Samuel u sha Uhar 12:1-31
12 Tsô Yehova tindi Natan+ hen Davidi. Natan za hen a na+ za kaa ér: “Yange nomso uhar lu ken gar ugen, u môm lu orinyar, ugen lu icanor.
2 Orinyar la lu a iyôngo man ibua kpishi;+
3 kpa icanor la yô, lu a kwagh môm ga, lu di ngôiyôngo u kiriki u yange yam la tseegh.+ A nenge sha ngôiyôngo ne; a vese vea na man ônov nav mba nomso imôngo. Yaan kwaghyan u cuku u icanor ne lu a mi la, shi maan shin kôôpu môm vea na, shi yaven un shin ikyum. A hingir un er wan u kwase nahan.
4 Shighe kar yô, orgen va orinyar ne inya, kpa a kôr iyôngo na shin bua na a yôr orvannya u va hen a na la iwer ga. A gema a kôr ngôiyôngo u icanor la, a za yôr orvannya na la iwer a mi.”+
5 Nahan ishima vihi Davidi a or la tsung, maa a kaa a Natan ér: “Mimi je, er Yehova a lu u uma ne,+ or u nan er kwagh ne la nan kuma ku!
6 Shi nana kimbi iyôngo la kwa nyiin,+ sha ci u nan er kwagh ne, nan zungu mhôônom ga yô.”
7 Natan gema kaa a Davidi ér: “Ka we u lu or shon ye! Ka kwagh u Yehova Aôndo u Iserael a kaa je ne, ér: ‘Ka mo iyol yam yange m shighe u mkurem mer tema tor sha Iserael ye,+ shi m yima u sha ikyev i Saulu.+
8 Shi m kegh iyol u nan we ya u orvesen wou+ man kasev mba orvesen wou,+ shi m na u ya u Iserael man ya u Yuda.+ Kpa m de heela ga, m kegh iyol u eren we akaa hemban nahan je kpaa.+
9 Er nan u tese icivir sha kwaghôron u Yehova ga, u za er kwaghbo sha ishigh nagha? U wua Uria, Orhiti la sha sanker!+ U wuan un sha sanker u Mbaamon+ cii yô, u za tôô kwase na, hingir kwase wou.+
10 Hegen yô, mayange sanker una kar hen ya wou kera ga,+ sha ci u u nem icivir ga, u za tee kwase u Uria, Orhiti la a hingir kwase wou yô.’
11 Ka kwagh u Yehova a kaa je ne, ér: ‘Nenge, ka ken ya wou je, me na ican ia due a er u ye;+ shi me tôô kasev ou, me gema me na orgen*+ sha ashe a ou, nana yav a kasev ou ken igbar je.*+
12 Er u er kwagh ne ken myer+ nahan kpa, mo me gema me er kwagh ne sha ashe a Iserael cii man ken igbar.’”*
13 Davidi maa kaa a Natan ér: “M er Yehova isholibo.”+ Natan gema kaa a Davidi ér: “Yehova de u isholibo you.+ U kpe ga.+
14 Nahan kpa, er u ne Yehova icivir sha kwagh ne cuku tsô kpaa ga yô, wan u nomso u i sember maren we ne, una kpe kpee a bunde ga.”
15 Tsô Natan hide yem hen ya na.
Nahan Yehova na wan u kwase u Uria mar Davidi la gba angev.
16 Davidi maa zamber a Aôndo u mimi la sha kwagh u wan u nomso la. Davidi a hôr kwaghyan shi a nyôr a za yav hen inya zan zan sev mbu kar aven.+
17 Nahan mbatamen mba hen ya na ve va tile ape a lu la, ve nôngo ér vea kôr un a mough hen inya sha, kpa a venda shi a lumun u yan kwaghyan vea ve ga.
18 Sha iyange i sha utaankaruhar yô, wan la kpe, kpa mbatomov mba Davidi lu cian u za ôron un ér wan la kpe. Ve kaa ér: “Shighe u wan ne lu uma la se lam a na, kpa venda u keghen ato a vese. Nahan a er nan ve se za ôr un ser wan la kpe? Alaghga una er kwagh u kpilighyol.”
19 Davidi nengen mbatomov nav mba ngur lamen ivarvase ayol a ve yô, a kav ér wan la kpe. Davidi maa pine mbatomov nav ér: “Wan la kpee?” Ve gema ve kaa ér: “Een, a kpe.”
20 Tsô Davidi kighir mough hen inya sha; a ôô iyol, a shighe mkurem,+ shi a hua akondo agen, maa a kar a yem hen iyou+ i Yehova a za gure inya. Been yô, a yem hen ya* na, a za kaa ér i va un a kwaghyan, mba ve un a kwaghyan yô, a ya.
21 Mbatomov nav pine un ér: “Er nan u er kwagh nahana? Shighe u wan la lu uma la, u hôr kwaghyan shi u lu vaan; kpa wan la kpen a kpe nahan maa, u mough sha u ya kwaghyan.”
22 A gema a kaa ér: “Shighe u wan la lu uma la, m hôr kwaghyan+ shi m lu vaan, sha ci u m lu kaan ken ishima yam mer, ‘Or fe ga, alaghga Yehova una zungwem mhôônom, una de wan ne una lu uma.’+
23 Hegen u a kpe ne, shi me hôr kwaghyan mer nyi? Me fatyô u hiden a naa?+ Ka mo me za hen a na ye,+ kpa un yô, una hide hen a mo ga.”+
24 Nahan Davidi sur kwase na Batesheba+ ishima. Maa a nyôr a za tsa a na. Shighe kar yô, a mar wan u nomso, i ii un iti ér Solomon.*+ Wan ne doo Yehova ishima,+
25 nahan a kaa a profeti Natan+ ér, a za ii wan la iti ér Yedidia,* sha ci u Yehova.
26 Yoabi za hemen u nôngon ityav a Raba+ u Mbaamon,+ nahan a ngohol gar u tor la.*+
27 Tsô Yoabi tindi mbaôron-loho hen Davidi kaa ér: “M nôngo ityav a Raba,+ m ngohol gar u mnger la.*
28 Nahan kohol mbautyaav mba ve mase shin la cii za haa afo, ta ityav sha gar la ngohol un. Ga yô, mo me za ngohol gar shon, nahan a kaa ér ka mo m ngohol un ye.”*
29 Tsô Davidi kohol mbautyaav mbara cii, za hen Raba za nôngo ityav a na ngohol un.
30 Maa a bugh Malkam idyer sha ityo kera. Idyer la yuhwa kuma talenti* u zanaria môm; i er idyer ne lu a awen a injaa sha mi, maa i gema i i cir Davidi sha ityo. Davidi shi ya ishar kpishi+ ken gar la.+
31 Shi a due a ior mba ker mbara, a za na ve tom u tôndon awen, man u eren tom a ikyav mbi tomov mbi esen man azembe a iyôôgh, man tom u tan akam. Lu kwagh u er a agar a Mbaamon cii je la. Ken masejime yô, Davidi man mbautyaav cii hide ken Yerusalem.
Ngeren mba shin kpe
^ Shin “orwanndor a we.”
^ Zwa Heberu, “sha ashe a iyange ne.”
^ Zwa Heberu, “sha ishigh ki iyange.”
^ Shin “ya u tor.”
^ I zua a iti ne ken ishember igen ken zwa Heberu. Inja i i ér “Bem.”
^ Inja na yô ér, “Un u A Doo Yehova Ishima Tsung la.”
^ Shin “gar u tartor la.”
^ Afatyô u kaan ér mba ôron ka kwagh u amboramnger a gar la.
^ Zwa Heberu, “nahan a yila un sha iti yam.”
^ Talenti môm yange a lu ukilogeram 34.2. Nenge Ngeren u Seer u B14 la.
