Samuel u sha Uhar 20:1-26
20 Hen shighe ne, orkerenayongo ugen lu, i yilan un ér Sheba,+ wan u Bikeri, Orbenyamin. A tôngo korough+ a kaa ér: “Se mba a kwar ken Davidi ga, shi se mba a dyako ken wan u Yese kpaa ga.+ Ne Mbaiserael, hanma or nana yem hen aôndo* u nan!”+
2 Maa ior i Iserael cii de u dondon Davidi ijime, gba dondon Sheba wan u Bikeri;+ kpa ior i Yuda yô, var a tor ve, hii hen Yordan zan zan nyôr Yerusalem.+
3 Davidi hidi hen ya na* ken Yerusalem yô,+ tor tôô kasev nav mba sha uikya pue mba yange undu ér ve nengen sha ya la,+ za ver ken iyou igen, ver ior ér ve kuran ve. Davidi naan ve kwaghyan, kpa gema tsaan a ve ga.+ Ve lu ken iyou la zan zan ku ve; ve lu er kasevmbacôgholov nahan, shin er nom ve lu uma nahan kpaa.
4 Tor maa kaa a Amasa ér:+ “Yila ior i Yuda ve va kohol hen a mo ken atô u ayange atar, shi we kpa lu her.”
5 Tsô Amasa za u za yilan Yuda cii ér a va kohol imôngo, kpa shighe u i ver un la kar cii ve mase van ye.
6 Nahan Davidi kaa a Abishai+ ér: “Sheba+ wan u Bikeri una bula se a hemba er Abesalom yange bula se la.+ Mough vea mbatomov av zenda un ijime, sha er una zua a agar a i we a ugir mba taver, una yevese se una war ga yô.”
7 Tsô ior i Yoabi+ man Mbakereti man Mbapeleti,+ kua ior mba ageev cii due gba zendan un ijime; ve due ken Yerusalem ve lu zendan Sheba wan u Bikeri ijime.
8 Mba za zurum ikyua a zegeiwen ugen ken Gibeon yô,+ Amasa+ due u za keghen ve gbenda. Hen shighe ne, Yoabi hua riga na u utya, a gema a kange sanker u lu ken var la hen ikyooso. Kporom ikyua a Amasa yô, a er sanker la due gba inya.
9 Yoabi pine Amasa ér: “Anngôm u ngu dedoo ga?” Tsô Yoabi za uwegh nagh ku iyanegh kôr Amasa sha indyer er a soo u susen un zwa nahan.
10 Amasa ver ishima sha sanker u Yoabi lu a mi ken uwe la ga, nahan Yoabi kuma un sanker la sha gbor,+ maa myam nam due haa hen inya. Lu u una kuma un sanker shon kwa har ga; kwa môm la tseegh kpa kuma u wuan un. Maa Yoabi man anmgbian na Abishai kar gba zendan Sheba wan u Bikeri.
11 Tsô gumor ugen ken agumaior a Yoabi la tile ikyua a Amasa lu kaan ér: “Mba ve lu ken vegher u Yoabi man mba ve te ikyaa a Davidi cii ve dondo Yoabi ijime!”
12 Hen shighe ne cii, Amasa lu viligh shin awambe a na hen atôatô-gbenda. Or la nengen ér ior cii mba tilen yô, a kpela Amasa sha gbenda kera a za kende ken toho. Maa a cir un ikyondo iyol, sha ci u a nenge yô hanma or nana va nenge a Amasa cii nan tile.
13 Or la kpelan un sha gbenda kera cii yô, ior mbara cii dondo Yoabi ijime u zendan Sheba+ wan u Bikeri.
14 Sheba kar hen uipyaven mba Iserael cii yem ken Abel u Bete-maaka.+ Mbabikeri kpa kohol imôngo nyôr ken gar u za keren un.
15 Tsô Yoabi man ior nav* za kase Sheba wa un atô ken gar u Abel u Bete-maaka, maa ve ta tihi u inyaagh hen kpekpe u ken won u gar la, tav gumeen u nôngon ityav a na. Nahan ior mba ve lu vea Yoabi la cii gba timen kpekpe u gar la, sha er vea yôhôr un a haa inya yô.
16 Nahan kwase u fan kwagh ugen ken gar la yila genger genger kaa ér: “Kegh nen ato, ne ior mban, kegh nen ato! Nea lumun yô ôr nen Yoabi ner, ‘Va heen, m soo u lamen a we.’”
17 Yoabi ze ikyua a kwase la yô, kwase la pine ér: “Ka we u lu Yoabi yee?” Yoabi gema kaa ér: “Een, ka mo.” Maa kwase la kaa a na ér: “Kegh ato a mkaanem ma wanyekwase wou.” A gema a kaa ér: “M kegh ato.”
18 Kwase la za hemen kaa ér: “Ngise la ior kaan ér, aluer ior soo u sôron ma zayol yô, ‘Ve za ker kwaghwan hen gar u Abel,’ nahan a sôr zayol ve la kpee a bunde ga.
19 M tile sha ityough ki Mbaiserael mba keren bem shi eren kwagh sha mimi. U soo u timin gar u a lu er ngô nahan ken Iserael yô. Er nan u soo u been a* dyako u Yehova kera?”+
20 Yoabi gema kaa ér: “Mayange me bee a na kera shin me tim un ga.
21 Ka nahan ga cii. Kpa or u i yer ér Sheba+ wan u Bikeri, or u hen haregh u iwoogh u Eferaim+ la hemba* Tor Davidi ato. Aluer ne nam or ne yô, me kar hen gar ne kera.” Maa kwase la kaa a Yoabi ér: “Nenge! A ker u ityough nagh sha kpekpe a gba ken won!”
22 Fese je, kwase u fan kwagh la hide yem hen ior mbara cii, maa ve za gber Sheba wan u Bikeri ityough ve kende Yoabi. Yoabi maa tôngo korough, nahan ve sambe hen gar la, hanma or hide yem hen ya u nan;+ Yoabi kpa hide yem hen tor ken Yerusalem.
23 Hen shighe ne, Yoabi lu hemen ikyumutya i Iserael cii;+ Benaia+ wan u Yehoyada,+ gema lu hemen Mbakereti man Mbapeleti.+
24 Adoram+ di lu hemen mba i kighir ve ve lu eren tom u kpan la; Yehoshafati+ wan u Ahiludi gema lu orngeren.
25 Sheva lu akawe; Sadoki+ man Abiatar+ gema lu upristi.
26 Ira, Oryair la kpa hingir ortom* u Davidi u vesen.
