Samuel u sha Uhar 22:1-51
22 Tsô Davidi wa Yehova icam ne+ sha iyange i Yehova yima un sha ikyev i mbahyomov nav cii+ man sha ikyev i Saulu la.+
2 A kaa ér:
“Yehova ka vande wam man ijiir yam i taver,+ shi ka Un a yiman mo ye.+
3 Aôndo wam, ka vande wam,+ ka hen a na m yeren ye,Ngu perutya wam+ man korough* agh ku myom* man ijiir yam i yeren i taver*+Man ijiir yam i yevese yemen her+ man oryiman wam;+ ka u yimam sha ikyev i mbaeren ipila.
4 M yila Yehova, un u a kom iwuese la,Nahan a yimam sha ikyev i mbahyomov av.
5 Ku kasem ningir tser, er agôndoamnger nahan;+Agbilinaior tam mciem iyol, er ifi u a sar avenge nahan.+
6 Ikyor i Uwaregh* kasem;+Akaa a hônon a kuugh ta sha a mo.+
7 Shighe u m lu yan ican la, m yila Yehova,+M zer yilan Aôndo wam.
Nahan a ungwa imo yam ken tempel na,Shi ato a na ungwa mliam ma m vaa mer a wasem la.+
8 Maa tar gba tenger shi yoghol, hiden ken ijime, yemen ken hemen;+Amagh a usha kunde+Shi tenger hide ken ijime, yem ken hemen sha ci u i vihi un ishima ker.+
9 Mnyim due un ken ahenga,Shi usu u timin kwagh due ken zwa na;+Akaausu a kpenger kpenger lu sha ishigh nagh.
10 A er usha nerem er lu senen la,+Shi angôghime lu shin angahar a na.+
11 A henda cerubi+ a purugh a va.
I nenge a na sha akper a jijingi.*+
12 Maa a ver ime kase un, er ka ijiir i tsan nahan,+Shin mngerem ma wan ime man abeen a uragh.
13 Aka a yeghen usu due ken iwanger i i lu sha ishigh nagh la.
14 Maa Yehova gba duran sha;+Uhemban Cii er i ungwa ikyenge na.+
15 A ker avaan a na,+ a sambe ve;A tindi inyiar va a anzughul hen atô ve.+
16 I nenge a tareghnyaagh u zegemnger;+Yehova ôr kwagh taver taver shi iôôn due ken ahenga a na sha agee,+Nahan amagh a tar due sha won.
17 A sen sha a va kôrom;A urugh mo a due a mi shin mngerem ma zan.+
18 A yimam sha ikyev i orhyom wam u ageegh,+Man sha ikyev i mba ve kerem ihyom, mba yange ve hembam agee la.
19 Ve hendan kwagh a mo sha iyange i kwagh tserem la,+Kpa Yehova wasem.
20 A due a mo, a nyôr a mo hen ijiir i kwagh a erem ga yô;*+A yimam sha ci u doo un a mo.+
21 Yehova nem injar sha perapera wam;+Ka a kimbim injar sha ave a am, a a lu a ibo ga* la.+
22 Gadia m dondo igbenda i Yehova,Shi m undu Aôndo wam ga,Gadia ka iferkwagh je la.
23 Ajiraôron a na cii+ nga sha ishigh yagh;Me undu atindi a na ga.+
24 Me za hemen u lun a ishô+ sha ishigh nagh,Shi me za hemen u palegh kwaghbo.+
25 Yehova a kimbim injar sha perapera wam,+Man sha ishô i m lu a mi sha ishigh nagh la.+
26 Or u nan eren kwagh sha mimi yô, ka u er kwagh a nan sha mimi;+Orageegh u nan lu a ibo ga yô, u ne nan ibo ga;+
27 Or u nan eren kwagh wang yô, ka u er kwagh a nan wang,+Kpa or u nan eren kwagh sha mimi ga yô, ka u er kwagh a nan sha kwaghfan.+
28 Gadia u yem mba ve hiden a iyol ijime la,+Kpa ashe ou kôr mbagengeseyol ihyom, nahan u hide a ve ijime.+
29 Gadia we Yehova, u ngu imenger yam;+Yehova ka a gema ime i i kasem la i hingir iwanger.+
30 Sha iwasen you yô, me fatyô u tan num sha mbayanishar;Shi sha tahav mbu Aôndo yô, me fatyô u unden kpekpe.+
31 Gbenda u Aôndo u mimi ngu vough;+Kwaghôron u Yehova ngu wang.*+
Ngu perutya hen mba ve yeren hen a na cii.+
32 Gadia dugh Yehova kera yô, Aôndo ugen shi ngu kpa?+
Man dugh Aôndo wase kera yô, vande ugen shi ngu je he?+
33 Aôndo u mimi ka iyou yam i taver,+Shi una er gbenda wam ua lu vough.+
34 A er angahar a am nga er angahar a iyar nahan;A erem m tile sha ajiir a taven.+
35 Ka a tsaase ave a am u nôngon ityav;Ave a am aa fatyô u nerem ada u togula.
36 U nam perutya wou u myom,Shi iyol you i hiden a mi ijime kende a mo sha.+
37 U gbanger a gbenda sha er me ndyar me kar yô;Nahan angahar a am aa dorough ga.+
38 Me zenda mbahyomov av, me za tim ve;Me hide ga zan zan vea kar timin kera.
39 Me tim ve kera shi me njighe ve, sha er vea mough sha ga yô;+Vea gba shin angahar a am.
40 U nam agee a nôngon ityav;+U er mbahyomov av vea gba sha ishigh yagh.+
41 U er mbahyomov av vea yevese mo;*+Me tim mba ve kerem ihyom la kera.+
42 Ve vaa ér i wase ve, kpa or ngu u yiman ve ga;Ve vaa a Yehova je kpaa, kpa a ungwa ve ga.+
43 Me kume ve vea hingir lueneen er vuulevu u hen inya nahan;Me wua ve shi me ndyar ve angahar, er angbiôr a sha igbenda nahan.
44 Ú yimam sha ikyev i vegh vegh u ior av.+
Ú kuram sha er me hingir orhemen u akuraior yô;+Ior mba m fe ve ga yô, vea erem tom.+
45 Ushirmbaiorov vea va ngurum sha ishigh yagh sha mcie;+Kwagh u ve ongo sha kwagh wam la, una na vea ungwa imo yam.*
46 Ishima ia kera taver ushirmbaiorov ga;*Vea due sha ajiir a ve a taver, vea lu gbidyen akarkase iyol.
47 Yehova ngu uma! I wuese vande wam!+
I kende a Aôndo u vande u myom wam sha.+
48 Aôndo u mimi oron iyev sha ci wam;+Ka a na ior sha ikyev yam;+
49 Yiman mo sha ikyev i mbahyomov av.
U kende a mo sha,+ m kar mba ve te num sha a mo la;U yimam sha ikyev i or u wan ipila.+
50 Ka nahan ve, me sugh u hen atô u akuraior ye, Yehova,+Shi me wa atsam a wuese iti you:*+
51 Ka a er akaa a vesen sha u yiman tor na;+Tesen or na u a shigh un mkurem la dooshima hanma shighe,Kua Davidi man ônov nav* gbem sha won.”+
Ngeren mba shin kpe
^ Nenge Ngeren u Pasen Asember.
^ Shin “oryiman wam u ageegh.”
^ Shin “ijiir i taver u nyôron her.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “ahumbe.”
^ Shin “ijiir i gbanger.”
^ Zwa Heberu, “wang.”
^ Shin “i kar un sha usu.”
^ Shin “u nam ijime i mbaihyomov av.”
^ Zwa Heberu, “Ato aa ungwan yô, vea ungwa imo yam.”
^ Shin “ushirmbaiorov vea use kera.”
^ Shin “kuhwa ityogholough.”
^ Zwa Heberu, “vor na.”
