Samuel u sha Uhar 9:1-13
-
Davidi tese Mefibosheti dooshima tsung (1-13)
9 Davidi maa pine ér: “Or shi hen ya u Saulu u me tese nan erdoo sha ci u Yonatan jee?”+
2 Hen shighe ne, orgen lu u eren tom hen ya u Saulu yô; i yilan un ér Shiba.+ Tsô i yila un va hen Davidi, maa tor pine un ér: “Ka we u lu Shiba yee?” A gema a kaa ér: “Een, ka mo wanye wou je ne.”
3 Tor shi pine ér: “Or shi hen ya u Saulu, u me tese nan erdoo u Aôndo jee?” Shiba gema kaa a tor ér: “Wan u Yonatan shi her môm; a gba iwan sha angahar ahar cii.”+
4 Tor pine un ér: “Ngu hana?” Shiba gema kaa a tor ér: “Ngu hen ya u Makir+ wan u Amiel ken Lodebar.”
5 Fese je tor Davidi tindi ér i za tôô un, maa i za tôô un hen ya u Makir wan u Amiel ken Lodebar.
6 Mefibosheti wan u Yonatan, wan u Saulu va nyer hen Davidi yô, fese je a ngurum a wa ityough inya, maa a yav inya. Davidi maa yila ér: “Mefibosheti!” A lumun a kaa ér: “Wanye wou ngun.”
7 Davidi kaa a na ér: “De cie ga, gadia me tese u erdoo+ sha ci u teru Yonatan kpee a bunde ga, shi me hide a inya i Saulu, teru u tamen la cii me na u, shi u yaan kwagh* sha tebul wam hanma shighe.”+
8 Tsô Mefibosheti yav inya kaa ér: “Wanye wou ngu nyi je ve u ne ishima* you sha kwagh u iwa i kpen,+ er mo nahana?”
9 Tsô tor tindi ér i za ôr Shiba, ortom u Saulu a va; ve yô, a kaa a na ér: “M ngu nan wan, u wan u orvesen wou hanma kwagh u Saulu, man u ya na cii.+
10 U kahan un sule—we man ônov ou mba nomso man mbatomov ou—shi u kohol iyiav mbi u zough a mi ker la, sha er u naan ior mba wan, u wan u orvesen wou la kwaghyan yô. Kpa Mefibosheti, wan u wan u orvesen wou yô, una yaan kwagh sha tebul wam hanma shighe.”+
Hen shighe ne Shiba lu a ônov mba nomso 15 man mbatomov 20.+
11 Shiba maa kaa a tor ér: “Wanye wou una er hanma kwagh u terem tor a kaa a wanye na ér a er la cii.” Nahan Mefibosheti gema yan kwagh sha tebul u Davidi,* er ngu môm ken ônov mba tor nahan.
12 Hen shighe ne, Mefibosheti kpa lu a wan u nomso u kiriki, i yilan un ér Mika;+ nahan mba ve lu hen ya u Shiba cii, ve hingir mbatomov mba Mefibosheti.
13 Mefibosheti lu ken Yerusalem, sha ci u yaan kwagh sha tebul u tor hanma shighe;+ shi gba iwan sha angahar ahar cii.+
