Samuel u sha Uhar 11:1-27
11 Sha mhii u inyom,* sha shighe u ator zaan ityav la, Davidi tindi Yoabi man mbatomov nav kua ikyumutya i Iserael cii ér ve za tim Mbaamon; maa ve za kase Raba+ ve wa un atô. Hen shighe ne, Davidi lu ken Yerusalem.+
2 Iyange igen aikighe yô, Davidi mough sha gambe na, lu zenden sha tembeyoughough u sha, u iyou i tor. Er lu sha tembeyoughough u sha la, a nenge a kwase lu ôôn iyol. Kwase ne doo ashe kpen kpen.
3 Nahan Davidi tindi or ér nana za pine kwagh u kwase la, maa nan hide nan va kaa ér: “Kwase la ka Batesheba+ wan u Eliam,+ kwase u Uria+ Orhiti.”+
4 Tsô Davidi tindi mbaôron-loho ér ve za va a na.+ Kwase la ve hen a na yô, a yav a na.+ (Kwagh ne er shighe u kwase ne lu wanger iyol na sha mlu na u wang ga la.*)+ Kwase ne maa hide yem hen ya na.
5 Kwase ne wa iyav, maa a tindi a loho hen Davidi, a kaa ér: “M ngu iyav.”
6 Tsô Davidi tindi a loho hen Yoabi kaa ér: “Kaa Uria Orhiti la a va hen a mo.” Yoabi maa ôr Uria za hen Davidi.
7 Uria ve hen Davidi yô, Davidi pine un er Yoabi a lu yô, man er mbautyaav ve lu la, kua er ityav mbi lu zan yô.
8 Tsô Davidi kaa a Uria ér: “Yem hen ya wou za mem.”* Uria dugh hen ya u tor kera yô, i tindi un a iyua i tor,* lu van ken ijime.
9 Nahan kpa, Uria yav hen hunda u hen ya u tor la vea mbatomov mba orvesen na mbagen mbara cii; a yem hen ya na ga.
10 Tsô i kaa a Davidi ér: “Uria yem hen ya na ga.” Davidi maa pine Uria ér: “U sember hiden zende gaa? Er nan u yem hen ya wou ga?”
11 Uria gema kaa a Davidi ér: “Areki+ man ior i Iserael man Yuda mba ken utenti, shi orvesen wam Yoabi man mbatomov mba orvesen wam haa afo mba ken toho. Nahan doo u me yem hen ya wam, me za ya kwagh shi me ma kwagh shi me tsa a kwase wama?+ M bum ken iti you, er u lu uma ne, mayange me er imbakwagh la ga!”
12 Tsô Davidi kaa a Uria ér: “Nyian kpa tsa heen, nahan kper me na u ian u yem.” Maa Uria tsa ken Yerusalem iyange la man kpernan.
13 Nahan Davidi tindi i za kaa un a va, a va ya kwagh shi a ma kwagh vea na; Davidi na un msôrom a ma a hunde. Kpa ka va lun aikighe yô, a yem a za yav sha gambe na vea mbatomov mba orvesen na; a yem hen ya na ga.
14 Kpernan pepe yô, Davidi nger washika hen Yoabi, na Uria ér a za na un.
15 Davidi nger ken washika la ér: “Ver Uria sha hemen, ape ityav mbi hembe taver cii la. Maa undu un hide ken ijime, sha er a wua un yô.”+
16 Yoabi lu vanden gban gar la mker, nahan a fa ape anomaior a Mbaamon lu la, nahan a za ver Uria her.
17 Nomso mba ken gar la mba dugh mba va te ityav sha Yoabi yô, mbatomov mba Davidi mbagen kpe. Uria, Orhiti la kpa lu môm ken mba ve kpe la.+
18 Nahan Yoabi ôr Davidi hanma kwagh u za hemen ken utya cii.
19 Yoabi gema kaa a or u ôron-loho la ér: “U za ôron tor kwagh u a ze hemen ken utya la cii u been yô,
20 alaghga tor una vihi ishima una kaa a we ér, ‘Er nan ne ze ikyua ikyua a gar la u za nôngon ityava? Ne fa er vea tile sha kpekpe, vea lu keren ne avaan gaa?
21 Ka an yange nan wua Abimeleki+ wan u Yerubesheti?+ Yange lu kwase nan tile sha kpekpe, nan kende anishwa va jahar un sha ityo, hembe un igbôndotyo, kpe hen Tebeshi gaa? Er nan ne ze ikyua ikyua a kpekpe laa?’ Maa kaa wer, ‘Ortom wou Uria, Orhiti la kpa kpe.’”
22 Tsô orôron-loho la yem za ôr Davidi hanma kwagh u Yoabi tindi un ér a za ôr la cii.
23 Orôron-loho la za kaa a Davidi ér: “Ior vev hemba se agee, nahan ve due ve va ta ityav sha a vese ken toho; kpa se zenda ve, ve hide ve yem ape nyôron sha hundagar la.
24 Mbakerenavaan ashen ve til sha kpekpe, ve lu keren mbatomov ou avaan, nahan mbatomov mba tor mbagen kpe; ortom wou Uria, Orhiti la kpa kpe.”+
25 Davidi maa kaa a orôron-loho la ér: “Za kaa Yoabi wer: ‘Kwagh ne a de ze u iyol ga, sha ci u sanker veren a ver or u una wua ga. Nôngo ityav a gar la kpoghuloo hemba un.’+ Shi taver Yoabi ishima.”
26 Kwase u Uria ongo ér nom na Uria kpe yô, a gba zungwen ku u nom na.
27 Shighe u zungwen la been a bee nahan maa, Davidi tindi i za va a na hen ya na, hingir kwase na,+ shi a mar un wan u nomso. Kpa kwagh u Davidi er ne vihi* Yehova tsung.+
