sha ikyev i Kristu Yesu, er m pasen ken loho u dedoo nahan.
17 Nahan aluer u ngu Oryuda ken iti,+ man u ngu suur sha atindi shi kaan ihyagh sha mlu wou vea Aôndo,
18 shi u fa awashima na shi u lumun a akaa a a lu a vough sha ci u i tese u Tindi,*+
19 shi u na jighjigh wer u ngu or u hemen mbaapirashe shi u ngu iwanger i mba ve lu ken ime,
20 u ngu or u kôôm mba kaven kwagh ga, man or u tesen mbayev mba kiriki, shi u kav akaa a hange hange man a mimi a ken Tindi la yô—
21 ka u tese orgen, man er nan u gem u tesen iyol you ga?+ We u u pasen kwagh u kaan wer, “De iin ga” la,+ u gem u iinii?
22 We u u kaan wer, “De eren idya ga” la,+ u gem u eren idyaa? We u u ker ieev ihyom tsung la, u gem u iin ken utempel mba akombovoo?
23 We u u te ihyagh a tindi la, u gem u lahan Aôndo sha u peren Tindi?
24 Gadia ka vough er i nger nahan, ér: “Ne na ior mba ken akuraior mba lahan iti i Aôndo.”+
25 Jighilii yô, saa u kuran tindi+ ve icôngo you+ ia lu a inja ye, kpa aluer u ngu peren tindi yô, icôngo you la hingir ipyusu.
26 Nahan yô, aluer or-ipyusu+ nan ngu eren kwagh u Tindi a tese ér ka u perapera la yô, a nenge nan ér nan ngu or-icôngo, shin ka nahan ga?+
27 Nahan or shon u i tsenge nan ga la, er nan lu eren kwagh u Tindi a tese yô, nana ôr u ijir, we u i tsenge u shi u lu a tindi kpa u gem u peren un la.
28 Gadia ka sha mluashe u nan a kaa ér nan ngu Oryuda ga,+ shi icôngo i nan kpaa ka kwagh u sha iyol ga.+
29 Kpa nan ngu Oryuda u kimi,+ shi i tsôngo nan ka ken ishima+ sha jijingi, ka sha atindi ga.+ Nana zua a iwuese hen Aôndo, a lu hen ior ga.+
Ngeren mba shin kpe
^ Shin “i ôr u Tindi u ungwa.”
