Samuel u sha Uhar 18:1-33
18 Tsô Davidi ôr ingyegh i ior mba ve lu vea na la, maa ver ve mbahemen ior dubu dubu man mbahemen ior deri deri.+
2 Davidi pav ior mbara ker ikwe itiar, a tindi ve; a wa kwe u hiihii la sha ikyev i Yoabi;+ a wa kwe u sha uhar la sha ikyev i anmgbian u Yoabi, Abishai,+ wan u Seruya;+ a wa kwe u sha utar la sha ikyev i Itai+ Orgiti. Tor maa kaa a ior mbara ér: “Mo kpa me due me za vea ven.”
3 Kpa ve gema ve kaa ér: “De duen zaan ga,+ sha ci u aluer se za yevese kpa, kwagh a gba ve* sha kwagh wase ga; aluer vegher wase môm jimin kpe je kpa, kwagh a gba ve sha kwagh wase ga, sha ci u u gba kwagh er se iorov 10,000 nahan.+ Sha nahan yô, aluer u ngu ken gar, u gema u ngu tindin ior wer ve va wase se yô, a hemba doon.”
4 Tsô tor kaa a ve ér: “Me er kwagh u ne nenge ner a hemba doon la cii.” Nahan tor tile hen kpe hundagar, maa ior mbara cii due gba yemen, lu ior deri deri man dubu dubu.
5 Tor na Yoabi man Abishai kua Itai wada ér: “Er nen kwagh a Abesalom gumor la kundu kundu sha ci wam.”+ Ior mbara cii ungwa wada u tor na mbahemenev mbara cii, sha kwagh u Abesalom la.
6 Nahan ior mbara due yem ken toho u za nôngon ityav vea Iserael, ve nôngo ityav mbira ken ikyô i Eferaim.+
7 Mbatomov mba Davidi+ hemba ior i Iserael+ ityav her, i wua ior sha iyange la falegh gba—lu iorov 20,000.
8 Ityav mbira samber hen haregh la cii. Heela tseegh ga, ior mba ve kpe ken ikyô la, hemba ngeen a ior mba i wua ve sha sanker sha iyange la yô.
9 Tsô Abesalom va due sha mbatomov mba Davidi. Abesalom lu hendan alfadari,* maa alfadari* la za nyôr ken adagher a zegekon ugen, nahan ityough nagh hange sha zegekon la, a zungur her,* kpa alfadari* u henda la yô, lu yemen kwagh na her.
10 Orgen nenge kwagh ne za ôr Yoabi ér:+ “Nenge! M nenge a Abesalom hange sha zegekon ugen.”
11 Yoabi gema kaa a or u ôr un kwagh ne la ér: “U nenge a na, man er nan u woo un u kende inya her ga? Wea er nahan yô, ma m ne u agbenger a azurufa pue man kwange saan saan.”
12 Kpa or la kaa a Yoabi ér: “Luun er a nem agbenger a azurufa 1,000 je kpa, ma m bula wan u tor ga, sha ci u se ongo tor a te u icin, we man Abishai kua Itai ér, ‘Wea lu nyi or kpa, kura Abesalom gumor la.’+
13 Luun er mea hembe ato mea woo un yô,* mayange kwagh ne ma a lu myer hen tor ga, shi we kpa, ma u yemem ga.”
14 Yoabi maa kaa ér: “U vihim shighe kuma nahan!” Tsô a tôô ukusa* utar a za kuma Abesalom kar kôr ishima, er lu uma her, sha zegekon u hange sha mi la.
15 Maa mbayev pue mba ve tôôn Yoabi ikyav mbi utyaav la, va mase tan num sha Abesalom wuan un.+
16 Nahan Yoabi tôngo korough, maa ior mbara de u zendan Iserael ijime cin hide; Yoabi kaa a ve ér kuma nahan.
17 Tsô ve tôô Abesalom ve kende shin zegeihyungwa ken ikyô la, ve kura awen ve ta tihi zegenan sha a na.+ Maa Mbaiserael cii yevese yem sha uya vev.
18 Shighe u Abesalom lu uma la, tôô ityôgh za tim hen Pev* u Tor+ sha ci na, gadia a kaa ér: “M ngu a wan u nomso u a yilan nan sha iti yam ga.”+ Nahan a yila ityôgh kira sha iti na; mba yer ki ér Ityôgh ki Abesalom zan zan nyian.
19 Ahimaashi+ wan u Sadoki, kaa ér: “Wea lumun yô, de m yevese m za ôr tor loho ne, gadia Yehova na un ishô, a yima un sha ikyev i mbahyomov nav.”+
20 Kpa Yoabi kaa a na ér: “Ka we u za ôr loho nyian ga, iyange igen tsô u za ôr un loho. Kpa nyian yô, ka we u za a loho ga, sha ci u wan u tor iyol na kpe.”+
21 Maa Yoabi ôr a Orkushi ugen ér:+ “Za, za ôr tor kwagh u u nenge ne.” Nahan Orkushi la ngurum sha ishigh ki Yoabi maa yevese yem.
22 Ahimaashi, wan u Sadoki, shi kaa a Yoabi ér: “Aluer ka nyi kwagh i er je kpa, wea lumun yô, de m yevese m dondo Orkushi la ijime.” Nahan kpa Yoabi kaa ér: “Wan wam, er loho u lu u u za ôr ga nahan kpa, u yevese u za wer nyi?”
23 Ahimaashi shi kaa ér: “Aluer ka nyi kwagh i er je kpa, de m yevese m za.” Nahan Yoabi kaa a na ér: “Yevese za ase!” Tsô Ahimaashi yevese yem sha gbenda u zan hen haregh u Yordan la, a za kar Orkushi la sha gbenda.
24 Hen shighe ne, Davidi tema hen atô u hundagar u ken atô man u ken won la,+ maa orkuran+ unde sha tor u hundagar u u zua vea kpekpe la. Te ashe yô, a nenge or nan lu yevese van tswen.
25 Orkuran la maa ôr tor kwagh ne genger genger. Tor kaa ér: “Aluer nan ngu tswen yô, nan ngu a loho u va ôron.” Or la nan ve zan zan nan va zurum ikyua yô,
26 orkuran la shi nenge a orgen nan lu yevese van. Orkuran la maa yila orkuran hundagar la kaa ér: “Nenge! Orgen kpa nan ngu yevese van tswen!” Tor maa kaa ér: “Or ngula kpa ngu van a loho.”
27 Orkuran la kaa ér: “M nenge or u hiihii la nan ngu yevese er ka Ahimaashi+ wan u Sadoki nahan,” maa tor kaa ér: “Ngu or u dedoo, shi ve a loho u dedoo.”
28 Nahan Ahimaashi ôr a tor genger genger ér: “Zayol ngu ga!” Maa a ngurum sha ishigh ki tor, a wa ityough inya, a kaa ér: “I wuese Yehova Aôndo wou, un u a ne nomso mba ve hembe* terem tor ato sha ikyev na la!”+
29 Nahan kpa, tor pine ér: “Kwagh môm er Abesalom gumor la ga ga̱?” Ahimaashi gema kaa ér: “Ashen m nenge ayôôso a lu eren kpishi, shighe u Yoabi a tindi ortom u tor man ortom wou la, kpa m fe kwagh shon ga.”+
30 Nahan tor kaa ér: “Kar tile heen.” Maa a kar a tile her.
31 Tsô Orkushi la va nyôr.+ Orkushi la kaa ér: “Terem tor, ma u ongo loho ne: Yehova na u ishô nyian, a yima u sha ikyev i mba ve hembe u ato la cii.”+
32 Kpa tor pine Orkushi la ér: “Kwagh môm er Abesalom gumor la ga ga̱?” Orkushi la gema kaa ér: “Mbahyomov mba terem tor cii, man mba ve hembe u ato ér vea bula u la cii, ve hingir er gumor la nahan!”+
33 Kwagh ne za tor iyol, nahan a unde sha kpoyou u sha, u sha hundagar la, a gba vaan zenden kaan ér: “Aye! Abesalom wan wam, wan wam, aye wan wam Abesalom. Guda ma i lu mo ma m kpe ye, wan wam, aye Abesalom wan wam!”+
Ngeren mba shin kpe
^ Zwa Heberu, “vea penda ishima.”
^ Alfadari ka wan u jaki i unde nyinya a mar yô.
^ Alfadari ka wan u jaki i unde nyinya a mar yô.
^ Zwa Heberu, “hen atô u sha man tar.”
^ Alfadari ka wan u jaki i unde nyinya a mar yô.
^ Shin “luun er m er a na sha mimi ga yô.”
^ Shin a fatyô u kaan ér, “udagi; awange.” Zwa Heberu, “myôm.”
^ Shin “Pev u Lun Gburumaa.”
^ Zwa Heberu, “kende uwegh vev sha.”
