Samuel u sha Uhar 17:1-29
17 Tsô Ahitofel kaa a Abesalom ér: “Wea lumun yô, de m tsua ior 12,000, m mough m zenda Davidi ijime tugh mbun.
2 Me za ta num sha a na shighe u a vôr kpishi, a kera lu a agee ga yô,*+ me ta un mciem iyol, nahan ior mba ve lu vea na cii vea yevese, maa me wua tor tseegh.+
3 Nahan me hide a ior cii hen a we. Ka kwagh u u er a or u u lu keren la, una na ior cii vea hide ye. Tsô ior cii vea lu ken bem.”
4 Kwagh u Ahitofel ôr ne doo Abesalom man mbatamen mba Iserael cii.
5 Nahan kpa, Abesalom kaa ér: “Wea lumun yô, yila Hushai+ Orakiti la kpaa, se ungwa kwagh u una ôr la.”
6 Tsô Hushai va hen Abesalom. Maa Abesalom kaa a na ér: “Ka kwaghwan u Ahitofel je ne. Nahan se dondo kwaghwan na nee? Aluer ka nahan ga yô, ôr se kwagh u se er yô.”
7 Hushai gema kaa a Abesalom ér: “Kwaghwan u Ahitofel la doo hen shighe ne ga!”+
8 Hushai shi kaa ér: “U fa tsembelee er teru man ior nav ve lu ior mba ageev yô,+ shi asema vihi ve ker tsung, er biya* u ônov ve saa un ken toho nahan.+ Heela tseegh ga, teru ka orutya,+ nahan una tsa vea ior imôngo ga.
9 Hegen ne, a yer ken ma bar* shin hen ma ijiir igen;+ nahan aluer a hemen tan num sha a ve yô, mba vea ungwa kwagh ne vea kaa ér: ‘I hemba ior mba ve lu dondon Abesalom ijime la ityav!’
10 Or u taver ishima, u ishima i nan i lu er begha nahan+ je kpa, a cier nan iyol kpee je, sha ci u Iserael cii fa ér teru ka orageegh,+ shi ior mba ve lu vea na la kpa ka ior mba taver asema.
11 Ka kwaghwan wam je ne: Mbaiserael mba ve lu hen Dan zan zan nyôr Bersheba la cii, ve kohol hen a we,+ i ngee er waarawa u hen kpezegemnger nahan,+ maa hemen ve za nôngo ityav.
12 Se za ta ityav sha a na ape se zua a na cii; se za ta ityav sha a na, er avure ka a gba hen inya nahan, nahan or ve môm nana war ga, un shin ma nomsoor u nan lu vea na kpaa ga.
13 Aluer a yevese a nyôr ken ma gar yô, Iserael cii una tôô ikyor una za a mi hen gar shon, nahan se urugh ukpekpe mba gar la, se za haa shin pev, zan zan iwen i cuku tsô kpa ia kera shi ga.”
14 Tsô Abesalom man ior i Iserael cii kaa ér: “Kwaghwan u Hushai Orakiti la, hemba doon+ a kwaghwan u Ahitofel la!” Gadia Yehova kange ishima u vihin* kwaghwan u Ahitofel+ hen sha mi tsembelee due a mi la, sha er Yehova una va a kwaghtseren sha Abesalom yô.+
15 Tsô Hushai za kaa a pristi Sadoki man pristi Abiatar ér:+ “Ka kwagh u Ahitofel a we Abesalom man mbatamen mba Iserael je ne, man gema ka kwaghwan wam je ne.
16 Nahan tindi loho hen Davidi fese, ta un icin wer: ‘De lun hen ahongo a* ken desereti la tugh mbun ga, kpa per yande la kpee je, ga yô, a tim* tor man ior mba ve lu vea na la cii kera.’”+
17 Yonatan+ man Ahimaashi+ ve lu hen En-rogel;+ nahan wanye kwase ugen za ôr ve, maa ve yem ve za ôr Tor Davidi, kpa ve cihi ve nyôr ken gar ér or a nenge a ve ga.
18 Nahan kpa, gumor ugen nenge a ve za ôr Abesalom. Nahan ve uhar cii ve yem fese hen ya u orgen ken Bahurim;+ or ne lu a ijôr hen tembe ya na. Maa ve nyôr shimi,
19 nahan kwase u or la tôô kwagh cir sha zwa u ijôr shon, gema samber samuyia u i dorough u yô sha mi; or môm fa kwagh sha kwagh ne ga.
20 Nahan mbatomov mba Abesalom va hen ya u kwase la, va pine ér: “Ka han Ahimaashi man Yonatan ve lu?” Kwase la gema kaa ér: “Ve kaa vegher u mngerem ma lu la ve yem kwagh ve.”+ Nahan ior mbara za ker ve, kpa ve zua a ve ga, maa ve hide ve yem ken Yerusalem.
21 Ior mbara mba yemen yô, ve due shin ijôr la ve za ôr Tor Davidi. Ve kaa a na ér: “Mough per mngerem mara fese, sha ci u ka kwagh u Ahitofel a kaa ér i er a we je ne.”+
22 Fese je, Davidi man ior mba ve lu vea na la cii, mough per Yordan. Sha shighe u sev va av la nahan, ve per Yordan cica, or kera shi ga.
23 Ahitofel nengen ér i er kwagh sha kwaghwan na la ga yô, a kange shidi* sha jaki, a henda a yem hen ya na, hen gar na.+ Ôron mba hen ya na akaa a vea er been cii yô,+ a za sende iyol na+ a kpe, nahan i za ii un ken uwar u uter nav.
24 Hen shighe ne, Davidi yem hen Mahanaim,+ Abesalom gema per Yordan vea ior i Iserael cii.
25 Abesalom ver Amasa+ ér a nengen sha ikyumutya sha ityough ki Yoabi;+ Amasa lu wan u Itera, Oriserael ugen u yange yav a Abigail+ wan u Nahashi anmgbian u Seruya u kwase, ngô u Yoabi la.
26 Iserael man Abesalom haa afo hen tar u Gileadi.+
27 Davidi va nyer hen Mahanaim nahan maa, Shobi wan u Nahashi or u ken Raba+ u Mbaamon, man Makir+ wan u Amiel or u ken Lodebar, man Barshilai,+ Orgileadi u ken Rogelim la,
28 va a ugambe man ugbangi man mtem ma nyaagh man alakema man barli man mwem man samuyia u mgbaghen man alev a vesen man alev a kiriki, man kwaghyan u mgbaghen ugen,
29 man iyough man bôta* man iyôngo kua ciisi.* Ve va a akaa ne cii sha ci u Davidi man ior mba ve lu vea na la ve ya yô,+ gadia ve kaa ér: “Ijen kôr ior mbara ve vôr, shi mba imura ken taaikyôngo.”+
Ngeren mba shin kpe
^ Shin “ave a kpe un yô.”
^ Ka i yila inyamkume ne ken zwa Buter ér bear.
^ Shin “shin ahungwa; shin upev.”
^ Shin “kaa ér una vihi.”
^ Zwa Heberu, “a mena.”
^ Shin a fatyô u kaan ér, “desereti u lun gburumaa u.”
^ Ka kwagh u pendan zendenya sha igyundu teman sha mi.
^ Ka i yila ishember ne ken zwa Buter ér butter. Ka i zua a bôta ken atumba.
^ Zwa Heberu, “atumba a bua.”
