Samuel u sha Uhar 1:1-27
1 Hen shighe u Saulu kpe kera la, Davidi za hemba Mbaamaleki ityav* cin hide, maa Davidi lu hen Shikelagi+ ayange ahar.
2 Sha iyange i sha utar la, orgen mough ken afo a Saulu va; lu a akondo a anden iyol man inya sha ityo. Va nyer hen Davidi yô, a ngurum a wa ityough inya, maa a yav inya.
3 Davidi pine un ér: “Ka han u dugh u ve?” A kaa ér: “Ka ken afo a Iserael m dugh m yevese m ve ye.”
4 Davidi pine un ér: “Ityav za nena? Wea lumun yô ôrom.” A gema a kaa ér: “Ior yevese ityav, shi ve kpishi ve kpe. Saulu man wan na Yonatan je kpa kpe.”+
5 Tsô Davidi pine gumor u va ôr un loho ne la ér: “Er nan u fe wer Saulu man wan na Yonatan kpe?”
6 Gumor la kaa ér: “Yange m za due sha Uwo u Gilboa aburabur,+ maa m nenge a Saulu suur sha iwange na, akekeautya man mbahendananyinya gema lu van ikyua ikyua a na.+
7 Gem ashe nengen a mo yô, a yilam, maa m kaa mer, ‘Mo ne!’
8 Nahan Saulu pinem ér, ‘We u ngu ana?’ M gema m kaa mer, ‘M ngu Oramaleki.’+
9 Tsô a kaa ér, ‘Wea lumun yô, kporom ikyua a mo wuam sha ci u m ngu ken mnyoon tsung, kpa m ngu uma her.’
10 Tsô m kporom ikyua a na m wua un,+ sha ci u m fa mer una fatyô u waren iyol i i vihi un la ga. Maa m bugh idyer i tor i i lu sha ityough nagh la, shi m tsua ihye i i lu un ken uwe la, m ve a mi hen terem heen ye.”
11 Nahan Davidi kôr akondo a na ande, shi ior mba ve lu vea na la cii kpa er nahan.
12 Maa ve gber kwelegh ve vaa shi ve hôr kwaghyan+ zan zan aikighe sha ci u Saulu, man sha ci u wan na Yonatan, man sha ci u ior mba Yehova, kua sha ci u ya u Iserael,+ gadia i wua ve sha sanker.
13 Tsô Davidi pine gumor u va ôr un loho ne la ér: “U ngu or unô?” A gema a kaa ér: “M ngu wan u Oramaleki ugen u a lu shir ken Iserael yô.”
14 Davidi maa pine un ér: “Er nan u cie u kenden uwegh ough, wuan un u Yehova a shigh un mkurem la ga?”+
15 Nahan Davidi yila gumor ugen ken ior mbara kaa ér: “Kar za gber un wua.” Tsô a kar a za gber un, maa a kpe.+
16 Davidi kaa a na ér: “Awambe a ou nga sha ityough you, sha ci u ka zwa wou u woo u ye, gadia u kaa wer, ‘Ka mo iyol yam, m woo un u Yehova a shigh un mkurem la ye.’”+
17 Davidi maa wa icam ne sha u vaan ku u Saulu man wan na Yonatan,+
18 nahan a kaa ér i tese ior i Yuda icam i vaan ku, i i yer ér “Ada” la; i nger i ken takeda u Yashar, ér:+
19 “We Iserael, i wua mbadoonashe i haa inya sha ajiir a ou a taven.+
Nenge imba er mbaageev ve kpe ken utya la sha wono!
20 De ôron kwagh ne ken Gati ga;+De yôôn kwagh ne sha igbenda i Ashekelon ga,Gayô ônkasev mba Mbafiliti vea ember,Gayô ônkasev mba ior mbaipyusuv* mbara vea tsue amar.
21 Ne iwo i Gilboa,+Avure a de kera gbe shin ura u de kera nee sha a ven ga,Shi ishule kpa, i de kera ne iyiav mbi eren uicighan mba uiyua a mi ga,+Sha ci u ka sha iwo la, yange i hôngor a perutya u ior mba ageev ye,I kera shighe perutya u Saulu mkurem ga.
22 Ada u Yonatan hide ijime u wuan ior, haan awambe inya ga,+Man u tôndon ahôm a ior mba ageev kpaa ga,Shi sanker u Saulu hiden gbilin ga.+
23 Yange Saulu man Yonatan+ doo ior ishima shi ve gba ior kwagh tsung shighe u ve lu uma la,Shi ken ku je kpa, ve pav ga.+
Yange ve er kwagh fele fele i hemba uigyuve,+Shi ve lu a agee hemba ubegha.+
24 Ne ônkasev mba Iserael, vaa nen Saulu,Yange zer ne akondo a nyian bong man a doon tsung,Shi yange wa ne akaa a hweegh a sha zanaria sha akondo.
25 Nenge imba er mbaageev ve kpe ken utya la sha wono!
I wua Yonatan i kende sha ajiir a ou a taven!+
26 M zungwe ku wou kpishi, anngôm Yonatan;Yange u doom ishima je gande.+
Dooshima u yange u tesem la, hembam dooshima u kasev ve tesem la ica je.+
27 Nenge imba er mbaageev ve kpe ken utya la sha wono!
Shi ikyav mbi utyaav kera mbi ga!”
