Hen Mbaroma 9:1-33
9 M ngu ôron mimi ken Kristu, m ngu eren aie ga, gadia imoshima yam ngi eren shiada vea mo sha icighan jijingi
2 er m lu zungwen tsung shi ishima i zer vihin mo gbem yô.
3 Gadia mo yô, guda i pavem a Kristu er or u i we nan ifyan nahan, sha ci u anmgbianev av mba se lu tar môm la,
4 ka Mbaiserael je la. Ka ve yange i lumun ve u lun ônov mba Aôndo,+ shi i ver ve sha ian i icivirigh, shi i ya ikyur a ve,+ shi i na ve Tindi+ kua icighantom,+ shi i er uityendezwa+ a ve kpaa ye.
5 Ve due ken uter vev,+ shi ka ken a ve Kristu kpa a dugh sha inja i iyolough ye.+ I̱ wuese Aôndo u a lu a tahav sha akaa cii la gbem sha won. Amen.
6 Nahan kpa, u ngu wer kwaghôron u Aôndo la gba inya ga. Gadia ka mba ve dugh ken tsombor u Iserael cii ve lu “Iserael” kpôô kpôô ga.+
7 Shi er ve dugh ken tsombor u Aberaham nahan cii kpa, ka ve cii ve lu ônov* ga;+ kpa i nger ér: “Mba a yila ve ér ônov ou* la, vea due ken Isaka.”+
8 Inja na yô, ka mba ve lu ônov sha inja i iyolough la ve lu ônov mba Aôndo kpôô kpôô ga,+ kpa ka ônov mba ityendezwa+ mbara i nenge ér ka ônov mba* Aberaham ye.
9 Gadia kwaghôron u ityendezwa la kaa ér: “Inyom i sha, me vaan hen shighe ne nahan yô, Sara una mar wan u nomso.”+
10 Lu hen shighe la tseegh ga, kua shighe u Rebeka wa iyav a or môm, ka ter wase Isaka je la,+ mbu lu u una mar ahina la kpaa.
11 Aôndo yange vande wan ishima u tsuan or, shi fa er una tsua nan la kpaa; lu u una tsua nan sha ci u ityom i nan er ga, kpa lu u un iyol na una tsua or u soo u yilan la. Nahan, er i lu a mar ônov mbara ga, shi ve lu a er kwagh u dedoo shin u bo ga la je,
12 i kaa a na* ér: “Wan u vesen la una lu kpan u wan u kiriki la.”+
13 Ka vough er i nger nahan, ér: “Yakob yange doom ishima, kpa Isou yô, m kôr un ihyom.”+
14 Nahan se kaa ser nyi? Aôndo eren kwagh sha ifer shinii? Mayange ga!+
15 Gadia a kaa a Mose ér: “Ka or u i lum ape zungwen nan mhôônom la, me zungwe nan mhôônom ye, shi ka or u kunya u kerem a nan la, me tese mer kunya kôrom a nan ye.”+
16 Sha nahan yô, ka sha isharen i or shin sha iniôngon i nan* Aôndo una zungwe nan mhôônom ga, kpa ka sha mnenge u Aôndo u a zungwen mhôônom la.+
17 Gadia ruamabera kaa a Farou ér: “Ityôkyaa i i ne ve m de u lu uma her yô ka i ne: ka sha u me tese tahav av sha kwagh wou, shi me na a pase iti yam sha tar cii yô.”+
18 Sha nahan yô, or u a nenge i doo un cii ka a zungwe nan mhôônom, shi or u a nenge i doo un cii ka a de nan cighir ishima.+
19 Nahan pinem ase wer: “Er nan ve shi ka a zua or a ibo? Ka an nana fatyô u yangen un u eren ishima naa?”
20 Kpa we or, u ngu di nyi ve u hendan kwagh a Aôndo?+ Kwagh u i maa un a maa ka a hide a pine un u maa un la ér: “Er nan u maam nahanaa?”+
21 Ka nyi ase? Ormaantyegh ngu a tahav sha inyatyuu ga zee?+ Una fatyô u coon inyatyuu maan ikyagh ki eren kwagh u icivirigh a mi kua ki eren kwagh u icivirigh ga a mi sha inyatyuu shon i môm gaa?
22 Nahan aluer Aôndo yange soo u tesen iyugh na kua tahav nav ken igbar, kpa wa ishima tsung, de mkam ma ma kom iyugh na, i lu u a tim ma kera la ma her di ye?
23 Man aluer yange er kwagh ne sha u tesen er un zough a icivir kpishi sha kwagh u mkam ma ma kom u una zungwe ma mhôônom,+ ma yange maa ér ma̱ zua a icivir la di ye?
24 Ka se je la, se mba yange yila se, lu ken Mbayuda tseegh ga, kpa kua ken akuraior kpaa la.+
25 Ka kwagh u yange ôr ken Hosea kpaa je la, ér: “Me yila mba ve lu ior av ga la+ mer, ‘ior av’; kwase u a doom ishima ga la kpaa, me yila un mer, ‘u̱ doon mo ishima’;+
26 shi hen ijiir i yange i kaa a ve ér, ‘Ne mba ior av ga’ la, a yila ve her ér, ‘ônov mba Aôndo u uma.’”+
27 Shi Yesaia yange ôr kwagh u Iserael genger genger ér: “Shin er ônov mba Iserael ve ngee er waarawa u shin zegemnger nahan kpa, a yima a lu asande a ve tseegh.+
28 Gadia Yehova* una ôr tar ijir una kure; una ngôôr kuren i ga.”*+
29 Shi ka vough er Yesaia tsengaôron nahan, ér: “Luun er Yehova* u akum a sha shi se vor* her ga yô, ma se hingir vough er Sodom nahan, shi ma se lu er Gomora nahan.”+
30 Nahan se kaa ser nyi? Se kaa ser, shin er ior mba ken akuraior lu keren u eren kwagh u perapera ga nahan kpa, ve hingir mbaperapera,+ man lu sha jighjigh u nan ve hingir mbaperapera ye;+
31 kpa Mbaiserael yô, shin er ve lu keren ér vea kuran tindi u perapera nahan kpa, ve fatyô u kuran tindi la ga.
32 Sha ci u nyi? Sha ci u ve lu nôngon ér vea lu mbaperapera, kpa lu sha jighjigh u nan ga, ve lu henen ér ka sha akaa a ve eren la. Ve nôngo gbeev sha “iwen i nan gbeev mbu nôngon”;+
33 er i nger nahan, ér: “Nenge! M ngu veren iwen i nan gbeev mbu nôngon ken Shion+ kua vande u tan nguhar ker, kpa or u nan ne i jighjigh yô, mayange nana va ahenge ga.”+
