Samuel u sha Uhar 5:1-25
5 Shighe kar yô, uipyaven mba Iserael cii va hen Davidi ken Heberon+ va kaa ér: “Nenge! Se mba kuhe wou man inyam you.*+
2 Sha ayange a ken ijime a Saulu lu tor wase la, lu we u hemen ityav mbi Iserael ye.*+ Nahan Yehova kaa a we ér: ‘U kuran ior av Iserael, shi u hingir orhemen u Iserael.’”+
3 Tsô mbatamen mba Iserael cii va hen tor ken Heberon, maa Tor Davidi ya ikyur a ve+ ken Heberon sha ishigh ki Yehova. Nahan ve shighe Davidi mkurem, hingir tor u Iserael.+
4 Davidi lu anyom 30 shighe u hingir tor la; a hemen anyom 40.+
5 Yange hemen Yuda ken Heberon anyom 7 man iwer 6, gema hemen Iserael cii man Yuda ken Yerusalem+ anyom 33.
6 Tsô tor man ior nav mough yem ken Yerusalem u za nôngon ityav a Mbayebushi+ mba ve tema ken tar shon la. Ve laha Davidi ve kaa ér: “Mayange u nyôr heen ga! Mbaapirashe man mbaawanev je kpa, vea zenda u kera.” Yange ve hen ér, ‘Mayange Davidi una nyôr heen ga.’+
7 Nahan kpa, Davidi ngohol gar u Shion u lu ican u nyôron her la. Hegen mba yer un ér Gar u Davidi.+
8 Tsô Davidi ôr sha iyange la ér: “Mba vea ta num sha Mbayebushi la, ve kar shin akpamnger ve za wua ‘mbaawanev man mbaapirashe,’ mba Davidi kôr ve ihyom la!” Ka nahan ve i kaa ér: “Mayange mbaapirashe man mbaawanev vea nyôr ken iyou la ga” ye.
9 Tsô Davidi za tema hen ijiir i i lu ican u nyôron her la, maa i yila ijiir shon ér* Gar u Davidi; Davidi maa gar ne ningir tser, hii hen Igyungu*+ la zan zan nyôr ken atô.+
10 Nahan Davidi lu hemban lun a tahav cii,+ shi Yehova Aôndo u akum a sha lu a na.+
11 Tsô Hiram+ tor u Tiru tindi mbaôron-loho hen Davidi, shi tindi a ikyon i sedar+ man mbakapinta man mbamaankwagh ér ve maa ukpekpe mba gar la, nahan ve hii u maan Davidi ya.*+
12 Shi Davidi fa er Yehova ver un tor sha Iserael, kwagh lu u geman sha mi ga yô,+ shi fa er Aôndo kende a tartor na sha,+ sha ci u ior Nav Iserael yô.+
13 Davidi yange moughon ken Heberon yemen ken Yerusalem yô, a seer kasev mba sha uikya+ shi seer vôson kasev, nahan i seer maren Davidi ônov mba nomso man mba kasev.+
14 Ka ati a ônov mba i mar un ken Yerusalem je ne: Shamua man Shobabi man Natan+ man Solomon+
15 man Ibehar man Elishua man Nefegi man Yafia
16 man Elishama man Eliada kua Elifeleti.
17 Mbafiliti mba ongo ér i shighe Davidi mkurem hingir tor u Iserael yô,+ Mbafiliti cii kôndo va u va keren Davidi.+ Davidi ongo kwagh ne yô, a sen shin ijiir i taver u nyôron her la.+
18 Tsô Mbafiliti va, va haa afo shin Pev* u Refaim cii.+
19 Nahan Davidi pine Yehova ér:+ “M kôndo m za nôngo ityav a Mbafiliti? U na ve sha ikyev yama?” Yehova gema kaa a Davidi ér: “Kôndo za, sha ci u me na Mbafiliti sha ikyev you kpee a bunde ga.”+
20 Nahan Davidi za hen Baal-perashim, maa Davidi za wua ve her. Tsô a kaa ér: “Yehova nyôr hen atô u mbahyomov av+ sha ishigh yagh, er mngerem ka ma pev ma kar nahan.” Ka nahan ve yila ijiir la ér Baal-perashim* ye.+
21 Mbafiliti undu akombo a ve her, nahan Davidi man ior nav tôô yem a mi.
22 Shighe kar yô, Mbafiliti shi kôndo va haa afo shin Pev* u Refaim+ la cii.
23 Davidi maa pine Yehova kwagh u una er yô, kpa a kaa ér: “De kôndon zaan jighilii ga. Kpa ningir kar ve ken ijime, za ta ityav sha a ve, sha ishigh ki toho u baka.
24 Nahan u va ungwan iov angahar ken toho u baka yô, er kwagh fese, sha ci u Yehova vande zan a we, u za wuan ikyumutya i Mbafiliti la.”
25 Tsô Davidi er vough er Yehova kaa un nahan; a za wua Mbafiliti,+ hii hen Geba+ zan zan nyôr Geser.+
Ngeren mba shin kpe
^ Shin “anmgbianev ou.”
^ Zwa Heberu, “lu we u duen shi u nyôron a Iserael ye.”
^ Shin a fatyô u kaan ér, “a yila i ér.”
^ Shin “Milo.” Inja i ishember i ken zwa Heberu ne ér “iv.”
^ Shin “ya u tor.”
^ Shin “Pev u Lun Gburumaa.”
^ Inja na yô ér, “Or u Fan u Peven Nyôron.”
^ Shin “Pev u Lun Gburumaa.”
